2 Sạmuel 16 - Ạḍinya Iigbia

ADevid rꞌaZiba

^1-2 Mem mọ ọpo aDevid ọdaam ẹmha phọ matenom ạnyu eegbolom mọ ẹnum, kụ aZiba otelhedom mọ ạMefiboset ạteeny nyọdi, ạphamam ni ịyal ịnam adool dị ọsaany ịyal okuron iiḅoghoḍi ạbred, oniin okuron ịizugh iimuma avain, oniin okuron ịizugh imoom iimuma rꞌokuru ozu ẹnam dị omuzeḍi miim. ADevid ọdaam mọ apuru nyọdi, “Nạ kaḍighinom eeghe oomo phọ ạraraar phọ ịphen phọ?” Kụ aZiba ạphagharanaan, “Ịnam adool phọ, ọto kꞌOgbogh Ọdaam mọ kụ koḍigh ghan; ạbred phọ rꞌiimuma phọ, awe phọ olhe ghan; ḅịle kẹn bịdi ọphughol ghan miim mọ mem lọ asiloor ạbidi edugh ẹphen ẹdala phọ.”

³ Kụ ọdaam mọ apuru nyọdi, “Odi ẹghen ạMefiboset ọnyanyani ọde-otu phọ ạna Sọl?” “Ọdi odi ẹpe Jeruselem,” aZiba ạphagharanaan, “loor esi dị ọdi aḍuom ni ologhi mọ awe phọ Ịzirel kọḅogh ni ọmar phọ ọde-oko phọ ọno Sọl ạda ghan bọ ọngo nyịno.”

⁴ Kụ ọdaam mọ ạḅeni Ziba, “Tọrotoro ịyaar lọ ạMefiboset ạmoogh ghan meten ẹlo ạna.” Kụ aZiba ạḅem, “Mị otelhedom ạna, mị ụḅeeraan ghan ni Ogbogh Ọdaam mọ oomo amem!”

ADevid rꞌaSimei

⁵ Mem dị aDevid ọdaam ẹmha phọ ạghi bọ asi ẹpe Bahurim, oniin ọnyo asiya ạSol dị oghol mọ aSimei ọony aGera amite ni ọghi ọteeny ọdi. Rọteeny bịn amiigh oronyon ghan ọdi ọdapham.

⁶ ASimei amiigh oroḅol ikpo Devid rꞌawe ịtooghi phọ ọdi, ghạlamo ịdipho awe phọ ọdi rꞌawe ẹgham mọ ọdi okoom bọ ni nyọdi.

⁷ ASimei aronyon ghan nyọdi kụ ạḅem, “Ḍụa sịen! Ḍụa sịen! Ọokom-enu! Oopheeny!

⁸ Nạ ụsighe ọmar phọ ạSol, kụ nyịidipho Ọmoogh-we phọ rạliom nyịna loor ịdipho nạ ạze bọ ịbadi awe eghunotu phọ ạSol. Ọmoogh-we phọ mạsighe ọmar phọ ạngo mọony ạna Ạbsalom, nạ maguul, nạ ọkoom-enu.”

⁹ Abisai, ọpo onhiin phọ ọdi aḍighi bọ Zeruya, ạḅeni ọdaam mọ, “Nạ Ogbogh Ọdaam, eeghe kụ iḍighi kụ nạ ameera bọ kụ aghoogh phọ ọphon raronyon ghan bọ nyịna? Meera mị ụḅeeny ẹpe usoph ẹmhu phọ ọdi!”

¹⁰ Ọdaam mọ ạḅeni Abisai rꞌumor phọ ọdi Joab mọ, “Ịphen phọ inyina ị́mooghom. Eḍighi ịyaar dị ọdi uronyon ịmi loor esi dị Ọmoogh-we phọ kụ arom nyọdi, ạnhian kụ ạmoogh elhiom opuru mọ eeghe kụ iḍighi?”

¹¹ Kụ aDevid ạḅeni Abisai rꞌoomo awe ịtooghi phọ ọdi, “Ọkaraghi ọony phọ ạmi bịn rạwa ni oghiigh ạmi; kụ eeghe kụ iḍighi bọ iikia esi ịphen oye ọlo kꞌạBenjamin phọ raḍighi bọ? Ọmoogh-we phọ kụ ạḅeni nyọdi mọ ọdi uronyon ịmi, ịbile nyọdi ọdi aronyon.

¹² Iini Ọmoogh-we phọ kạmiin ni ịminimiin phọ ạmi kụ ụngo ịmi ḍịseph dị kẹsighe esi itonyonaan phọ ọdi.”

¹³ Kụ iḍighi kụ aDevid rꞌawe phọ ọdi oten rọki ẹpe oḅodo phọ, aSimei ạdaph ghan bịdi, arelhe ghan ọgbal eegbolom mọ; ọdi aronyon ghan ni ạḅile aroḅol ikpo ạbile ạsighe ophugh razuughiom ghan bịdi.

¹⁴ Aloor ọdaam mọ rꞌoomo phọ awe phọ ọdi medugh mem dị bịdi osi bọ sịphe ạJodan phọ, kụ bịdi ophooghian.

Ạbsalom odi Jeruselem

¹⁵ Ạbsalom rꞌoomo awe phọ Ịzirel ọghi oḍigh Jeruselem, kụ Ahitofel ạrolan ni rꞌạbidi.

¹⁶ Mem dị aHusai ọyaghiri phọ aDevid ạteeny bọ Ạbsalom, ọdi ạlho kụ ạḅem mọ, “Ọdaam, tọl kꞌagee-pọ! Ọdaam, tọl kꞌagee-pọ!”

¹⁷ “Eeghe kụ memitenaan oye ẹphomoghian phọ ạna esi ọyaghiri phọ ạna Devid?” Ạbsalom apuru nyọdi. “Eeghe kụ iḍighi kụ nạ ọ́daph bọ nyọdi?”

¹⁸ AHusai ạḅeni Ạbsalom mọ, “Eeye. Ọpo Ọmoogh-we phọ rꞌawe phọ ạbuen rꞌoomo awe phọ Ịzirel ozua bọ, ọpo kụ ọdi mị kạtolonaan; mị katugh kꞌọdi.

¹⁹ Kụ kẹn, mịna kạbile ọony ọde-otu phọ ạmina kụ akumu ạnhian? Ịdipho mị akumu bọ ọde phọ ạna kụ ịdi mị kakumu nyịna.”

²⁰ Ẹpe kụ esi dị Ạbsalom akiton asoman Ahitofel kụ ạḅem, “Nyịidipho yira odi bọ sịen, nạ ratoma ghan mọ yira oḍighi ika?”

²¹ Kụ Ahitofel ạphagharanaan, “Kịa ạrolan esi rꞌịgaanyeen ạnmariir ọde phọ ạna bụphe ọdi ạwile bọ ẹphen mọ ophogh ghan otu ọdaam mọ. Bịn tọrotoro oye sịen Ịzirel kalegheri mọ nạ mạmoogh mụdogh ḍien esi ọde phọ ạna, bịn ạbuen rọdaph bọ nyịna mọmoogh ạkpo ologhi.”

²² Kụ iḍighi kụ bịdi ọzaanaan ogbogo Ạbsalom ẹpe ạnyu otu ọdaam mọ, kụ sịphe riḍien oomo awe phọ kụ Ạbsalom aḍigh sịphe kụ ạrolan esi rꞌịgaanyeen ạnmariir ọde phọ ọdi.

²³ Tọrotoro oroma lọ Ahitofel ạngo riiḍio eten bọ ịpe ụsighe ghan ịdipho ọkaraghi ikpo ọnhu phọ Ẹnaan; aDevid rꞌẠbsalom ụdaph ghan ni bịn.