2 Sạmuel 15 - Ạḍinya Iigbia

Ạbsalom agbiighi ologhi oruphe

¹ Ịphen phọ reten, kụ Ạbsalom ạmoogh oghuugh-ude ḅịle rꞌạrusu, rꞌawe dị ọman ooghdi awe dị ọdaph ghan nyọdi.

² Ọdi aḅon ghan aḅetenu bịn ạghi ẹpe eten phọ ạmeera sịphe eḍighom ẹmha phọ. Tọrotoro amem lọ oye ạpham ḍighiton arumom ọwa ọdaam mọ mọ ạghaaph, Ạbsalom kạmagh oye phọ kụ apuru mọ oye phọ ạḍua ẹghen kụ aru bọ. Kụ oye phọ roghol ẹmha phọ ọdi ạḍua bọ kụ aru,

³ kụ Ạbsalom ạḅem, “Mịin, aḍighiton phọ kẹnighe ni ḍịghaagh ạna, kụ ọlo oye dị ọdaam mọ ạlogh mọ ạnaghan ọghaaph phọ ạna ólho.”

⁴ Kụ ọdi ạloghom, “Ḅẹlee mọ mị uḍighi ni oogboom ịiruen! Ọbo tọrotoro oye lọ ạmoogh ḍighiton mutu ni ụteeny ịmi kụ mị mụngo ni nyọdi iiḅi ịiruen.”

⁵ Mem lọ oye phọ aru esi Ạbsalom ozuman ọngo ọdi rughuenian, Ạbsalom kasele ḍịghaagh ọdi ạpam oye phọ ạkpun.

⁶ Ạbsalom aḍighi ghan ịduon phọ esi ạtorotoro ọlo Ịzirel lọ aru esi ọdaam mọ ọmoogh iiḅi ịiruen, bịn ịphen phọ eḍur weye phọ ẹngo nyọdi, bịdi ọnaghanan ghan nyọdi.

⁷ Inya ạsia reten Ạbsalom ạḅeni Devid ọdaam mọ, “Oye phọ, mị kạki ni ẹpe Hẹbron ạkpe oguan dị mị aguanaan Ọmoogh-we phọ.

⁸ Mem mọ ọpo mị ạrol bọ Gesur ẹpe Sịria, mị uguanaan Ọmoogh-we phọ mọ eḍighi ịyaar dị ọdi ụsighe ni ịmi aḅulemi Jeruselem, pọ mị kạaḅereghi ni nyọdi ẹpe Hẹbron.”

⁹ “Kịa rꞌẹepho,” ọdaam mọ ạḅem. Kụ iḍighi kụ Ạbsalom aten ạghi ẹpe Hẹbron.

¹⁰ Kụ ọlo ọdi arom sidom ạghiom oomo arughunughun phọ Ịzirel ạḅeni mọ, “Mem lọ nyina ẹnaghan ịdi ophula rụkuodu phọ, ịlooghi ẹḅem mọ, ‘Ạbsalom maḍighi ọdaam ẹmha ẹpe Hẹbron!’”

¹¹ Iḍighi ni ịyal okuron awe dị Ạbsalom ạmagh bọ ẹpe Jeruselem mọ ọdaph nyịno; bịdi úlegheri igbiighi phọ Ạbsalom kụ bịdi ụghimom ni rꞌogey ologhi.

¹² Kụ mem dị ọdi odi bọ rạpinyon rịkia phọ, Ạbsalom ạḅile kẹn ni arom ọghi ẹpe Gilo ọmagh Ahitofel, oniin oye dị aromoghiom ghan Devid ọdaam ẹmha phọ. Igbiighi ogboton ạdol ọdaam mọ imiigh ni ọmoogh ạsini, ḅịle kẹn aḍita awe phọ ọdaph bọ Ạbsalom omiigh ọbugh.

ADevid asuma ạḍua Jeruselem

¹³ Oniin otelhedom ạghaaph ni ạḅeni Devid, “Awe phọ Ịzirel momeeraam ọdaph Ạbsalom.”

¹⁴ Kụ iḍighi kụ aDevid ạḅeni oomo awe ịtooghi phọ ọdi bụphe ọrolan bọ rꞌọdi ẹpe Jeruselem, “Iḅerenu osuma. Ịduon kụ ílho, pọ yira kókpetenaan Ạbsalom. Iigborion, ọbo ọdi kakem ghan bọ atu uzuom iyira, ạsighe ịkaraph ạḅam ẹmhu ayira, ạsighe elhool ẹgham ạziom ẹmha phọ.”

¹⁵ “Ii, nạ Ogbogh Ọdaam,” bịdi ọphagharanaan. “Yoor ookolobian ni oḍighi ạtorotoro ịlo nạ ạḅem.”

¹⁶ Kụ iḍighi kụ ọdaam mọ ạḍua. Oomo eghunotu phọ ọdi rꞌạbuo ịtooghi phọ ọdi ụdaph ni nyọdi, omuton ḍioph ịgaanyeen ạnmariir ọdi dị ọdi ạwile mọ ophogh ghan otu ọdaam mọ.

¹⁷ Ịdipho ọdaam mọ rꞌawe phọ ọdi rọḍua bọ sịphe ẹmha phọ, bịdi ọmeera sịphe otu dị odi eekuna ẹmha phọ,

¹⁸ Oomo phọ awe ịtooghi phọ ọdi ụmeera ni otum nyọdi kụ awe ẹgham mọ ạbuphe rokori ghan bọ ọdaam mọ oten ẹpe arisigh phọ ọdi. 600 awe ẹgham mọ ọḍua bọ Gạt ọdaph nyọdi oten aani kẹn,

¹⁹ kụ ọdaam mọ ạḅeni Itay, oḍiemiom mọ ạbidi, “Eeghe kụ iḍighi kụ nạ rụdaph bọ iyoor? Ḅula ạghi ạrolan rꞌomoom ọdaam mọ. Nạ ooruen dị aghiil ẹgham ẹpe ẹmha phọ anyina,

²⁰ kụ nạ mạrol ẹphen ekulha amem bịn, kụ keḍighi bọ ika kụ mịna ạḅile ạpham nyịna akironom kẹn? Mị phọ bịn úlegheri ọkaraghi ekpisi phọ mị rạki bọ. Ḅula ạḅile ạphamam weye ẹmha phọ anyina — kụ Ọmoogh-we phọ ạmoogh ni ọnma ighirigiir esi ạna ḅịle nyịna kúbi.”

²¹ Kụ ọlo Itay ạphagharanaan mọ, “Nạ Ogbogh Ọdaam, mị akol ḍien Ọmoogh-we phọ kụ akunya rạngo nyịna mọ mị kạdaph ni nyịna tọrotoro ekpisi lọ nạ rạki, ghạlamo iḍighi ni ḍuugh.”

²² Kụ aDevid ạphagharanaan mọ, “Ẹnighe ni, tue ọḍua.” Kụ iḍighi kụ Itay ạpham oomo awe phọ ọdi rꞌawe dị bịdi ropogh kụ ạdapham.

²³ Awe phọ umoghi ni iboom mem mọ awe phọ ọdaph bọ Devid rọḍua bọ. Ọdaam mọ ạḅeeny okol phọ ạKidron kụ awe phọ ọdi ọḅeeny aani, kụ aḍita ạbidi oten onyeene ẹpe ẹdala phọ.

²⁴ ẠZedok oyil ạrikia phọ ạrol li sịphe, ḅịle kẹn ạbuo aLivai phọ ụrol li rꞌọdi, orool Igbe Ịyo kꞌẸnaan phọ. Bịdi useere ni ude kụ úpoophe mun tụtu oomo phọ awe phọ ọḍua sịphe ẹmha phọ omuneen. Oyil ạrikia phọ Ạbayata ạrol kẹn ni sịphe.

²⁵ Kụ ọdaam mọ ạḅeni Zẹdok, “Sịghe Igbe Ịyo phọ aḅulemi ẹpe ẹmha phọ. Eḍighi ịyaar dị mị ạḅeeraan ni Ọmoogh-we phọ, pọ aḍio edi ni dị ọdi kụsighe ni ịmi aḅulemi mị ạmiin Igbe phọ, ḅịle rꞌesi phọ ịpa oseere bọ.

²⁶ Kụ ọlo eḍighi ịyaar lọ mị akia nyọdi — pọ ọdi uḍighi ịmi ịlo ẹḅeeraan nyọdi.”

²⁷ Kụ ọdi ạḅile kẹn ạḅeni Zẹdok mọ, “Mịin, sịghe mọony phọ ạna Ahimaaz rꞌọony phọ Ạbayata Jọnatan eḅula ẹmha phọ rꞌẹepho.

²⁸ Mị kakoriom ni sịphe esiḍia phọ sịphe rọḅeenye ghan bọ weye phọ ẹpe ẹdala phọ tụtu mị ạnaghan dom ạna.”

²⁹ Kụ ạZedok rꞌẠbayata ọsighe Igbe Ịyo kꞌẸnaan phọ oḅulolom ẹpe Jeruselem kụ ọrol.

³⁰ ADevid ạghi ni ạsiiny Eegum Ọlivs ramoghi; ọdi arelhiom rꞌoopho aruwol ḅịle kẹn azua ẹmhu ọdi aḍeenaan ọto. Oomo awe phọ ọdaph bọ nyọdi uzua yogh kẹn ni rụmhu ạbidi romoghi yogh.

³¹ Mem dị ọḅeni bọ Devid mọ Ahitofel mạghi aḍighan Ạbsalom ophorogh ọno, ọdi ạaḅereghi ni mọ, “Seseeny, Ọmoogh-we, kiton oroma phọ Ahitofel kụ́moogh mun ịyaar oḍighinom!”

³² Mem dị aDevid asi bọ ạnyu ẹeḅaraph phọ, esi dị esi ọrol ọoḅereghi ẹrol, ẹmhu-ọyaghiri ọdi dị oghol mọ aHusai ọpo radoghoḍi ghan bọ ruutu phọ aru ni ạteeny nyọdi rꞌarukpe ọdi dị ẹphanyu ḅịle kẹn rꞌiikpelem dị edi ẹmhu phọ ọdi.

³³ Kụ aDevid ạḅeni nyọdi, “Nạ káḍighi sụo ụngo ịmi eḍighi ịyaar dị nạ ụdaph ịmi,

³⁴ kụ ọlo nạ katue ni ụlhoghonaan ịmi ḍịghaagh eḍighi ịyaar dị nạ aḅula ẹpe ẹmha phọ kụ ạḅeni Ạbsalom mọ nạ kakumu nyọdi rꞌoomo ologhi ạna ịdipho nạ akumu bọ ọde phọ ọdi. Ḅịle kẹn ḍighi oomo ịlo nạ katue ạgbagharan ghan tọrotoro oroma lọ Ahitofel katoma ghan Ạbsalom.

³⁵ Ariil ạrikia phọ Zẹdok rꞌẠbayata kọtol aani ni ẹpe; ḅẹni bịdi tọrotoro ịyaar lọ nạ ạnaghan ẹpe kꞌọdaam mọ.

³⁶ Bịdi ọpamam ni nmụny phọ ạbidi Ahimaaz rꞌạJonatan kụ nạ katue ni atom bịdi mọ oru ụḅeni ịmi tọrotoro ọghaaph lọ amite.”

³⁷ Kụ iḍighi kụ aHusai ọyaghiri phọ aDevid aḅula ẹpe ẹmha phọ mem mem mọ ọpo Ạbsalom rasi bọ bịn.