2 Sạmuel 14 - Ạḍinya Iigbia

AJoab aakolobian mọ Ạbsalom arigheel

¹ AJoab alegheri ni mọ rẹeḅaghami ni Devid ọdaam mọ ịduon phọ ọdi rạ́miin ghan mun bọ Ạbsalom.

² Kụ iḍighi kụ ọdi arom ọghi ọmagh ạnir dị ạsu iboom ologhi dị ạrol ghan ẹpe Tekoa. Mem dị ạnir phọ aru bọ asi, ọdi ạḅeni nyọdi mọ, “Kue bịn aḍighi mụdiadi nạ odi esi ọto: kpọloghian rụsuoma ọto, ḅịle kẹn kạ́zaranaan sịlaal ẹmhu ạna. Kue bịn aḍighi ịlo ạnir lọ odi esi ọto dị mebia ni iboom.

³ Kụ ạghi ạteeny ọdaam mọ kụ ạḅeni nyọdi ịphen mị kạḅeni bọ nyịna.” Kụ aJoab ạḅeni ạnir phọ ịpe ọdi kạkaaph bọ.

⁴ Kụ ạnir phọ ạghi ạteeny ọdaam mọ, azuman ạngo arughuenian, kụ ạḅem mọ, “Ụlhoghonaan ịmi ḍịghaagh, nạ Ogbogh Ọdaam.”

⁵ “Nạ rạwa eeghe,” ọdi apuru ạnir phọ. Ạnir phọ ạphagharanaan mọ, “Oye phọ, mị uwekulom ekpukele ạnir. Olhom ạmi mamugh.

⁶ Oye phọ, mị ụmoogh ghan ịyal alephiri ạnmuny, kụ eniin aḍio kụ ịyal ạbidi ọruanagh eeghi ologhi eḍum, ekpisi dị oye ọgbarion ạbidi ụ́tol, kụ oniin ọnyo ạbidi aghiigh ọphori phọ.

⁷ Kụ nyịidipho, oye phọ, oomo asiya phọ ạmi rụkpaariom ghan ịmi mọ mị ụḅogh ọony phọ ạmi ụngo bụno, pịdi bịdi okiigh nyọdi loor esi dị ọdi maghiigh bọ umor phọ ọdi. Eḍighi ịyaar lọ bịdi oḍighi ịduon phọ, pọ ọony ịmi úsughanaan mun. Bịdi kopiemi erua phọ ọdi, oḍime iighu phọ ịpe esugha bọ; bịn aḍien olhom mọ ạmi epe sịen aḅirini phọ, bịn ịyaar ọgba ogholom kẹ́tol.”

⁸ “Keel ologhi otu,” ọdaam mọ ạphagharanaan, “mị kaḍighi ni ịdi kẹnighe.”

⁹ “Nạ Ogbogh Ọdaam,” ạnir phọ ạḅem, “tọrotoro ịlo nạ aḍighi, mị rꞌọto kꞌạmi kụ kotool li ịiḅaghami lọ emite; nạ rꞌeghunotu ọdaam mọ úlegheri aani.”

¹⁰ Kụ ọdaam mọ ạphagharanaan, “Eḍighi ịyaar lọ oye ạpaar nyịna, sịghe oye phọ uruom ịmi bịn ọdi nyịna kạ́aḅaghami mun.”

¹¹ Kụ ạnir phọ ạḅem, “Nạ Ogbogh Ọdaam, ḅẹeḅereghi Ọmoogh-we Ẹnaan phọ ạna, pịdi asiya phọ ạmi ọpo ịikpo phọ edi bọ esi ọdi oḅulemian ịphen oghiigh bọ mọony phọ ạmi, ọdi kúkiigh ọphori phọ ọony phọ ạmi bịn uḍighi aani ịnon igbogh ịkaraph.” “Mị aguanaan esi Ọmoogh-we phọ ọpo odi ghan bọ bịn,” aDevid ạphagharanaan, “oye káḍighi ịyaar ọony phọ ạna.”

¹² Kụ ạnir phọ ạḅem, “Seseeny, Ogbogh Ọdaam, mị kạḅile ạḅem eniin ịyaar bịn.” Kụ oye phọ mọ, “Ḅẹm ạa.”

¹³ Kụ ạnir phọ ạḅeni nyọdi mọ, “Iḍighi ika kụ nạ aḍighi bọ weye phọ Ẹnaan ịkaraph dị ẹrol ịduon? Nạ ómeera mun mọ ọony phọ ạna ạḍua ẹpe ọdi asuma bọ arigheel, kụ iḍighi kụ ịduon phọ nạ masoph ọoruen apume loor phọ ạna esi ịphen nạ mạghaaph bọ.

¹⁴ Oomo ayira komugh ni; yira ọkigh mụum dị ozu ude, dị kótue mun ookpomoghi. Ghạlamo Ẹnaan bịn réḅeton ghan mun oye lọ mamugh, kụ ọlo ọdaam mọ katue ni ạwa reten lọ oye lọ asuma katigheel.

¹⁵ Nyịidipho, nạ Ọdaam, ịyaar phọ mị ạtuan bọ kụ aru ọḅaanaan ạna eḍighi ịdi awe phọ kụ ụpaar ịmi, kụ iḍighi kụ mị ạḅeni loor ạmi mọ mị katu ạḅaanaan nyịna esi oḍuom ologhi mọ nạ kaḍighi ni ịlo mị ạlom.

¹⁶ Mị ụutughian ni mọ nạ kụnaghanan ni ịmi ạḅile ụphel ịmi ḍịghaagh oye phọ ọpo rạwa bọ oghiigh ọony phọ ạmi rꞌạmi bịn ụsighe iyoor sịen ade phọ Ẹnaan ẹngo bọ weye phọ ọdi.

¹⁷ Kụ mị ạḅeni loor phọ ạmi mọ oguanaan phọ ạna, oye phọ, kụphel li ịmi, loor esi dị ọdaam mọ ạkigh ọokpaany kꞌẸnaan kụ katue ni ạgbarion igey rꞌịkaraph. Ọmoogh-we Ẹnaan phọ ạna ạrolan rꞌạna!”

¹⁸ Kụ ọdaam mọ ạphagharanaan, “Ịmi kụ́aaghinaan ịlo mị apuru nyịna.” “Upuru ni ịmi tọrotoro ịyaar, nạ Ogbogh Ọdaam,” ạnir phọ ạphagharanaan.

¹⁹ Kụ ọdi apuru ạnir phọ mọ, “AJoab kụ arom bọ nyịna dom mọ ạḍien?” Ạnir phọ ạphagharanaan, “Mị akunya rꞌoomo ạraraar iigbia, nạ Ogbogh Ọdaam, ịdi kọbile ọphagharanaan aḍipuru phọ ạna ílho. Ọkaraghi agey oye ịtooghi phọ ạna Joab kụ ụḅeni bọ ịmi ịlo mị kaḍighi rꞌịlo mị kạkaaph.

²⁰ Kụ ọlo ọdi aḍighi ịphen phọ oolemiom ạraraar. Nạ Ogbogh Ọdaam mọ ạmoogh olegheri ịyaar ịdipho ọokpaany kꞌẸnaan kụ alegheri ni oomo ạraraar lọ remite.”

²¹ Reru reten kụ ọdaam mọ ạḅeni Joab, “Mị magbiighi oḍighi ịpe nạ ạwa bọ. Kịa ạsighe Ạbsalom aru.”

²² Kụ aJoab aḅololo ude sịphe risigh aDevid ạngo rughuenian kụ ạḅem, “Ẹnaan ẹseph nyina, nạ Ogbogh Ọdaam! Nyịidipho mị alegheri mọ mị ạḅeeraan ni nyịna, loor esi dị nạ maḍighi ịpe mị ạlhom bọ.”

²³ Kụ ọdi aḅetenu ạghi ẹpe Gesur kụ ạsighe Ạbsalom arighelom Jeruselem.

²⁴ Ọdaam mọ, kụ ọlo, ạto ni ạḅem mọ Ạbsalom kútugh sịphe amarugh ọdaam mọ. “Mị ụ́wa ọmiin ọdi,” ọdaam mọ ạḅem. Kụ iḍighi kụ Ạbsalom agheel ẹpe kꞌọdi, bịn ọ́miin ọdaam mọ ekpeḍien.

Ọpomoghi Ạbsalom rꞌaDevid

²⁵ Sịphe Ịzirel oye ọ́rol dị ạnighe ḍimite ịdipho Ạbsalom; emiigh ẹmhu ọdi kụ esi rạda, esi dị kọḍagha ị́tol.

²⁶ Ọdi ạmoogh ni iboom ạsilaal, kụ lhạ phọ ọdi ạsama ghan mem, mem lọ mẹdoony ẹḅile ẹemor ẹphughan. Ịimor ghan ni epel ịyal igbogh ịtoom ẹemor ọdaphan ọtoom mọ ạbudaam mọ ọma bọ mọ ọtooghiom rạraar phọ.

²⁷ Ạbsalom ạmoogh ni inya ạnmuny, ịraar alephiri rꞌoniin ọnyani dị oghol mọ ạTamar, ẹnighe ọdi ịbugh ni iboom.

²⁸ Ạbsalom ạrol ịyal ạsia sịphe Jeruselem kụ ọdaam mọ rꞌọdi ụ́miinan.

²⁹ Kụ ọdi arom mọ ọghi ọmagh Joab mọ ọdi aghol ẹmhu ọno ạghi ạteeny ọdaam mọ kụ ọlo aJoab ómeera oru.

³⁰ Kụ iḍighi kụ Ạbsalom ạḅeni butelhedom mọ ọdi, “Ịmiin ozo phọ aJoab atuman nyọon ạmi, ḅịle kẹn ọzuph ni ịbiakpa abali dị repoph ni. Ịki ẹsu nịan ozo phọ.” Kụ bịdi ọghi ọsu nịan ozo phọ.

³¹ AJoab aten ạghi ẹpe otu phọ Ạbsalom kụ apuru, “Eeghe kụ iḍighi kụ abutelhedom mọ ạna ọsu bọ nịan ozo phọ ạmi?”

³² Ạbsalom ạphagharanaan mọ, “Loor dị nạ ómeera oru mem mọ mị ạmagh bọ nyịna. Mị ụwa ghan lọ nạ kạki ạteeny ọdaam mọ upurunaan ịmi mọ, ‘Eeghe kụ iḍighi kụ mị ạḍua bọ Gesur aru ẹphen? Mịnighe ghụn dị mị mụtol ẹpe phọ.’” Kụ Ạbsalom ạloghom, “Mị rạwa mọ nạ aḍighi ịdi ọdaam mọ rꞌạmi kọmiinan, kụ eḍighi ịyaar lọ erugh iphum ịmi, pọ ọdi ughiigh ịmi.”

³³ Kụ iḍighi kụ aJoab ạghi ạteeny Devid kụ ạḅeni nyọdi ịpe Ạbsalom ạḅem bọ. Kụ ọdaam mọ mọ ọghi ọmagh Ạbsalom, kụ ọdi ạghi asi kụ azuman asi ude sịphe risigh ọdaam mọ. Kụ ọdaam mọ ạkpun nyọdi ọḅeniom mọ nạ masi.