2 Sạmuel 12 - Ạḍinya Iigbia

Adom mọ aNetan rꞌoghonono phọ aDevid

¹ Ọmoogh-we phọ arom ni Netan oyil phọ Ẹnaan mọ ạghi ạteeny Devid. ANetan ạghi ạteeny nyọdi kụ ạḅeni mọ, “Ịyal awe ụrol li eniin ẹmha; oniin ọolha, oniin uwekulom.

² Ọolha phọ ạmoogh ni iboom iyool-ịga rꞌạsinam,

³ kụ uwekulom mọ ạmoogh oniin ọony oyool-ọga bịn dị ọdi agho. Ọdi ạmaar aakonom ọga phọ, ḅịle kẹn oyool-ọga phọ ạḅophoghan rꞌạnmuny oye phọ aphoph; ịpherepe ịiya eḍien kụ ẹdi role ghan, ọpaga kụ ọdi bịdi rọpugholom ghan mụum; rạmina ghan okpokolo ọdi. Ọga phọ ạghigh ịdipho ọnyani ọdi.

⁴ Eniin aḍio kụ ooruen aruanaan ọolha phọ. Ọolha phọ ọ́wa ọsighe oniin ọga ọdi oghiigh ọkoom igoni oye phọ; kpạripe ghụn ọdi ạsighe ọga uwekulom mọ kụ ạkoom igoni ooruen phọ ọdi.”

⁵ ADevid ạghagham ni ologhi ọdaam mọ ọphon phọ kụ ạḅem mọ, “Mị akunya rꞌỌmoogh-we phọ ọpo odi ghan bọ bịn, oye phọ ọpo aḍighi bọ ịphen phọ ạkpe omugh!

⁶ Ọdi ạkpo bọ ekpeḍien kụ aḍighi ịphen phọ, ọdi kạkpe inya amem ịpe ọdi ạsighe bọ.”

⁷ “Nạ kụ oye phọ,” aNetan ạḅeni Devid, “kụ ịphen kụ ịdi Ẹnaan phọ Ịzirel Ọmoogh-we phọ ạḅem: ‘Mị kụ ụsighe nyịna aḍighi ọdaam Ịzirel kụ ạphel nyịna ḍịghaagh ạSol.

⁸ Mị ạsighe ọmar phọ ọdi rꞌạnmariir phọ ọdi ạngo nyịna; mị aḍighi nyịna ọdaam Ịzirel rꞌaJuda. Eḍighi ịyaar dị ịphen phọ ígeni, mị mụngo ni nyịna ịyal ọdo ịphen phọ.

⁹ Eeghe kụ iḍighi bọ kụ nạ mạḅaar bọ ẹmhu esi ịto phọ ạmi? Eeghe kụ iḍighi kụ nạ aḍighi bọ ịkaraph phọ ịphen. Nạ maghiigh Yuraya ẹpe ẹgham mọ; nạ kụ uḍighi ịpe awe Amon phọ oghiigh bọ nyọdi kụ nạ agbi ọsighe ạnir phọ ọdi.

¹⁰ Nyịidipho, tọrotoro oghiil sịen ẹemara ẹemara phọ ạna, abuniin komugh ghan ḍuugh egbo loor esi dị nạ ịmi ụ́naghanan bọ mun ḅịle kẹn nạ mạsighe ạnir phọ aYuraya.

¹¹ Mị akunya rạḅeni nyịna mọ mị kaḍighi ni ịdi oniin ọlo kꞌạna kạsighe ni ịiḅaghami ạngo nyịna. Nạ kạmiin ni mem dị mị kạsighiogh nmạriir ạna kụ ạngo ọnon oye; kụ ọdi ạtolan esi rꞌạbidi ootaany aḍio.

¹² Nạ uḍighi ịkaraph phọ esi ịbooghian, kụ ọlo ịphen ạmi mị kaḍighi amitiom ootaany pịdi oomo Ịzirel ọmiin.’”

¹³ “Mị maḍighi ịkaraph esi Ọmoogh-we phọ,” aDevid ạḅem. ANetan ạphagharanaan mọ, “Ọmoogh-we phọ mạsar ạwilenaan nyịna, nạ kámugh.

¹⁴ Kụ ọlo loor esi dị nạ mạgilaam bọ Ọmoogh-we phọ esi ịphen nạ aḍighi bọ, ọony phọ ạna kamugh ni.”

¹⁵ Kụ aNetan aten agheel kꞌọdi. Ọmoogh-we phọ aḍighi ni ịdi ọony phọ ạnir phọ aYuraya ạmaranaan bọ Devid ạrol eboom émoon.

Olephiri ọony phọ aDevid amugh

¹⁶ ADevid ạaḅereghi ni Ẹnaan mọ ọony phọ aḍum. Ọdi ómeera olhe ịyaar, kụ tọrotoro aḍughul ọdi aḍigh osoph ọdi kụ ạmina ude.

¹⁷ Ạbuo ịtooghi ịsiphe ogiga phọ ọdi ụghi ni ọteeny nyọdi kụ ọkparagha ghan oḍighi ịlo ọdi kaḅetenu, kụ ọlo ọdi ómeera, ḅịle ọdi ómeera olhe ịyaar rꞌạbidi.

¹⁸ Rẹman oḍual aḍughul-otu bịn ọony phọ amugh, kụ awe ịtooghi phọ aDevid ughiilaan ni ọḅeni ọdi ịpe memite bọ. Bịdi ọḅem ghan mọ, “Mem mọ ọbumoony phọ ạrol bọ, aDevid iyira ụ́phagharanaan mem lọ yira ọḅeni nyọdi. Yira kọḅeni bọ nyọdi ika mọ ọony phọ mamugh? Iini ọdi kạki bịn aḍighima ịyaar loor ọdi!”

¹⁹ Mem dị aDevid ạmiin bọ ịdi bịdi roophola yogh bọ, itir ri nyọdi mọ ọbumoony phọ mamugh. Kụ ọdi apuru bịdi mọ, “Ọbumoony phọ mamugh ḍụghum?” “Ii, ọdi mamugh,” bịdi ọphagharanaan.

²⁰ ADevid aḅetenu sịphe ade phọ, awura mụum, ạzaranaan sịlaal ẹmhu ọdi, ạḅile anme ạsuoma ọdi, kụ ọdi aten ạghi ạaḅereghi ẹpe otu Ọmoogh-we phọ. Mem dị ọdi arigheel bọ ẹpe otu ọdaam mọ, ọdi apuru eḍien olhe kụ rọḅam bọ eḍien phọ bịn ọdi alhe ni.

²¹ Kụ awe ịtooghi phọ ọdi ọḅeni nyọdi mọ, “Yoor útue ụ́naghanan ịphen phọ. Mem mọ ọbumoony phọ odi bọ, nạ ụkaagh ẹḍogh amoghi yogh; kụ ọony phọ romugh pụruku nạ aḅetenu ale eḍien!”

²² “Ii,” aDevid ạphagharanaan, “Mị ụkaagh ẹḍogh, ạḅile amoghi mem mọ ọpo ọony phọ odi bọ. Mị ugbiom ghan mọ Ọmoogh-we phọ kụnma ni ịmi ighirigiir.

²³ Kụ nyịidipho phọ ọdi mamugh bọ, mị kakol eeghia kụ ạkaagh ẹḍogh? Mị katue ni aḅulemi ghuḍum ạngo ọony phọ ḍụghum? Aḍio edi ni dị mị kạki aani ẹpe ọdi odi bọ, kụ ọlo ọdi kátue mun aḅula ẹphen mị odi bọ.”

Mọmar Sọlomon

²⁴ Kụ aDevid ạadereghi ạnir phọ ọdi Batsiba. Ọdi ạrolan esi rꞌạnir phọ kụ ọdi ạmar olephiri ọony, kụ aDevid aghol mọ ạSolomon. Ọmoogh-we phọ ạphomoghian ni mọony phọ,

²⁵ kụ ạto ạngo Netan oyil phọ Ẹnaan mọ aghol ḍien ọony phọ mọ aJedidaya, loor esi dị Ọmoogh-we phọ ạphomoghian ni nyọdi.

ADevid ạkpar apu ẹmha phọ aRaba

²⁶ Ịduon phọ ạraraar rẹki bọ ni, aJoab aruphiom ni ẹgham ẹmha phọ aRaba, ẹpe kụ egbogh ẹmha Amon, kụ rakirighian ọkpar opu ẹmha phọ.

²⁷ Kụ ọdi arom butelhedom mọ ọghi ọghaaph ọḅeni Devid ịpe rẹki bọ: “Mị mazuom ẹgham Raba kụ mị maziton ạboor esi ạmuum mọ ạbidi.

²⁸ Kụ nyịidipho kpookpomoghi bụeri phọ awe ẹgham mọ ạna, azuom ẹgham ẹmha phọ ạsighe ẹmha phọ rꞌaloor ạna. Mị rạ́wa ọzola aḍuphuugh iphelegbe mọ mị kụ ulher bọ ẹmha phọ.”

²⁹ Kụ iḍighi kụ aDevid aakpomoghi weye ẹgham mọ ọdi, ạghi asi Raba, azuom ẹmha phọ ẹgham bịn ạkpar apu.

³⁰ Sịphe ẹmhu ẹkaaneen eru phọ Amon oghol bọ mọ ạMolek, aDevid ạsighe eghoony dị oḍighinom gol dị ẹemor phọ rẹkiom ni 35 igbogh ịtoom ẹemor, ḅịle kẹn igbogh ịkuta ịrolom ni. ADevid ạsighe ịkuta phọ ạlogh sịphe eghoony phọ nyẹpe ọdi. Ọdi kẹn awum ni iboom ạraraar ạsighiogh sịphe ẹmha phọ,

³¹ kụ ọdi ạsighe weye ẹmha phọ ạngooghi ịfokofoko rꞌạrusua rꞌasikubu kụ ạkpaariom bịdi oogbo ghan sighiigh odoghoḍiom aruutu. Iniin phọ kẹn kụ ịdi ọdi aḍighi oomo awe ạramha phọ Amon. Kụ ọdi rꞌawe phọ ọdi ogbi nụun ogheel aJeruselem.