2 Sạmuel 11 - Ạḍinya Iigbia

ADevid rꞌaBatsiba

¹ Rẹḅile rẹteeny osoor, ọdo amem ạlha phọ dị ạraalha rọki ghan ẹgham, aDevid arom ni Joab oomo awe phọ Ịzirel rꞌabuḍiemiom mọ ạbidi eeghi ẹgham; bịdi ụmoogh ni ọkpar opu esi awe Amon phọ kụ ọḅile okpobiom ẹmha dị oghol mọ aRaba. Kụ ọlo aDevid rꞌaloor ạrol ẹpe Jeruselem.

² Eniin aḍio, ogbo ootaany, aDevid ọdaam mọ ạsuma rạlha kụ ạsiiny ẹpe ạnyu otu. Ịdipho ọdi ratelhe yogh bọ ẹpe ạnyu otu phọ bịn ọdi ạmiin oniin ạnir dị rabura mụum. Ạnir phọ ạnighe ni iboom.

³ Kụ ọdi arom otelhedom mọ ạghi ạwa alegheri ịlo ạnir phọ, kụ ọwa olegheri mọ ạnir phọ aBatsiba ọnyani Ẹliam ḅịle ạnir aYuraya oye ọlo ạHitait.

⁴ ADevid arom butelhedom mọ ọghi ọmagh ạnir phọ; kụ bịdi ọsighe ạnir phọ oruom nyọdi kụ ịyal phọ ạbidi ọrolan esi. (Pụruku ạnir phọ ạphighiron ni ạmadan ẹkia oselemian aloor ẹlo ụnwanyu phọ.) Kụ ạnir phọ aten agheel ẹpe kꞌạbidi.

⁵ Mọony amem kụ ạnir phọ aloghoma mọ ọno raamor kụ ọdi arom dom mọ ọghi ọḅeni Devid ịduon phọ.

⁶ Kụ aDevid arom dom ạghiomonaan Joab mọ, “Sịghe aYuraya oye ọlo ạHitait phọ uruom.” Kụ aJoab ạsighe oye phọ ạghiom Devid.

⁷ Mem dị aYuraya asi bọ, aDevid apuru ni nyọdi mọ aJoab rꞌawe ẹgham mọ odi ni agey ḍụghum, ḅịle rꞌịlo ẹgham mọ rẹki.

⁸ Kụ ọdi agbi nụun ọḅeni aYuraya mọ, “Keel ologhi otu aphooghian ẹnum.” AYuraya aten ạḍua, kụ aDevid ạngo inmo mọ ọghiom nyọdi ẹpe kꞌọdi.

⁹ Kụ ọlo aYuraya ógheel ologhi otu; kpạripe ghụn ọdi ạmina sịphe ọnhu-aḍibuo ọto kꞌọdaam mọ rꞌạbuphe rokori ghan bọ ọdaam mọ.

¹⁰ Mem dị aDevid ạnaghan bọ mọ aYuraya ógheel kꞌọdi, ọdi apuru ni nyọdi mọ, “Mebia ni nạ ạḍua bọ kụ pụruku nạ arigheel; eeghe kụ iḍighi bọ kụ nạ ógheel bọ ologhi otu kꞌạna.”

¹¹ AYuraya ạphagharanaan mọ, “Awe phọ Ịzirel rꞌaJuda odi ẹpe ẹgham mọ, ḅịle kẹn Igbe Ịyo phọ edi ẹpe rꞌạbidi; oḍiemiom ẹgham mọ ạmi Joab rꞌạbuo ịtooghi phọ odiighi erugh ẹpe elegheḍum mọ. Keḍighi bọ ika kụ mị akeel ẹpe kꞌạmi, ale ạḅile ạpughol, ạḅile ạtolan esi rꞌạnir ạmi? Esi oomo ạraraar iigbia, mị akunya mọ mị káḍighi ịyaar dị ẹrol ịdipho.”

¹² Kụ aDevid ạḅem mọ, “Pọ tọl sịen rodon, iḍue kụ mị aḅulemi nyịna.” Kụ aYuraya ạrol ẹpe Jeruselem ḍio phọ ạḍiphe rꞌạḍiphe etum bọ pạ.

¹³ Kụ aDevid ạmagh ni nyọdi olhe eḍien adulhe bịn ạngooghi nyọdi miim dị aghiigh ni nyọdi iboom, kụ ọlo ḍughul phọ ạḍiphe phọ kẹn aYuraya ógheel ologhi otu; kpạripe ghụn ọdi ade ukpe ẹghologhol ọdi bịn ạmina sịphe osoph ikoli phọ sịphe otu ọdaam mọ.

¹⁴ Rẹḅile rẹḅaal ḍịroor kụ aDevid ạge ḍịnya ạghiomonaan Joab kụ ạngo aYuraya mọ ạsighe ạghi.

¹⁵ Ọdi ạge mọ, “Sịghe aYuraya aseere risigh, pạkiri lọ ẹgham mọ ẹkar rẹkologhol, kụ ẹwile nyọdi eḅula ọman pịdi okiigh nyọdi.”

¹⁶ Kụ iḍighi kụ mem dị aJoab rakpobiom bọ ẹmha phọ, ọdi ạsighe ni Yuraya aseere esi dị ọdi alegheri mọ ẹpomoghian ạkar ạkpar.

¹⁷ Awe ẹgham ẹpomoghian ụḍua ni ẹpe ẹmha phọ omiteghu kụ eenan rꞌawe ẹgham mọ aJoab; bịdi ụze ni buniin awe ịtooghi phọ aDevid, ọḅile oghiighom Yuraya.

¹⁸ Kụ aJoab arom mọ ọghi ọḅeni Devid ịpe ẹgham mọ ẹrol bọ,

¹⁹ kụ ọdi ạḅeni otelhedom mọ mọ, “Mem dị nạ mạḅeni ọdaam ẹmha oomo ịlo ẹgham mọ,

²⁰ iini kepin ni ologhi ọdi kụ ọdi apuru nyịna mọ, ‘Eeghe kụ iḍighi kụ nyina etuman bọ ẹmha phọ oomo ịpe kụ eenan rꞌạbidi? Nyina ị́itughian mọ bịdi koḅughe ghan ni sịphe iikpe phọ ịkpina phọ kụ ọtaph ghan?

²¹ Nyina ị́itughian ịpe oghiigh bọ Ạbimelek ọony phọ ạGidion? Iḍighi ẹpe Tebez, ạnir-ephoph bịn kụ aḅughe ḍighiigh sịphe iikpe phọ bịn atebenom nyọdi bịn aghiigh. Iḍighi bọ ika kụ nyina ẹghi bọ etuman iikpe phọ oomo ịpe?’ Eḍighi ịyaar dị ọdaam mọ apuru nyịna ịduon phọ, ḅẹni nyọdi mọ, ‘Oye ịtooghi phọ ạna Yuraya amugh aani kẹn ni.’”

²² Kụ otelhedom ạghi ạteeny Devid kụ ạḅeni nyọdi ịpe aJoab arom bọ nyọdi.

²³ Ọdi ạḅeni mọ, “Ẹpomoghian phọ ayoor kụ ụkpar upu iyoor kụ ọḍuaghu ẹpe phọ omiteghu ẹpe ẹdala phọ eenan ayoor, kụ ọlo yoor uphorogh ni bịdi ọghi osi sịphe ọnhu-aḍibuo ẹmha phọ.

²⁴ Kụ bịdi oḅughe ghan iikpe phọ ụraḅal iyoor ịkpina, kụ abuniin awe ịtooghi Ogbogh Ọdaam mọ omugh, okiigh kẹn ni oye ịtooghi phọ ạna Yuraya.”

²⁵ Kụ aDevid ạḅeni otelhedom mọ mọ, “Kpạrami ologhi aJoab, ạḅeni nyọdi mọ ọdi kúkiriri, loor esi dị rólegheri ghan oye lọ kamugh erugh ẹgham. Ḅẹni nyọdi mọ kpạrami ḍịghaagh ạḅile azuom ẹgham ẹmha phọ ạmoogh ọkpar-opu.”

²⁶ Mem dị aBatsiba ạnaghan bọ mọ moghiigh olhom mọ ọno, ọdi amoghinaan ni nyọdi.

²⁷ Kụ ariiḍio okughuḍi phọ remunughan, aDevid arom ni mọ ạnir phọ aru ẹpe kꞌọdaam mọ; ạnir phọ aten ạnir ọdi kụ ạmaranaan nyọdi olephiri ọony. Kụ ọlo ịphen aDevid aḍighi bọ ị́ḅeeraan Ọmoogh-we phọ.