2 Pita 3 - Ạḍinya Iigbia

Ọmoogh-we phọ aguanaan ni oru

¹ Iiḅi asiya, ḍịen ạḍinya omuneniom ịyal dị mị mạge riruomaan inyina. Sịphe ịyal phọ ạrinya phọ, mị ụghiom ghan inyina ịphen phọ ologhi ọozaghamiom ịser-sẹr ịitughian phọ anyina.

² Mị rạwa mọ ịitughian ghan ikpo ọnhu phọ ariil aruukuan phọ Ẹnaan ọghaaph bọ gediidi phọ, ḅịle rꞌologh Ọmoogh-we phọ rꞌỌpelia phọ abutelhedom mọ anyina ịngo bọ inyina.

³ Esi omiighom, ịmaar elegheri mọ ruukuna phọ buniin awe dị ịkaraph ạruuphua kụ ẹmoogh komite ni. Bịdi kịgilaam ghan ni inyina

⁴ kụ ọḅem ghan mọ, “ẠJizos phọ ḍịen aguanaan ni ọḅile oru? Kụ odi ẹghen nụun? Abugbogh ạburude phọ ayira momuughu ni otene igbaany, kụ oomo phọ ạraraar phọ edi ni eniin ẹrolom mọ ẹrol bọ ni kꞌẹḅel emiighom aḅirini phọ.”

⁵ Bịdi mogboton bịn ọḅitonaan ekpo phọ ẹphen mọ gediidi phọ Ẹnaan ịḅem ni ọnhu bịn ẹlhemom bọ kẹ phọ rꞌade phọ. Mem mọ ọlhem mọ, ade phọ ịḍua ụmuum kụ emite bọ, kụ ạmuum mọ ako ni de phọ akitonom.

⁶ Kụ Ẹnaan ịsighe kẹn mụum-aḍigho kụ ephiemiom bọ ọḅel aḅirini phọ.

⁷ Ekpo ọnhu dị Ẹnaan ẹḅile ẹghaaph kụ iiko bọ ni kẹ phọ rꞌade phọ edi bọ nyịidipho reseenaan mọ ạnian ephiemi. Oseere kẹ phọ rꞌade phọ rokoriom ghan ḍio phọ Ẹnaan keegbo bọ ịiruen epiemiom bụkaraph awe phọ.

⁸ Iiḅi asiya, kụ ọlo kébula ekpo phọ ẹphen: mọ ghisigh Ọmoogh-we phọ ọgbaranaan ólho ghan esi aḍiniin aḍughul-otu ra 1,000 ạsia. Esi ọdi ịyal phọ ịdi iniin phọ ni.

⁹ Ọmoogh-we phọ ráabinya ghan oḍighi ịlo dị aguanaan, ịdipho buniin anyina rẹetughian ghan bọ. Ọdi rạminoghom ghan ghụn ịkaraph phọ anyina, ịdi eḍighi bọ ọdi ọ́wa ophiemi rꞌoniin oye, ọdi rạwa ghan ghụn mọ oomo phọ awe phọ okiton esi ịkaraph phọ ạbidi.

¹⁰ Kụ aḍio phọ Ọmoogh-we phọ katu bọ keḍighi ekperenom ịdipho ọḅa. Ḍio phọ ạḍiphe phọ ạke phọ kạḍuanam ni ḍịgbagara ạḍiaḅa, kụ ịikpo phọ edi bọ kꞌạke kẹnuughi ni ẹḅile ẹgbo, kụ ade phọ rꞌoomo phọ ịpe ọdi kepe ni emuneen.

¹¹ Ịduon kopiemi bọ ni oomo ạraraar phọ ịphen, nyina kẹtol eeghe ọdo ạdol nụun? Ịtol dọl aruukuan ẹḅogh ghuḍum mọ anyina ẹlhogh ḍịghaagh Ẹnaan,

¹² kụ ekoriom ghan ẹkparami ḍịghaagh oḍighi ghan ịlo aḍio phọ Ẹnaan kẹnuun ẹteeny, ḍio phọ ạḍiphe ạke phọ kạnu bọ ạḅile ape kụ ẹghologhol phọ kẹgboomi bọ ịikpo phọ edi bọ kꞌạke.

¹³ Kụ Ẹnaan meguanaan kumoom ạke rꞌaḍimoom ade dị keḍighi marugh aruukuan. Ịphen phọ kụ ịdi yira rogonom ghan bọ.

¹⁴ Iiḅi asiya, ịdipho nyina regonom bọ ḍio phọ ạḍiphe phọ, ịkparami ghan ḍịghaagh eḍighi ịlo nyina kẹtolan nyọdi rꞌẹepho, eekuan eseleman ghisigh phọ Ẹnaan.

¹⁵ Iseere ologhi elegheri mọ ọnma ighirigiir Ọmoogh-we phọ kụ rịngo ghan inyina eepoogh ọotoghonaan esi ịkaraph phọ anyina, ịdipho ạPol ooḅi ọnyo asiya phọ ayira ạsighe bọ olegheri ịyaar phọ Ẹnaan kụ ạgeom bọ iruom inyina.

¹⁶ Sịphe oomo phọ ạrinya phọ ọdi, ịphen kụ ịdi ọdi rạge ghan ni, mem lọ ọdi rạkaaph ekpo ọghaaph phọ ẹphen. Ọdi rạge ghan ni iniin ịgbagara ạraraar rịnya phọ ọdi, dị ạbuphe úlegheri bọ rꞌạbuphe odi bọ ịisoku phọ ronmeeghi ghan rụmhu ọghaaph phọ, ịdipho bịdi roḍighi ghan bọ ịnon ạriikpigh Ạḍinya Iigbia phọ. Ịduon phọ, pọ bịdi oko ghan muphe kụ rọḅamian rụmhu ạbidi.

¹⁷ Kụ nyina, iiḅi asiya, mịphur inyina rụru otene igbaany. Igona ni loor anyina, ọbo nyina kẹkorom ghan bọ sịphe ạḍiphaghaphagha ạdol phọ anyina emeel eḍighanaan reten amabi ạbukaraph awe.

¹⁸ Kụ ipophom ni ọnma ighirigiir rꞌolegheri ịyaar ạJizos Kraist Ọmoogh-we phọ rꞌỌpelia phọ ayira, ẹghiom ghisigh. Igbogh phọ kụ ẹrolonaan ni nyọdi nyịidipho kꞌagee-pọ! Ẹrol li ịdipho!