2 Pita 2 - Ạḍinya Iigbia

Ạbutughemia ọkpe

¹ Mem dị meten ariil ọkpe umite ni sịphe ogbo awe phọ. Kụ ịduon phọ kẹn kụ ịdi ạbutughemia ọkpe komite ni sịphe ogbo phọ anyina. Bịdi komian ni ọsighe ịtughemi amuphe ọloghom, kụ ọḅile ọparanaan Ọde-otu phọ ạphel bọ bịdi, bịn oḍighi dị ekperenom ạghelhe kameelom bịdi.

² Ghạlamo rꞌịduon phọ ni bịn, ịbadi kọdaph ni reten ipesi phọ ạbidi, kụ aweye ọtuan ịpe bụen phọ roḍighi bọ kụ ọkaaph ghan ọpuenom Eten Igey phọ.

³ Loor eboom ekpooko, bụen phọ kọgba ni iphirigba phọ ạbidi ịḅeni inyina ọwaam ghan ạsuo. Mookolobian ni ịiruen phọ ạbidi kꞌẹminighan amem oseere. Amuphe phọ ạbidi ạnmagharan ni rapogh bịdi.

⁴ Ẹnaan ị́bilenaan rụukpaany phọ ọdi ọpioman bọ, isumughi ghụn ni bịdi ooni ạnian ẹkasaghiom izime eseere ẹku ufiri okoriom ghan aḍio ịiruen phọ.

⁵ Ẹnaan ị́bilenaan ọḅel aḅirini ạbukaraph awe phọ, ạsighe ghụn ni mụum-aḍigho kụ aphiemiom. ANoa phọ ạghaaph ghan bọ mọ awe ọrol dọl aruukuan phọ, ḅịle rꞌoḍual ạbunon awe bịn kụ mạman awe dị ọdi ạphel ạsighe.

⁶ Ẹnaan imutonaan ni rạmha phọ ạSodom rꞌaGomora ephiemiom bịdi nịan, ịlo ọmaam oḍeenaan ạbukaraph awe ọdo ịdi kemitenaan aani bịdi.

⁷ Ọdi ạtophoron ni Lọt, ogey oye phọ ọpo ẹkaraph eḍighinom ịyaar abuyeelayeela awe ipesi phọ ẹeḅaghami ghan bọ, amitiom.

⁸ Ịdipho ọdi arughan bọ bịdi, aḍio etum ḍio ọdi ạmiin ghan ni, ạḅile ghan ạnaghan, ịkaraph ạraraar dị bịdi oḍighi yogh ghan kụ ẹeḅaghami ghan ịikia ologhi ogey oye phọ ọpo.

⁹ Ịphen phọ eḍeenaan mọ Ọmoogh-we phọ ạmaar ri ọtophoron ghan aweye aruukuan omitiom esi ọdegh ophogh kịrokiro, ḅịle rꞌịlo oseere ghan abuḍighinom ịkaraph phọ dọl ịminimiin okoriom ghan aḍio ịiruen phọ.

¹⁰ Ịphen phọ ẹkar ẹkpaariom bụphe mọḅitonaan bọ iilogh phọ Ẹnaan kụ rọdaph bọ ịkaraph ạruuphua amuphe phọ ạbidi. Ạbutughemia ọkpe phọ ạbuen phọ ọmoogh oḅom ẹmhu rꞌooka ghan. Rọ́logh ghan eegu bụo aghuḍuul phọ, ọḅile ghụn ni rọopu ghan bịdi.

¹¹ Rꞌạruukpaany phọ Ẹnaan ẹmoogh bọ ni ịnyaam rꞌeghuan dị epu ịpe ạbidi bịn ímighirom iigbo ịiruen itonyonom bịdi ghisigh Ọmoogh-we phọ.

¹² Kụ awe phọ ạbuen odimom ghan dọl ạruuphua, ịdipho ilhom ịnam mọ ọmar bọ oseere mọ osiphi ghan ọze phọ. Bụen phọ rotonyon ghan rạraar lọ epelom olegheri ịyaar phọ ạbidi. Ịḅoria ạroozo phọ ạbidi kepiemi ni bịdi.

¹³ Kọsighe ịminimiin kụ ọkpiom bịdi loor ịminimiin phọ bịdi ọkom bọ oseenaan bụnon. Ọḅaal ologhi ạbidi oḍighi yogh ghan egaan ịlo kẹgbaanyan rụuphua aloor phọ ạbidi. Bịdi roḍigh ghan ạagia kọloghom ọḅiph, ịdipho bịdi ịḅophan inyina olhe eḍien adulhe Ọmoogh-we phọ, ḅịle rꞌịdipho iipheeny phọ rꞌipesi phọ rẹdugh bọ esi ạbidi.

¹⁴ Ẹnon ịyaar dị ẹḅile ẹḅeeraan bịdi epu reepheeny ạnmariir ílho. Ịlo rẹgbaanyan ghan rụuphua ịkaraph phọ ạbidi ílho. Bịdi rọyapha ghan koḍighi ịdi bụo ịyal iloghi phọ komeel ḍiphil. Bịdi mọtuugha ephogh-aḍien ọmaar. Ẹnaan meruule bịdi.

¹⁵ Bịdi mọwile ẹphalaḅaal rotelhe eeḍua. Bịdi morelhe eten phọ ạBelam ọony phọ aBior arelhe bọ. ẠBelam mọ ạphomoghian ọpioghom ghan ạsipioghom kụ ọmoogh ikpoki.

¹⁶ Kụ ọtuan ịkaraph phọ ịphen phọ ọḅaam nyọdi, dị tụtu ekpom ọka ẹnam adool ạḅa ni eye kụ amirighan mọ oyil phọ kụ́ker mun idele.

¹⁷ Awe phọ ạbuen phọ, ạruunu adir dị mụum ị́moogh, ḅịle rꞌọotu dị oghim rakimom. Ẹnaan meekolobian dọl ọkikiph ufiri eseenaan bịdi.

¹⁸ Bịdi ọsighe ọghaaph elologhi rꞌopu ghan ooka ḅịle rꞌịkaraph ạruuphua iphulupul phọ kụ rọḍaam ghan we, dị ọbo mokpetenaan ni bụphe odi bọ dọl ọpioman phọ rọman.

¹⁹ Bụen phọ ghụn roguanaan ghan we okpetenaan, kụ ạri bịdi ạrebene iphieneen ạroozo loor esi dị oye raḍighi ghan ẹbene ạtorobo ịyaar lọ mẹkpar epu nyọdi.

²⁰ Awe kụ moghol ịdipho bịdi molegheri bọ Jịzos Kraist Ọmoogh-we phọ rꞌỌpelia phọ ayira kụ okpetenaan ọphuenaan aloor aḅirini phọ, kụ ọḅile omeel oḍighanaan, pọ ạdol phọ ạbidi kẹkar ẹloghori ruukuna phọ epu emiighom mọ.

²¹ Ọbo mịnighenaan ghụn bịdi lọ bịdi rꞌamem úlegheri reten aruukuan phọ epu olegheri phọ kụ ogbi ọḅitonaan ologh iigbia phọ Ẹnaan ẹlhogh bọ ẹngo bịdi.

²² Ịpe emitenaan bọ bịdi eḍeenaan mọ aḍidogh phọ agey ni mọ, “Aghoogh ạḅile ghan ni rale ịlo dị akuḅa,” ḅịle kẹn mọ, “Owur mụum ophoropo ạḅile ghan ni rakila ẹenir.”