2 Krọnikuls 9 - Ạḍinya Iigbia

Ukueni-ạnir ọpo ạda bọ Siba asi Jeruselem

¹ Mem dị ukueni-ạnir ọpo ạda bọ Siba ạnaghan bọ oḍu Sọlomon ọdaam mọ phọ, kụ aḅetenu erelhe, ạghi ẹpe Jeruselem ọdeghogh ọdi opuru yogh ịminighan asipuru. Ọdi ạphamam ḍiboom aḍita awe orom ghan asidom, kụ ạphamam sịkamel dị erool rạraar ịma eḍu ọsaam ịisa, ịbekulari, rꞌẹminighan eekpopha agol. Mem dị ạnir phọ ạghi ạteeny Sọlomon, kụ aapuru yogh nyọdi oomo asipuru phọ ịpe edi bọ sịphe ologhi phọ ọdi,

² ọdi ạphanyanaan oomo phọ ịne; ẹlo ẹkparanaan nyọdi ọghaaph ọogelion ị́tol.

³ Kụ mem dị ạnir phọ ạda bọ Siba ạmiin bọ oomo olegheri-ịyaar phọ ạSolomon, rꞌotu ọdaam mọ ọdi ạlogh bọ,

⁴ rꞌeḍien dị ọḅamanaan ịdaabili phọ ọdi, rꞌaruutu ạbuo iiḍighi phọ ọdi, rꞌịdi osereghi we iiḍighi phọ ọdi, rꞌiinmenan phọ ạbidi ḅịle rꞌạbumeleghian phọ ọdi, rꞌạraraar aghuḍum dị ọdi aḍighi yogh sịphe Otu Ịiḅereghi phọ, ịpher ạnir phọ kụ ólhegheri mun ịyaar ọghaaph.

⁵ Kụ ạnir phọ ạḅeni ọdaam mọ mọ, “Ịdi mị ạnaghan ẹpe eelhe ạmi ịlo ạna rꞌolegheri ịyaar phọ ạna íḍighi ọkpe.

⁶ Mị úmeeraam ịdi bịdi ụḅeni ịmi tụtu mị aru ạmiin rꞌaloor. Mị kọ̋naghan ghan rꞌoolemi-odi ịlo olegheri-ịyaar ạna. Nạ ạmoogh olegheri-ịyaar apu ịdi awe ọghaaph.

⁷ Pọ eeghe ịma amaazuan dị awe dị odianan rꞌạna ọmoogh, dị oomo amem kụ odianan ghan rꞌạna ọnaghan ikpo ọnhu olegheri-ịyaar ạna!

⁸ Ạḍiseph ẹrolonaan Ọmoogh-we Ẹnaan phọ ạna ọpo ạmoogh bọ ḍịḅeeraan esi ạna, kụ ạrolomi bọ nyịna ạgada ọda awe esi aḍien ọdi. Loor esi dị ọdi ạpomoghian Ịzirel awe ọdi kụ ạwa mọ bịdi ọrol kꞌagee-pọ, ọdi maḍighi nyịna ọdaam ạbidi oogboom ịiruen rꞌaruukuan.”

⁹ Ạnir phọ ạngo ni Sọlomon Ọdaam mọ ruunmo dị ọdi arumom: gol dị epel inya ọonir igbogh ịtoom ẹemor rꞌiboom ạraraar ịma eḍu ọsaam ịisa, rꞌịbadibadi ịbekulari. Kꞌekulha kọ̋miin ghan rạraar ịma eḍu ọsaam ịisa dị ẹnighe ịdipho ịpe ukueni-ạnir phọ ạda bọ Siba ạngo bọ Sọlomon ọdaam mọ.

¹⁰ (Awe aHiram ọdaam mọ rꞌạbuo ạSolomon ọdaam mọ, bụphe ọḍua bọ kꞌOfir kụ ọpham gol, ụḅile ni ọpham orumom ụphogh, rꞌịbekulari.

¹¹ ẠSolomon ạsighe ni oreeny phọ ạkaaghiom ẹedaneen Otu Ịiḅereghi phọ rꞌotu ọdaam mọ ọdi, ạḅile ạlemom rẹne rꞌipulaam ạngo we areephegh phọ. Kꞌekulha kọ̋miin ghan ịyaar dị ẹrol ịdipho sịphe ade phọ aJuda.)

¹² ẠSolomon ọdaam mọ ạngo ni ukueni-ạnir ọpo ạda bọ Siba tọrobo ịyaar lọ ọdi ạlhom. Ịphen phọ ụḅaram rạraar dị ạSolomon ọdaam mọ aanmenenom ruunmo phọ ạnir phọ aruom bọ nyọdi. Kụ ạnir phọ rꞌaḍita awe ọdaph bọ nyọdi oru oḅula ẹpe eelhe aSiba.

Ẹelha ạSolomon ọdaam mọ

¹³ Tọrobo ạlha ạSolomon ọdaam mọ ạar ghan ẹnum kụ ílho ịyaldi rꞌịraar ọonir igbogh ịtoom ẹemor agol,

¹⁴ kụ ọḅaram iisogh dị abumuul ḍighi rꞌạbuo aruphua aḍighi phọ osogh ghan. Ạbudaam Arebia rꞌạbuphe ropogh bọ rịikpigh phọ uruom aani kẹn ni nyọdi silva rꞌagol.

¹⁵ ẠSolomon ạlhem ịyal okuron igbogh ịsuaram, tọrobo ukpoghom ịdi ẹwa ọman oḍual igbogh ịtoom ẹemor agol dị ootughuḍi,

¹⁶ rꞌịraar okuron ịbam ịsuaram, tọrobo ukpoghom ịdi ẹwa ọman ịraar igbogh ịtoom ẹemor agol dị ootughuḍi. Ọdi ạto mọ ọsighe oomo phọ ạbidi osereghi ologhi ogbotu Otu Ẹekpua phọ ạLebanon.

¹⁷ Ọdaam mọ ạḅile kẹn ạto mọ ọlhem ogbogh ạgada ọdaam ẹmha. Ḍiniin ạḍighaagh uḍighinom oḍu ọoma, kụ ḍịeri phọ okpoghom ogey agol.

¹⁸ Odiiny ẹedaneen ọgbatan kụ ọteeny ạgada ọdaam ẹmha phọ, kụ uḍighi esi ọkpasi ạrada sịphe aruwol phọ dị okpoghom gol. Ạgada phọ ạmoogh ni esi ọḅam ạḍighaagh ekeeny rꞌelhiom, kụ ạnam-dịka dị ọka ẹrol ekeeny rꞌelhiom.

¹⁹ Ḍioph rꞌịyal ịkaaneen ạnam-dịka kụ ịrol sịphe kotelhe bọ ọsiiny, eniin ẹrol elhiom, ẹnon ẹrol ekeeny esi ọdagh phọ. Ạgada ọdaam ẹmha dị ạrol ịduon kọ̋rol ghan ẹnon eelhe.

²⁰ Oomo ạsimogo ạSolomon ọdaam mọ uḍighinom gol, ḅịle rꞌoomo ạraraar arukumuan ologhi Ogbotu Ẹekpua phọ ạLebanon. Silva úpogh mọ eboom ịyaar mem mọ ạSolomon.

²¹ Ọdi ạmoogh ni ḍita arughuugh dị ẹḅaram ịpe aHiram ọdaam mọ ẹzoghi ghan ẹpe Tasis kụ erigheleghu. Tọrobo ịraar ạsia arughuugh phọ ịphen rẹsighe ghan ni gol, silva, rạphaal ọoma, rꞌạrepeleeny keruom ọdaam mọ.

²² Ẹelha rꞌolegheri ịyaar ạSolomon ọdaam mọ ipu ni ẹelha rꞌolegheri ịyaar oomo ạbudaam ịsien aḅirini phọ.

²³ Oomo ạbidi ụteeny ghan nyọdi ọnaghan ologhi phọ Ẹnaan ẹngo bọ nyọdi.

²⁴ Tọrobo ọnyo ạbidi aruom Sọlomon ruunmo — rạraar dị ọlemom silva rꞌagol, igbogh ạrusuoma, rẹenema ẹgham, rạraar ịma eḍu ọsaam ịisa, ịnam-ạsu, rꞌịnam adool. Ịphen phọ imite ghan lhạ etum lhạ.

²⁵ ẠSolomon ọdaam mọ ạḅile ni adoghoḍi inya ọonir arophoghoghoony osereghi ghan rughuugh ẹgham rꞌạrusu. Ọdi ạmoogh kẹn ni ḍioph rꞌịyal ọonir ạrusu ẹgham. Iniin ọdi asereghi ẹpe Jeruselem, ịpheri phọ ẹrologhu rạmha kịrokiro.

²⁶ Ọdi bịn kụ ogbogh ọdaam dị ạda oomo eelhe dị emiigh Ọphiiny aYufratis kụ esi Filistia rꞌọku Ijipt.

²⁷ Mem mọ ọdi ạda bọ, asilva aatura sịphe Jeruselem mụdi ịkpingba, kụ ọsaga aapaany mụdi oopho oreeny ạsikamor.

²⁸ ẠSolomon agho ghan ịnam-ạsu ẹpe Musri rꞌoomo ịnon areelhe.

Ookpomoghi ọda phọ ạSolomon

²⁹ Ịpheri phọ ạraghaaph ạSolomon kꞌemiighom kꞌekureriom ọge ni sịphe ạḍinya Iiḍighi aNetan Oyil phọ, sịphe Ịmiin Ahaija ọpo aSailo, rꞌịsiphe ạḍinya Ịmiin Ido Oyil phọ, dị egbolomaam aani ọda phọ aJeroboam ọdaam mọ Ịzirel.

³⁰ Ạsia phọ ạSolomon ạda bọ Jeruselem aphogh bọ oomo Ịzirel ẹman bọ inyaḍi ạsia.

³¹ Ọdi amugh kụ oḍi nyọdi Ẹmha aDevid, kụ aRehoboam ọony phọ ọdi ạsighe dọl phọ ọdi ạda.