2 Krọnikuls 8 - Ạḍinya Iigbia

Iiḍighi dị ạSolomon aḍighi

¹ Ịsighe Sọlomon ọdaam mọ ịyaldi ạsia ọlogh Otu Ịiḅereghi Ọmoogh-we phọ rꞌotu ọdaam mọ ọdi.

² Ọdi ạḅile ni aselemi yogh rạmha phọ aHiram ọdaam mọ mạngo bọ nyọdi, kụ ạḅeni we Ịzirel mọ ọghi orugh sịphe.

³ Ọdi ạmooghom eelhe ạHamat rꞌaZoba

⁴ kụ ạkparami ẹmha phọ aPalmura sịphe ẹdala phọ. Ọdi aselemi oomo ạramha eelhe ạHamat dị ediighi riisi ooko ghan aruphua.

⁵ ẠSolomon ạḅile ni aselemi rạmha phọ ịphen: Bẹt Horon Ẹsiinyom rꞌạBet Horon Esoorom (rạmha dị ạkparami rụnhu-aḍibuo dị okikima),

⁶ ẹmha aBaalat, oomo ạramha phọ ọdi aako ghan bọ ruphua phọ rꞌạramha phọ ịnam-ạsu rꞌarughuugh-ẹgham mọ ọdi ẹrologhu ghan bọ. Ịdipho ọdi ạatughian ghan bọ, ọdi adoghoḍi ni ruutu sịphe Jeruselem, sịphe Lẹbanon rꞌoomo ade phọ ọdi ạda bọ.

^7-8 Ọdi ạkpaariom oḍighi iiḍighi nmụny ạnmuny awe aKenan bụphe awe Ịzirel ụ́ze bọ mem mọ bịdi ọsighe bọ de phọ. Bụen kụ ụḅaraghiom bụo ạHitait, Ạmorait, Pẹrezait, Hivait rꞌaJebusait, bụphe ạnmuny ạnmuny ạbidi odi bọ rẹbene kꞌaḍio arodon.

⁹ We Ịzirel ụ́kpaariom oḍighi iiḍighi; bịdi uḍighi bụo ẹgham, bụo ịtooghi, ruwo ẹmhu arughuugh ẹgham rꞌạbuo oghiilom ghan ạrusu.

¹⁰ Ọrol bọ 250 awe dị ophogh ghan bụphe ọkpaariom bọ ọloghoḍi aruutu riisi kịrokiro.

¹¹ ẠSolomon ạsighe ni ạnir ọdi, ọnyani ọdaam mọ Ijipt, sịphe ẹmha phọ aDevid, asiemi otu dị ọdi ạlhoghonaan nyọdi. Ọdi ạḅem, “Ọdi kụ́tol otu aDevid ọdaam mọ Ịzirel loor esi dị tọrobo esi lọ moseere ghan Igbe Ịyo phọ, pọ esi iigbia.”

¹² ẠSolomon aḍighi ni rịkia ạngo Ọmoogh-we phọ sịphe enmeny phọ ọdi ạkan bọ risigh Otu Ịiḅereghi phọ.

¹³ Ọdi ạphinyon ni rịkia oguom ạnian dị emeeraam Ologh phọ aMozis ịlo ạtorobo aḍio iigbia: riiḍio ophooghian, ạrayaal omoom ụnwanyu, rꞌịraar ạrayaal ạlha etum lhạ phọ: ẹyaal ạbred dị yist ụ́logh, ẹyaal ibugha rꞌẹyaal arubughotu.

¹⁴ Ọdaphan iilogh phọ aDevid ọde phọ ọdi adoghoḍi bọ, ọdi asereghi ni iiḍighi ariil ạrikia phọ rꞌạbuo aLivai ḍio ḍio ḍio dị ọloghonaan ghan ḍịghaagh riil ạrikia phọ ọmoor ghan ạsuor rꞌoḍighi ghan oḍighi ạbidi. Ọdi ạḅile ni asereghi bụo okori ghan Otu Ịiḅereghi phọ ẹkpigh rꞌẹkpigh oḍighi ghan oḍighi ạbidi ḍio ḍio ḍio tọrobo ọnhu-aḍibuo, ọdaphan ịto phọ aDevid, oye kꞌẸnaan phọ.

¹⁵ Ịpe aDevid mạḅeni bọ riil ạrikia phọ rꞌạbuo aLivai phọ dị egbolomaam riisi ooko ghan aruphua rꞌịnon ạraraar, ụtuugh ni oḍighi.

¹⁶ Mem mọ ạmuen oomo iiḍighi lọ ạSolomon amiigh moḍighi ọman. Kꞌephighiom mọ kụ esi ekureriom mọ, oomo iiḍighi Otu Ịiḅereghi Ọmoogh-we phọ ịnighe ni.

¹⁷ Kụ ạSolomon ạghi ẹpe Ezion Geber rꞌElat, arisiḍia ọgbal ogbogh Ọphiiny Akaba ẹpe de Idom.

¹⁸ AHiram ọdaam mọ ạghiom nyọdi rughuugh dị bụo ịtooghi phọ ọdi ọda kụ abugbogh awe ẹmaar ọzoghiom. Bịdi ọḅophan rꞌạbuo ịtooghi phọ ạSolomon kụ osi ẹpe de Ofir kụ ọpham oruomaan Sọlomon gol dị epel 15,000 igbogh ịtoom ẹemor.