2 Krọnikuls 30 - Ạḍinya Iigbia

Ookolobian ịlo ẹyaal ọphel-otene phọ

^1-3 Awe phọ kőrue olhe ẹyaal ọphel-otene phọ ọḅel ụnwanyu phọ, mem mọ ẹkpianaan bọ, loor esi dị ọnhu ariil ạrikia dị mọserere rꞌawe dị mookpomoghan ẹpe Jeruselem ụ́kasian. Loor ịphen phọ, ạHezekaya ọdaam mọ rꞌạbuo iiḍighi ọdi rꞌawe phọ aJeruselem ụḅoph ni ọnhu olhe ẹyaal phọ ụnwanyu dị amuneniom ịyal, kụ ọdaam mọ arom dom ạghiom we phọ Ịzirel rꞌaJuda. Ọdi amiighe loor kụ ạge rịnya ạghiom rughunughun Ifraim rꞌạManase, ạamaghagh oru ịsiphe Otu Ịiḅereghi phọ ẹpe Jeruselem olhe ẹyaal ọphel-otene phọ oghueniom Ẹnaan phọ Ịzirel Ọmoogh-we phọ.

⁴ Igbiighi phọ ạbidi ịḅeeraan ni ọdaam mọ rꞌawe phọ,

⁵ kụ bịdi oogbologh oomo awe Ịzirel kꞌẹpe Dạn ạga ephunom mọ kụ esi Beersheba ẹpe esoorom mọ, mọ ookpomoghan eniin esi sịphe Jeruselem kụ ọdaphan Ologh phọ olhe ẹyaal ọphel-otene phọ, sita dị kꞌekulha kọ̋miin ghan kụ uru.

⁶ Abutelhedom ụdaphan ni ịto ọdaam mọ rꞌawe iiḍighi phọ ọdi ọwalala oomo aJuda rꞌỊzirel kụ ọmagham bụen: “Weye Ịzirel, nyina mekpetenaan dọl awe Asiria sịen ade phọ. Nyịidipho iḅula eru esi Ọmoogh-we Ẹnaan phọ Ebraham, Ạizik rꞌạJekob, kụ ọdi kaḅula ni esi anyina.

⁷ Kẹ́kigh ịdipho ạburude ạburude anyina rꞌạbueri phọ awe Ịzirel úmeelom bọ Ọmoogh-we Ẹnaan phọ ạbidi. Ịduon nạ rạmiin bọ, ọdi ạliom ni bịdi agey.

⁸ Kẹ́ḅaar ẹmhu ịdipho ạbidi, kụ ịnaghanan Ọmoogh-we phọ. Itu sịphe Otu Ịiḅereghi phọ ẹpe Jeruselem, esi phọ Ọmoogh-we Ẹnaan phọ anyina maseeriom bọ ruukuan kꞌagee-pọ, kụ ooseeny nyọdi bịn ọdi kạ́mooghom mun nịiniin inyina ophin ologhi.

⁹ Eḍighi ịyaar dị nyina eḅula esi Ọmoogh-we phọ, bịn bụphe mọsighiogh bọ siya phọ anyina ọḍuanam kọmoogh ọnma ighirigiir ọngo bịdi kụ omeera bịdi otigheel. Ọmoogh-we Ẹnaan phọ anyina ẹmoogh ọnma ighirigiir rꞌigbiririph, kụ eḍighi ịyaar lọ nyina eḅula esi ọdi, ọdi kịsighe ni inyina.”

¹⁰ Abutelhedom mọ ụghi ni tọrobo ẹmha sịphe areelhe phọ arughunughun phọ Ifraim rꞌạManase, kụ ọghi kẹn ẹpe ephunom mọ osi de phọ ạZebiulon, kụ awe phọ ọmilogh ọḅile ọgilaam bịdi.

¹¹ Buniin ạbuo arughunughun Ạser, Mạnase rꞌạZebiulon bịn usooromi ni loor oru ẹpe Jeruselem.

¹² Ẹnaan ịrol li oḍighi ẹpe Juda kụ ạḅophoghi we phọ esi igbiighi ạbidi ọdaph ịtooghi ọdi ọdaphan ịto ọdaam mọ rꞌawe iiḍighi phọ ọdi.

Olhe ẹyaal ọphel-otene

¹³ Aḍigbogh aḍita awe uukpomoghan ni ẹpe Jeruselem ụnwanyu dị amuneniom ịyal olhe ẹyaal ạbred dị yist ụ́logh.

¹⁴ Bịdi ọsighiogh oomo arenmeny phọ ịpe oḍighinom bọ rịkia phọ sịphe Jeruselem ọḅile bọ ọsu ghan ịnsens kụ osumughu eḍiiny phọ ạKidron.

¹⁵ Kụ ḍio dị emuneniom ḍioph rꞌinya, bịdi ụze ni nmụny iyool-ịga ịlo ẹkia ọphel-otene phọ. Umugholoor asiph ni riil ạrikia phọ rꞌạbuo aLivai phọ dị ụ́serere kụ bịdi ọḅogh siloor ạbidi ọngo Ọmoogh-we kụ ogbi oḍighi rịkia oguom ạnian oḍigh ologhi Otu Ịiḅereghi phọ.

¹⁶ Bịdi ọrologhu riisi ạbidi sịphe Otu Ịiḅereghi phọ ọdaphan oromoghiom ịsiphe Ologh phọ aMozis, oye Ẹnaan phọ. Ạbuo aLivai ụngo ịḅaal ẹkia phọ riil ạrikia phọ, dị ọsaraghi ạnyu enmeny phọ.

¹⁷ Loor esi dị ogbogh opol awe phọ ụ́serere, bịdi ụ́ze aani iyool-ịga ọphel otene phọ, kụ ạbuo aLivai phọ kụ ụzianaan ghan bịdi kụ ọḅogh nmụny iyool-ịga phọ ọngo Ọmoogh-we phọ.

¹⁸ Ịdi etum sịphe, ịbadi ạbuphe ọḍua bọ kꞌarughunughun phọ Ifraim, Mạnase, Ịsaka, rꞌạZebiulon kőselemian siloor kụ role ghan ẹyaal ọphel otene phọ ịdi ị́kpe. ẠHezekaya ọdaam mọ ạaḅereghinaan bịdi ịduon:

¹⁹ “Ọmoogh-we Ẹnaan ạburude ạburude ayoor, esi ọnma ighirigiir phọ ạna, sạr ạwilenaan oomo ạbuphe rooseeny ghan bọ nyịna rꞌoomo ologhi ạbidi, ghạlamo ịdipho bịdi ụ́serere bọ.”

²⁰ Ọmoogh-we phọ ạphagharanaan ni ịiḅereghi phọ ạHezekaya; ọdi ạsar ri ạwilenaan we phọ bịn bịdi ịkaraph óḍighi.

²¹ Esi oḍual aḍughul-otu, awe phọ ookpomoghan bọ ẹpe Jeruselem olhe ẹyaal ạbred phọ yist ụ́logh bọ rꞌọḅaal ologhi, kụ aḍio etum ḍio ạbuo aLivai rꞌariil ạrikia phọ oboom ghan Ọmoogh-we phọ rꞌoomo ịnyaam ạbidi.

²² ẠHezekaya ạseph ni bụo aLivai esi ẹmaar ạbidi ọphamaghan amem ooseeny Ọmoogh-we phọ. Mem dị oḍual aḍughul-otu meten dị bịdi oḍighi rịkia ọsephom Ọmoogh-we Ẹnaan ạburude ạburude phọ ạbidi,

Ẹyaal dị emuneniom ịyal

²³ oomo ạbidi ụḅile ni ọḅem mọ oboh iboh ịnon oḍual asiḍughul-otu, kụ bịdi olhe ẹyaal phọ rꞌọḅaal ologhi.

²⁴ ẠHezekaya ạngo ni oniin ọonir ilephiri ạsinam rꞌoḍual ọonir iyool-ịga ịlo awe phọ kọze ọba, kụ awe iiḍighi phọ ọngo ọloghom ịnon oniin ọonir ilephiri ạsinam rꞌiḍioph ọonir iyool-ịga. Aḍiboom aḍita ariil ạrikia ụmoogh kẹn ni oselemian asiloor phọ.

²⁵ Kụ tọrobo oye ạmoogh ọḅaal ologhi — awe aJuda, ariil ạrikia, ạbuo aLivai, awe phọ ọḍua bọ ạga ephunom mọ kụ oru, rꞌaruuruen phọ odi ghan bọ Ịzirel rꞌaJuda kꞌamem dị mebia.

²⁶ Ẹmha phọ aJeruselem, iboh kụ imuza esi awe loor esi dị ịyaar dị ẹrol ịduon ke̋mite ghan kꞌamem ạSolomon ọdaam mọ ọony phọ aDevid.

²⁷ Ạbupinyon phọ rꞌạbuo aLivai phọ ọlom ḍịseph Ọmoogh-we phọ ọteeny awe phọ. Ẹpe ạdol phọ ọdi kꞌạke, Ẹnaan ịnaghan ni ịiḅereghi phọ ạbidi kụ ẹsighe bịdi.