2 Krọnikuls 27 - Ạḍinya Iigbia

AJotam ọdaam mọ aJuda

¹ AJotam aḍighi ọdaam mem dị ọdi ạman 25 ạsia, kụ ạda sịphe Jeruselem ḍioph rꞌodiiny ạsia. Onhiin ọdi ughol mọ ạJerusa ọnyani ạZedok.

² Kụ ọdi aḍighi ghan ịdi ẹḅeeraan Ọmoogh-we phọ, ạdaph ịpe ọde phọ ọdi aḍighi ghan bọ, kụ ịyaar dị ọdi ạgbatanaan ọde ọdi, ọdi ósoor ologh ọsu ịnsens sịphe Otu Ịiḅereghi phọ. Kụ ọlo awe phọ ụpioman ghan ni.

³ AJotam kụ agim bọ ọnhu-aḍibuo ạga ephunom Otu Ịiḅereghi phọ, kụ aḍighinom oḍighi dị ạbugh iikpe oghoony ẹmha phọ ḍịghaagh ẹpe Jeruselem oghol bọ mọ Ofel.

⁴ Ẹpe ạraaḅaraph phọ aJuda ọdi ạloghoḍi rạmha kụ sịphe ạruukpua ọdi akpeki riisi dị ephophogh iboom.

⁵ Ọdi eenan ọdaam Amon rꞌawe ẹgham ọdi kụ ạkpar apu bịdi. Kụ ọdi ạkpaariom Amonait phọ mọ osogh ghan iisogh phọ ịphen: 3,400 igbogh ịtoom ẹemor asilva, 1,000 ọkaraghi igbogh ịtoom ẹemor ịbiakpa, ra 1,000 ọkaraghi igbogh ịtoom ẹemor abali.

⁶ AJotam ạmoogh ịikpo loor esi dị ọdi ạnaghanan Ọmoogh-we Ẹnaan phọ ọdi.

⁷ Iiḍighi phọ ịpe esugha bọ aJotam aḍighi yogh bọ, ạraagham ọdi rꞌịtooghi ọdi, ọsighe ni ịphen ọge sịphe ạḍinya phọ ịpe emiteghu bọ mem ạbudaam mọ Ịzirel rꞌaJuda.

⁸ AJotam ạman 25 ạsia kụ ọdi aḍighi ọdaam, kụ ọdi ạda sịphe Jeruselem ḍioph rꞌodiiny ạsia.

⁹ Ọdi amugh kụ oḍi nyọdi sịphe Ẹmha aDevid kụ Ehaz ọony ọdi kụ ạsighe ạgada ọdaam mọ ọdi.