2 Krọnikuls 23 - Ạḍinya Iigbia

Aḍuugh phọ Atalaya

¹ Rẹman odiiny ạsia kụ ạJehoyada oyil ạrikia phọ ạatughian mọ mẹteeny oḍighi ịlo ẹkpe. Ọdi aḍigh ooḍikuan rꞌoogh ikpolom awe ẹgham: Azaria ọony aJeroham, Ịsmael ọony aJehohanan, Azaria ọony Obed, Maaseya ọony Adaya, rꞌElisafat ọony Zikri.

² Bịdi ụghi okitonom oomo igbogh ạramha phọ aJuda kụ ọpham oḅulolom Jeruselem bụo aLivai rꞌoomo aruwo ẹmhu aropolo phọ.

³ Oomo phọ ạbidi uukpomoghan Otu Ịiḅereghi phọ, kụ ịsiphe kụ ẹdi bịdi oghiran ịyo rꞌaJoas ọony ọdaam mọ. ẠJehoyada ạḅeni bịdi, “Pọono sịen ọony ọdaam mọ amugh bọ! Ọdi kụ ọdaam mọ nyịidipho, ịdipho Ọmoogh-we phọ aguanaan bọ Devid ọdaam mọ mọ ạnmuny ạnmuny ọdi kụ kọda ghan.

⁴ Ịphen kụ ịdi yira koḍighi. Mem dị ariil ạrikia rꞌạbuo aLivai oru oḍighi ḍio ophooghian phọ, muniin abin dị odi bịdi ịraar, kokori Otu Ịiḅereghi,

⁵ mụnon kokori otu ọdaam mọ, mụeri phọ kokori ọnhu-aḍibuo phọ oghol bọ mọ Ọnhu-aḍibuo Ephighiom mọ. Oomo awe phọ kookpomoghan egbogh erugh Otu Ịiḅereghi.

⁶ Oye ólho dị kaḍigh Otu Ịiḅereghi phọ emuton riil ạrikia rꞌạbuo aLivai lọ odi oḍighi. Bịdi kotue ni oḍigh loor esi dị bịdi awe iigbia, kụ bụeri phọ awe phọ kọtol erugh, ọdaphan ịtooghi Ọmoogh-we phọ.

⁷ Ạbuo aLivai phọ kọmeregha kụ okoom ọdaam mọ rꞌarolhool ẹgham mọ ạbidi, kụ ọtolan rꞌọdaam mọ tọrobo ekpisi lọ rạki. Oye lọ ạḅem mọ ọno kaḍigh Otu Ịiḅereghi phọ, pọ kokiigh ni.”

⁸ Ạbuo aLivai rꞌawe aJuda ụdaph ni ịpe ạJehoyada ạto bọ ạḅeni bịdi. Ụ́ḅeni we oḍighi phọ mọ ogheleghu ḍio ophooghian phọ. Ịduon phọ, aruwo ẹmhu phọ ụmoogh we dị ọmanam, bụdi rotu iiḍighi rꞌạbudi rokeel.

⁹ ẠJehoyada ạngo ruwo ẹmhu phọ ịsoph rꞌịsuaram aDevid ọdaam mọ, ịpe oseere bọ ooko ghan sịphe Otu Ịiḅereghi.

¹⁰ Ọdi ạmeremi yogh we phọ akitonom oomo arisigh Otu Ịiḅereghi phọ, rꞌarolhool ẹgham dị ọkporion ọbo ịyaar kẹḅogh ghan bọ ọdaam mọ.

¹¹ Pọ kụ amem dị ạJehoyada ạpham Joas amitiom, ạḅam eghoony ọdaam mọ ẹmhu ọdi, kụ ạngo nyọdi ḍịnya iilogh ịlo ọdaam awe. Ịduon phọ kụ ẹdi oḍighi nyọdi ọdaam. ẠJehoyada oyil ạrikia phọ rꞌạnmuny ọdi ogbul elho ẹmhu aJoas, kụ oomo awe ọlooghi ọghiom ạnyu, “Ighiph ẹpham orum ọdaam mọ!”

¹² Mem dị Atalaya ạnaghan bọ ọyugh rꞌịlooghi phọ, ọdi aagborion ni aḍigh Otu Ịiḅereghi phọ, sịphe awe phọ ookpomoghan bọ.

¹³ Sịphe eḍighom Otu Ịiḅereghi phọ kụ ẹdi ọdi ạmiin omoom ọdaam mọ dị ạmeera esi phọ oseenaan bọ ọdaam mọ kụ abugbogh awe ẹgham rꞌạbuo ophula ạrukuodu okoom. Oomo awe robo ghan iboh kụ ropula ghan rụkuodu, kụ ạroko sụor Otu Ịiḅereghi phọ rꞌiitia ạbidi oḍiemiom rephegh phọ. Kụ ukueni-ạnir ạphanyi rukpe ọdi rꞌophin ologhi kụ ạlho mọ, “Areekeleghian. Areekeleghian.”

¹⁴ ẠJehoyada ọ́wa dị kokiigh Atalaya esi lọ etuman Otu Ịiḅereghi phọ, kụ ọdi ạmagh amitenom bugbogh awe ẹgham mọ kụ ạḅem mọ, “Ịsighe nyọdi ẹḍuanam igbo ạsiadam ạbuo okori phọ kụ eghiigh tọrobo oye lọ aru ọsighe ọdi ọḍuanam.”

¹⁵ Kụ bịdi oziton ạnir phọ, ọsighe nyọdi ọghimom otu ọdaam mọ kụ oghiigh sịphe Ọnhu-aḍibuo Ịnam-ạsu phọ.

ẠJehoyada ạnighemi rạraar

¹⁶ ẠJehoyada ạmagh ni Joas ọdaam mọ rꞌawe phọ ọḅaran ọdi oghiran ịyo, mọ bụno koḍighi we Ọmoogh-we phọ.

¹⁷ Kụ oomo ạbidi ogbi ọghi oḍigh sịphe otu phọ aBaal kụ oḅonyon olhereghi. Bịdi ụphueghi ni enmeny ạrikia phọ rꞌịkaaneen ạrumugh phọ ẹrol bọ sịphe, kụ oghiigh Matan oyil ạrikia phọ aBaal sịphe risigh arenmeny phọ.

¹⁸ ẠJehoyada aseere riil ạrikia phọ rꞌạbuo aLivai ophogh ghan iiḍighi Otu Ịiḅereghi phọ. Iiḍighi phọ ịphen aDevid ọdaam mọ kụ ạḅogh bọ ạngo bịdi: ọsu ghan ạrikia lọ ọngo Ọmoogh-we phọ, ọdaphan Ologh phọ aMozis, ḅịle rꞌogbeelom ghan adom Ẹnaan rꞌạsuor rꞌarephegh.

¹⁹ ẠJehoyada ạḅile kẹn ni aseere bukoriom dị ọmeregha rụnhu-aḍibuo, ẹlo okikima bụlo ọopuan siloor oḍigh Otu Ịiḅereghi phọ.

²⁰ Abugbogh awe ẹgham mọ, ikpolom awe ẹmha phọ, bụo iiḍighi phọ rꞌoomo ạbueri phọ awe phọ uḍighan ḍịkool rꞌạJehoyada orelhiom ọdaam mọ omitiom sịphe Otu Ịiḅereghi phọ ọghimom otu ọdaam mọ. Bịdi ụḍua ọkar esomonan kụ oḍigh kụ ọdaam mọ ạrolom ạgada ọdaam mọ ọdi.

²¹ Oomo awe phọ ụmoogh ni iboom iboh, kụ ẹmha phọ enamian nyịidipho moghiigh bọ Atalaya.