2 Krọnikuls 20 - Ạḍinya Iigbia

Otuphiom ẹgham Idom

¹ Íbia bịn awe ẹgham ạMoab rꞌAmon, rꞌawe dị rꞌạbidi ọḅoph aMeunait phọ, ozuom Juda.

² Buniin abutelhedom uru ni ọḅeni Jẹhosafat ọdaam mọ mọ, “Aḍigbogh aḍita ạbuo ẹpe Idom mokiton ḍịeri phọ ạga Ọphiiny-Ạla phọ rotu ozuom ạna. Bịdi mọmooghom Hazazon Tạmar.” (Ḍịen ạḍinon aḍien En Gedi.)

³ ẠJehosafat ạmoogh oghiilaan kụ ạaḅereghi Ọmoogh-we phọ mọ arelhiom, kụ agbi ọto mọ ọkaagh ẹḍogh oomo eelhe phọ.

⁴ Oomo ạramha aJuda, awe ọḍua kụ oogborion ọghi Jeruselem ọlom Ọmoogh-we phọ mọ arelhiom

⁵ kụ bịdi rꞌawe phọ aJeruselem ookpomoghan omoom ogiga Otu Ịiḅereghi phọ. ẠJehosafat ọdaam mọ ạghi kụ ạmeera risigh ạbidi

⁶ kụ ạaḅereghi ạghiom ạnyu mọ, “Ọmoogh-we Ẹnaan ạburude ạburude phọ ayoor, nạ ạda kꞌạke kụ rapogh oomo areelhe aḅirini phọ. Nạ ạmoogh ịikpo kụ aḍighi ogbogh, kụ oye kámeera egbodo ạna.

⁷ Nạ Ẹnaan phọ ayoor. Mem mọ awe phọ ạna Ịzirel oru bọ sịen ade phọ ạḍien, nạ uphorogh we phọ ọrol ghan bọ kụ ạngo de phọ ẹemara ẹemara Ebraham ọyaghiri ạna mọ eḍighi ẹlo ạbidi kꞌagee-pọ.

⁸ Bịdi mọrol sịen kụ mọlhogh otu ịiḅereghi oghueniom ạna.

⁹ Bịdi olegheri mọ eḍighi ịyaar dị igbogh ịiḅaghami esoor ọliom ạbidi — ẹgham, mꞌẹkaraph ẹzegh mꞌịgbakuro — pọ bịdi kotu ọmeera risigh Otu Ịiḅereghi phọ ọphon sịphe rooseeny ghan bọ nyịna. Bịdi kọoḅereghi ophoghom nyịna okol ịiḅaghami phọ ạbidi, kụ nạ kạnaghanan bịdi kụ ạtagharan bịdi.

¹⁰ “Nyịidipho awe phọ Amon, ạMoab rꞌIdom moru uzuom iyoor ẹgham. Mem mọ ạburude ạburude ayoor omite bọ ẹpe Ijipt, nạ ómeera bịdi oḍigh rere phọ ịpe, kụ ạburude ạburude phọ ayoor ọghi okitonom kụ úpiemi.

¹¹ Ịduon kụ ẹdi bịdi ruḅulemian iyoor — bịdi moru ophorogh ayoor omiteghom sịphe ade phọ nạ ụngo bọ iyoor.

¹² Nạ kụ Ẹnaan ayoor! Lịom bịdi, loor esi dị ọloghonaan ạḍighaagh iyoor úlhoonaan esi dị aḍiboom aḍita awe dị oleeny ịduon kụ ruphorogh iyoor. Yoor úlegheri ịlo oḍighi, kụ yoor rophogh nyịna ọmoogh ạpeleeny.”

¹³ Oomo awe aJuda rꞌạnmariir rꞌịbam ạnmuny ạbidi ụmeregha sịphe Otu Ịiḅereghi phọ.

¹⁴ Uwaloor Ọmoogh-we phọ asoorom loor oniin ọnyo aLivait dị ạrolom ologhi aḍita phọ. Ḍien ọdi ughol mọ ạJahaziel ọony ạZekaraya; ọdi ọnyo ọto Asaf kụ ạḍua kꞌAsaf kụ aru ạdaphan Matanaya, Jẹyel, rꞌaBenaya.

¹⁵ Kụ ạJahaziel ạḅem mọ, “Nạ ogbogh ọde rꞌoomo anyina awe phọ aJuda rꞌaJeruselem, ịnaghan. Ọmoogh-we phọ ạḅem mọ kẹ́moogh ịyal iloghi ḅịle kẹ́moogh oghiilaan eenan aḍiboom aḍita awe ẹgham mọ ạbuen. Ẹgham mọ edi esi Ẹnaan, kési anyina.

¹⁶ Izuom bịdi iḍue mem dị bịdi osi obugh-oten phọ aZiz. Nyina keezuanan bịdi ẹpe eekuna eḍiiny phọ ẹḍua bọ esi ẹdala phọ etuman bọ Jẹruel.

¹⁷ Nyina kébe ẹgham mọ ẹphen. Ịmeregha riisi anyina bịn kụ ekori; nyina kẹmiin ni dị Ọmoogh-we phọ kịngo inyina ọkpar opu. Weye aJuda rꞌaJeruselem, kéekpukian ḅịle kékiilaan. Ịki ẹgham mọ, kụ Ọmoogh-we phọ kạtolan ni rꞌanyina!”

¹⁸ Pọ kụ amem dị ạJehosafat ọdaam mọ azumeri ẹmhu kụ aghisigh ạḅogh ude, kụ oomo awe phọ ozumeri aani kụ ooseeny Ọmoogh-we phọ.

¹⁹ Ạbuo aropolo aKohat rꞌaKora bụo eghun phọ aLivai ọmeregha kụ ọlo ọghiom ạnyu ọseph Ọmoogh-we Ẹnaan phọ Ịzirel.

²⁰ Eḅon ạḍiroor aḍio dị etum, awe phọ ụghi ni ẹpe ẹdala phọ etuman bọ Tekoa. Ịdipho bịdi ọmeregha bọ ropogh, ạJehosafat ạḅaanaan bịdi ẹḍogh phọ ẹphen: “Weye aJuda rꞌaJeruselem! Ịkpasi loor anyina esi Ọmoogh-we Ẹnaan phọ anyina bịn nyina ketue ni ẹmerenyan. Imeeraam ịpe ariil phọ ọdi mịḅeni bọ inyina bịn kẹnighe ni.”

²¹ Mem dị ọdi maapuruan ruupuruan rꞌawe phọ ạmadan, ọdaam mọ ạto ni mọ buniin ạroko-ạsuor ọkpologhian igbogh ạrusuoma ạbidi ịpe bịdi roonmenan ghan bọ ḍio ẹyaal kụ ogiriph erelhe oḍiemiom we ẹgham mọ, ọmoogh ghan: “Iboom Ọmoogh-we phọ! Ẹphomoghian ọdi rẹ́gbo ghan!”

²² Mem dị bịdi omiigh ọmoor, Ọmoogh-we phọ aḍighi ni ịdi ọgbaragbara asoor sịphe ogbo awe ẹgham mọ rotu bọ.

²³ Awe Amonait rꞌawe ạMoabait uzuom ni ẹgham we phọ Idom kụ ophiemi bịdi ọmadan, kụ ogbi ọḅile okiton kụ eenan asiloor.

²⁴ Mem dị awe ẹgham mọ aJuda osi otu-oghoph dị ạrol ẹdala phọ, bịdi uphogh ni ọghiom bụmulogh-ḍien phọ kụ ọmiin mọ oomo ạbidi omeleghu ude omuughu. Rꞌoniin ókpetenaan.

²⁵ ẠJehosafat rꞌawe ẹgham ọdi ụghi ni owum aruphua phọ kụ bịdi ọmiin ịbadi ạsinam, rạraar olhe, iinmenan rꞌịnon ạraraar dị ẹmoogh ịyaar oḍighinom. Bịdi uphiemi ịraar aḍio owum aruphua phọ, kụ ịphughan dị bịdi útue ụ́sighiogh oomo phọ ịne.

²⁶ Ḍio dị emuneniom inya bịdi ookpomoghan sịphe Eḍiiny aBeraka kụ ọseph Ọmoogh-we phọ esi oomo ịpe ọdi maḍighi bọ. Ịdipho kụ iḍighi kụ oghol bọ mọ “esi aBeraka.”

²⁷ ẠJehosafat ạpham ni we ẹgham mọ ọdi aḅulolom Jeruselem rꞌọkpar opu, loor esi dị Ọmoogh-we phọ mawinighiom ẹpomoghian phọ.

²⁸ Mem dị bịdi osi ẹmha phọ, bịdi ogiriph erelhe osi Otu Ịiḅereghi phọ rꞌạroḍogh ạrene rꞌaruuḍue.

²⁹ Tọrobo eelhe dị ọnaghan ịdipho Ọmoogh-we phọ mạkpar bọ apu bụmulogh-ḍien phọ Ịzirel ukpereghaan ni.

³⁰ Kụ iḍighi kụ ạJehosafat ạda rꞌẹepho kụ Ẹnaan ekpeki nyọdi oomo ịigaany.

Ekureriom ạdol ạgada ạJehosafat

³¹ ẠJehosafat ạman bọ 35 ạsia kụ ọdi amiigh bọ ọda aJuda. Ọdi ạda bọ Jeruselem 25 ạsia. Ḍien onhiin ọdi ughol mọ Azuba ọnyani aSilhi.

³² Ọdi ạdaph ni ịpe Ạsa ọde phọ ọdi aḍighi ghan bọ. Ọdi aḍighi ghan ịdi ẹḅeeraan Ọmoogh-we phọ;

³³ kụ ọlo ụ́pueghi roogbolom mọ ephophogh bọ ẹghi ạnyu ịlo ooseeny ghan aruru. Awe phọ úkiton rꞌoomo ologhi ạbidi ọoḅereghi Ẹnaan ạburude ạburude phọ ạbidi.

³⁴ Oomo ịnon ạraraar dị ạJehosafat aḍighi, kꞌemiighom kꞌekureriom ọda phọ ọdi, ọsighe ni ịphen phọ ọge sịphe ạḍinya ịpe emiteghu bọ mem mọ aJehu ọony aHanani dị eḍighi ẹkpigh sịphe ạḍinya ịpe emiteghu bọ mem ạbudaam mọ Ịzirel.

³⁵ Eniin amem, ạJehosafat ọdaam mọ aJuda aḍigh ni ooḍikuan rꞌAhazaya ọdaam mọ Ịzirel dị aḍighi yogh ịbadi ịkaraph ạraraar.

³⁶ Sịphe esiḍia phọ Ezion Geber bịdi ụkaaghi ni rughuugh ạmughi.

³⁷ Kụ Eliezer ọony aDodavahu ọlo ẹmha aMaresa ạphur rụru Jẹhosafat, “Loor esi dị nạ maḍigh ooḍikuan rꞌAhazaya, Ọmoogh-we phọ kapiemi ni ịpe nạ mạkaaghi bọ.” Kụ arughuugh phọ eḅomoghian eḅiighi bịn ị́ki mun erelhe.