2 Krọnikuls 18 - Ạḍinya Iigbia

AMikaya oyil phọ ạpur rụru Ehab

¹ Mem dị ạJehosafat ọdaam mọ aJuda ạmoogh ẹelha kụ aaleghaan, ọdi aḍighi ịdi ọnyo ọto ọdi rꞌọnyo ọto Ehab ọdaam mọ Ịzirel ạalan.

² Ạsia eten kụ ạJehosafat ạghi egbogh ẹmha aSameria ọmiin Ehab. Esi ọlogh eghuan Jẹhosafat rꞌạbuphe ọdaph bọ nyọdi, Ehab ạze ịbadi iyool-ịga rꞌạsinam olhiom amalhe. Ọdi ạkpaariom Jẹhosafat oḍighan ọdi ozuom ẹmha aRamot Gịliad.

³ Ọdi apuru mọ, “Nạ kụdaph ịmi yira ọki obe ẹgham ẹpe Ramot?” ẠJehosafat ạphagharanaan mọ, “Mị ạnya ni mem lọ nạ ạnya; ịduon kẹn kụ ịdi awe ẹgham ạmi ọnya. Yoor kọdaphan nyịna.”

⁴ Kụ ọdi ạloghom mọ, “Kụ ọphur opuru ịlo Ọmoogh-we phọ kạḅem bọ.”

⁵ Kụ Ehab aakpomoghi riil phọ egina esi, ọman bọ 400 awe, kụ apuru bịdi mọ, “Mị ụki ni uzuom ẹgham Ramot ḍụghum, kụ mị kụ ụ́ki?” Kụ bịdi ọḅeni nyọdi mọ, “Ḅetenu ạghi. Ẹnaan kẹngo ni nyịna ọkpar opu.”

⁶ Kụ ạJehosafat apuru nyọdi mọ, “Ọnon oyil kꞌỌmoogh-we phọ ólho sịen, dị yira kọḅile opuru?”

⁷ Ehab ạphagharanaan, “Oniin asugha ni, aMikaya ọony Imla. Mị ạlogh ni nyọdi ḍien ịdi eḍighi bọ ọdi kꞌekulha kụ̋miinaan ghan ịmi igey ịyaar; oomo amem ịkaraph ịkaraph.” “Ịdipho kạ́ḅem!” ẠJehosafat ạphagharanaan.

⁸ Kụ Ehab ạmagh oniin oye oḍighi ọdi kụ ạḅeni mọ, “Gboogborion ạghi ạpham Mikaya ạsighe aru.”

⁹ Ịyal phọ ạbudaam mọ, dị ọkpologhian rụsuoma ạbidi, oye ye ạrolom ạgada ọdaam ẹmha phọ ọdi, esi dị rọgbe ghan ịbiakpa sịphe eḍighom ẹmha phọ aSameria kụ oomo ariil phọ rọmiin ghan ịmiin risigh ạbidi.

¹⁰ Oniin ọnyo ạbidi, ạZedekaya ọony phọ aKenaana, ạsighe okuruon ạlemom rạphaal kụ ạḅeni Ehab, “Ọmoogh-we phọ ạḅem ịduon mọ, ‘Nạ kạsighe ịphen phọ kụ anyuughiom bụo ạSiria phọ apiemi.’”

¹¹ Oomo ạbueri phọ ariil phọ ụmiin ghan ọnhu oniin, “Zuom ni Ramot, kụ nạ kạkpar ri apu. Ọmoogh-we phọ kạsighe ni bịdi ạlogh ḍịghaagh ạna.”

¹² Ịduon phọ, oye oḍighi phọ ạghi bọ ọmagh aMikaya ạḅeni nyọdi mọ, “Oomo ạbueri phọ ariil phọ mọmiin mọ kẹnighenom ni ọdaam mọ, kụ nạ meeraam bịn.”

¹³ Kụ ọlo aMikaya ạphagharanaan mọ, “Ịdipho Ẹnaan phọ edi ghan bọ ni, ịpe Ọmoogh-we phọ kụḅeni bọ ịmi kụ ịdi mị kạtuugh ni ạḅeni.”

¹⁴ Kụ ọdi ạghi ạteeny ọdaam mọ, kụ ọdaam mọ apuru nyọdi mọ, “Mikaya, ạJehosafat ọdaam mọ rꞌạmi ọghi ni ozuom Ramot ḍụghum, kụ kụ́ki?” “Izuom ni!” AMikaya ạphagharanaan. “Iikia ílho. Ọmoogh-we phọ mạḅogh ni bịdi ạlogh rạghaagh anyina.”

¹⁵ Kụ Ehab ạphagharanaan mọ, “Ika amem kụ ẹdi mị rakunya ghan bọ kạḅeni nyịna mọ kápogh ghan ịnon bịn ạghaaph ghan ụḅeni ịmi ịpe eru bọ ịne esi aḍien Ọmoogh-we phọ.”

¹⁶ Kụ aMikaya ạḅem mọ, “Mị rạmiin ni ḍita ẹgham Ịzirel dị ọwalala ẹpe aruugum mọ dịadi iyool-ịga dị opoghom úlho. Kụ Ọmoogh-we phọ ạḅem mọ, ‘Bụen phọ ụ́moogh oḍiemiom. Tọrobo oye agheel kꞌọdi rꞌẹepho.’”

¹⁷ Ehab ạḅeni Jẹhosafat, “Mị ụḅeni nyịna mọ ọdi rụ́miinaan ghan ịmi egey ịyaar; oomo amem ịkaraph ịkaraph!”

¹⁸ AMikaya ạghaaph ạghiom: “Nyịidipho ịnaghan ịpe Ọmoogh-we phọ rạḅem bọ! Mị ụmiin ni Ọmoogh-we phọ dị ạrolom ạgada igbogh phọ ọdi ẹpe kꞌạke rꞌoomo ạruukpaany phọ dị ọmeregha ịigaany ọdi.

¹⁹ Ọmoogh-we phọ apuru, ‘Ạnhian kụ kaakeleghi bọ Ehab mọ ọdi ạghi amugh ẹpe Ramot?’ Buniin ạruukpaany ọḅem eniin ịyaar kụ bụeri phọ ọghaaph kịro,

²⁰ tụtu oniin uwaloor ạgbatan ẹda ạghi risigh, ạteeny Ọmoogh-we phọ kụ ạḅem mọ ‘Mị kaakeleghi ni nyọdi.’ ‘Ika?’ Ọmoogh-we phọ apuru.

²¹ Uwaloor phọ ạphagharanaan mọ, ‘Mị kạki aḍighi ịdi oomo ariil phọ Ehab kọgba ọkpe.’ Kụ Ọmoogh-we phọ ạḅem mọ, ‘Kịa aakeleghi nyọdi. Nạ kạmiin ni ẹmhu.’”

²² Kụ aMikaya akureriom: “Ịphen kụ ịdi memite. Ọmoogh-we phọ maḍighi ịdi ariil phọ ạna ạbuen mọgbaam nyịna ọkpe. Kụ ọdi rꞌaloor masu ọnhu mọ nạ kazuan igbogh ịiḅaghami!”

²³ Kụ ạZedekaya oyil phọ aḍuraan ạabeeph Mikaya, aḅor nyọdi kụ apuru mọ, “Kꞌapuramem kụ ẹdi uwaloor Ọmoogh-we phọ ụwile bọ ịmi kụ ạbaanaan nyịna?”

²⁴ AMikaya ạphagharanaan, “Ḍio phọ ạḍiphe nạ masuma bọ aḍigh esi ịbooghian sịphe osoph ọman kụ ẹdi nạ kalegheri ni.”

²⁵ Pọ kụ amem dị Ehab ọdaam mọ ạto ạḅeni we oḍighi ọdi mọ, “Isiph Mikaya ẹghiomaan Ạmon uwo ẹmha phọ rꞌaJoas ọony ọdaam mọ.

²⁶ Ịḅeni bịdi mọ ọlogh nyọdi otu ikoli kụ ọngo ghan brẹd rꞌạmuum bịn tụtu mị arigheel rꞌomoon aloor.”

²⁷ Kụ aMikaya ạḅem mọ, “Eḍighi ịyaar dị nạ arigheel rꞌomoom aloor, pọ Ọmoogh-we phọ kụ rạ́kaaph bọ ịphen ẹḍua bọ ọnhu ạmi emite.” Kụ ọdi ạloghom mọ, “Ịnaghan, tọrobo ọnyo anyina, ịpe mị mạḅem bọ.”

Aḍuugh Ehab

²⁸ Kụ Ehab ọdaam mọ Ịzirel rꞌạJehosafat ọdaam mọ aJuda ọghi ozuom ẹmha aRamot Gịliad.

²⁹ Ehab ạḅeni Jẹhosafat mọ, “Ịduon yira rọki bọ ẹgham mọ, mị kanmia loor ạkpologhian ịnon ibura kụ nạ munughian ni rukpe phọ ịpe ạna.” Ịduon kụ ịdi ọdaam mọ Ịzirel ạghi ẹgham mọ rꞌịnon ọdo ibura.

³⁰ Ọdaam mọ ạSiria mạḅeni bụphe ropogh ghan bọ rughuugh ẹgham mọ ọdi mọ kúpogh ọnon oye emuton ọdaam mọ Ịzirel bịn.

³¹ Kụ mem dị bịdi ọmiin Jẹhosafat ọdaam mọ, oomo phọ ạbidi ugbi mọ ọdi ọdaam Ịzirel kụ bịdi okiton ozuom ọdi. Kụ ạJehosafat ạlho ḍịolho kụ Ọmoogh-we Ẹnaan phọ ạtagharan nyọdi kụ ạsighe ozuom mọ ophoghomiom bọ nyọdi.

³² Bụphe ropogh ghan bọ rughuugh ẹgham phọ ụmiin ni mọ ọdi kọ́daam mọ Ịzirel, kụ bịdi ọwile nyọdi úporogh mun.

³³ Kụ ọlo ọnyo ẹgham ạSiria ạkpatan kụmugh ọdi ịlo ạteeny kụ ạraph ẹkpina dị emeelom eḍigh loor Ehab ọdaam mọ ogbo ịinya ẹgham rꞌọsuaram mọ ọdi azua. Ọdi ạlho ạḅeni nyọpo rạzoghiom bọ oghuugh ẹgham mọ ọdi mọ, “Mụlhogh ịmi ẹgha. Kiton ḍịnon ạḍighaagh ụsighe ịmi ạḍuanam sịen ẹgham mọ!”

³⁴ Mem dị ẹgham mọ rẹkologhol kẹghi, ọdaam mọ ạrol sịphe oghuugh-ude phọ kụ ạbedenom esi aphogh ghan bụo ạSiria phọ. Erumuḍio remeel ighool bịn ọdi amugh.