2 Krọnikuls 15 - Ạḍinya Iigbia

Ạsa aselemi yogh rạraar

¹ Uwaloor Ẹnaan aru asoorom Azaria ọony Oded,

² Kụ ọdi ạghi ọteeny Ọdaam Ạsa. Ọdi ạmagh amitiom mọ, “Ụnaghanan ịmi, Ọdaam Ạsa rꞌoomo anyina awe aJuda rꞌạBenjamin. Ọmoogh-we phọ odianaan rꞌanyina lọ nyina edianaan rꞌọdi. Eḍighi ịyaar lọ nyina ẹwa nyọdi, ọdi kaḍighi ni dị nyina kẹmiin nyọdi, kụ nyina ephogh ḍịnon ạḍighaagh, ọdi kịḅitonaan ni inyina.

³ Mebia ni Ịzirel ụ́tolan ghan ẹkar Ẹnaan phọ; ariil ạrikia ụ́tol ọtughemi ạbidi, kụ ologh ọ́rol.

⁴ Kụ mem dị ịiḅaghami eru, bịdi ukiton ni osoman Ọmoogh-we Ẹnaan phọ Ịzirel. Bịdi ọwa nyọdi kụ ọmiin nyọdi.

⁵ Mem mọ ọpo oye aru, kákeel oopho dị ịyaar ị́ḅogh, loor esi dị ịiḅaghami ịrol kụ okirikiri ạrol tọrobo ade.

⁶ Eniin eelhe ẹzeerom ẹnon eelhe loor esi dị Ẹnaan mẹsighe ịiḅaghami rꞌịminimiin retuomaan bịdi.

⁷ Ịkparami loor anyina, ẹmoogh oḅio. Oḍighi phọ nyina reḍighi bọ, ạsuo kạtol li.”

⁸ Mem dị Ạsa ạnaghan ịmiin phọ Azaria ọony phọ Oded, oḅio ọdi ạkpar. Ọdi aroḅologhi oomo ịkaaneen ạrumugh ẹpe Juda rꞌạBenjamin rꞌoomo ịkaaneen ạrumugh ẹpe igbogh ạramha phọ ọdi mạmooghaan bọ ẹpe aroogbolom mọ Ifraim. Ọdi ạḅile ni aselemi enmeny ạrikia Ọmoogh-we phọ sịphe ogiga Otu Ịiḅereghi phọ.

⁹ Ịbadi awe ụḅeeny ni oru ạga phọ Ạsa dị ọrol ghan ẹpe Ifraim, Mạnase rꞌạSimion kụ ọrol ghan ọmar ọdi, loor esi dị bịdi mọmiin mọ Ọmoogh-we phọ odianaan rꞌọdi. Ạsa ạamaghagh oomo ạbidi rꞌawe aJuda rꞌạBenjamin.

¹⁰ Bịdi ookpomoghan sịphe Jeruselem ụnwanyu dị ạman ịraar sịphe ạlha phọ emuneniom bọ ḍioph rꞌoogh ọda Ạsa ọdaam mọ.

¹¹ Ḍio phọ ạḍiphe, esi ạraraar dị bịdi owum orighelom kụ ẹdi oḍighinom rịkia ọngo Ọmoogh-we phọ: 700 ạsinam ra 7,000 iyool-ịga.

¹² Bịdi ughiran ịyo dị bịdi omeeraam mọ bịdi kooseeny ghan Ọmoogh-we Ẹnaan ạburude ạburude ạbidi rꞌoomo ologhi rꞌoomo ịikpo ạbidi.

¹³ Tọrobo oye, mꞌonyugheel mꞌokumoor, olephiri mꞌạnir dị úuseeny nyọdi pọ kokiigh ni.

¹⁴ Rꞌẹḍogh dị ẹghi ạnyu kụ bịdi oghunya rꞌaḍien Ọmoogh-we phọ mọ bịdi kọpamanam ni ịyo phọ, kụ bịdi ọyughuron kụ ophula rụkuodu.

¹⁵ Oomo awe phọ aJuda ụmoogh ọḅaal ologhi loor esi dị bịdi moghiran ịyo phọ ịphen rꞌoomo ologhi ạbidi. Bịdi ụmoogh ḍịḅeeraan ooseeny ghan Ọmoogh-we phọ, kụ ọdi ạsighe bịdi kụ ạngo ẹepho akoom.

¹⁶ Ọdaam Ạsa agboton ạgada aMaaka onhiin oko ọdi dị aḍighi ghan onhiin ọkpanyan ọdaam, loor esi dị ọdi ạḅol igbudu Asera, eru-ạnir iḅeph eḍien. Ạsa asoph igbudu phọ alher kụ ạkiriph kụ ạsu ịpherepe phọ sịphe eḍiiny ạKidron.

¹⁷ Ghạlamo ịdipho Ạsa úugulemi bọ oomo ariisi ooseeny aruru sịphe ade phọ, ọdi ameeraam Ọmoogh-we phọ oomo aghuḍum mọ ọdi.

¹⁸ Ọdi ạḅamaghi sịphe Otu Ịiḅereghi phọ oomo ạraraar phọ Abaija ọde ọdi mạḅogh bọ ạngo Ẹnaan, ạḅaram rạraar agol rꞌasilva phọ eḍighi bọ ịlo ọdi kụ ạngoom.

¹⁹ Ẹgham ị́tol mun tụtu ẹman 35 ạsia phọ ọdi ạda bọ.