2 Krọnikuls 14 - Ạḍinya Iigbia

Ạsa ọdaam mọ ạkpar apu weye ạSudan phọ

¹ Abaija ọdaam mọ amugh kụ oḍi sịphe ariiḍi ạbudaam mọ ẹpe Egbogh Ẹmha aDevid. Ạsa ọony ọdi ale erua ạgada ọdaam mọ kụ mem dị Ạsa ạda, ade phọ ẹmiin ẹepho ḍioph ạsia.

² Ạsa ạḅeeraan Ọmoogh-we Ẹnaan phọ ọdi esi oḍighi ghan ịlo ẹkpianaan kụ ẹnighe.

³ Ọdi agbonyon iiruen arenmeny phọ rꞌariisi ooseeny aruru phọ, aḅomoghi rọko asighiigh kụ aagbo alhereghi igbudu um-ạke Asera phọ.

⁴ Ọdi ạto mọ awe phọ aJuda oḍighi ịlo Ọmoogh-we Ẹnaan ạburude phọ ạbidi ạḅem, kụ ọnaghanan ghan ịtughemi phọ ọdi rꞌịtooghi phọ ọdi.

⁵ Loor esi dị ọdi aphiemi riisi ooseeny aruru phọ rꞌarenmeny ọsu ịnsens ẹpe oomo ạramha phọ aJuda, eelhe phọ ịmiin ẹepho mem mọ ọdi ạda bọ.

⁶ Ọdi adoghoḍi yogh ni riisi okpekima akoom rạmha phọ aJuda mem mọ ạmuen, kụ esi ịbadi ạsia ẹgham ị́tol, loor esi dị Ọmoogh-we phọ ạngo nyọdi ẹepho.

⁷ Ọdi ạḅeni we phọ aJuda mọ, “Yira kọḅiirogh iikpe okpekimaam rạmha phọ, ruutu ẹedaneen oghoph rꞌạrunhu-aḍibuo dị kotue ni okughi kụ ọkasi. Yira kụ ụphamanam de phọ loor esi dị yira moḍighi ịpe Ọmoogh-we Ẹnaan phọ ayira rạwa bọ. Ọdi muukpereghi iyira kụ akikima oḍighima ịyaar oomo ịigaany.” Ịduon phọ kụ ẹdi bịdi ọlogh kụ aghuḍum ạteeny.

⁸ Ọdaam Ạsa ạmoogh ḍita ẹgham dị ọman 300,000 awe ạbuo Juda, bụen ụphamagh ịsuaram rꞌịsoph, ḅịle ra 280,000 awe ạbuo ạBenjamin, bụen kẹn ụphamagh ịsuaram rꞌịsoph. Oomo phọ ạbidi uḍighi ikakara awe dị ọkar kụ ọtughemi.

⁹ Oniin ọnyo ạSudan dị oghol mọ aZera azuom Juda rꞌawe ẹgham dị ọman 1,000,000 awe ra 300 arughuugh ẹgham kụ onyeeniom ọghi osi ẹpe Maresa.

¹⁰ Ạsa amite ni ạghi eenom, kụ ịyal phọ asita ẹgham ọmeregha riisi ạbidi sịphe Eḍiiny aZefata etuman bọ Maresa.

¹¹ Ạsa ạaḅereghi ni Ọmoogh-we Ẹnaan phọ ọdi mọ, “Ọmoogh-we, nạ katue ni ạpel we ẹgham lọ odugh, ịdipho nạ kạpel bọ bụlo ọkpar. Ụphel iyoor nyịidipho, Ọmoogh-we Ẹnaan phọ ayoor, loor esi dị yoor roḍuom ghan nyịna ologhi, kụ esi aḍien ạna kụ yoor ọtu bọ eenan ḍigbogh aḍita awe ẹgham mọ ẹphen. Ọmoogh-we, nạ kụ Ẹnaan ayoor; oye ólho dị kạmoogh ịitughian ọkpar opu ạna.”

¹² Ọmoogh-we phọ ạkpar ri apu we ẹgham mọ ạSudan mem mọ Ạsa rꞌawe aJuda ozuom bọ bịdi. Bịdi osumughu

¹³ kụ Ạsa rꞌawe ẹgham mọ ọdi ophorogh bịdi osiemi kꞌẹpe Gerar. Ịbadi awe ạSudan ụze ni dị tụtu awe ẹgham mọ útue mun ookpomoghan ee. Ọmoogh-we phọ rꞌawe ẹgham mọ ọdi ụkpar ri opu bịdi, kụ awe ẹgham mọ owum iboom aruphua.

¹⁴ Kụ bịdi orue ophiemi igbogh ạramha eelhe phọ ekoom bọ Gerar, loor esi dị awe phọ ọrol bọ ẹpe ughiilaan Ọmoogh-we phọ. Awe ẹgham mọ orelhe yogh oomo ẹpe kụ owum iboom aruphua.

¹⁵ Bịdi uzuom aani ni rugbogo abuniin abupoghom ịga, owum ịbadi iyool-ịga rꞌạsikamel. Kụ bịdi ogbi origheel ẹpe Jeruselem.