2 Krọnikuls 13 - Ạḍinya Iigbia

Abaija eenom ẹgham Jeroboam

¹ AJeroboam ạda bọ Ịzirel rẹman ḍioph rꞌọphaanya ạsia, kụ Abaija aḍighi ọdaam aJuda,

² kụ ọdi ạda ẹpe Jeruselem ịraar ạsia. Ḍien onhiin ọdi ughol mọ aMikaya ọnyani Ụriel, ọlo ẹmha aGibia. Ẹgham imite ni ogbo Abaija rꞌaJeroboam.

³ Abaija amitiom ni ḍita awe ẹgham dị ọman inya okuron ọonir, kụ aJeroboam aphoghom nyọdi we ẹgham dị ọman ọphaanya okuron ọonir.

⁴ Ekeeny rꞌelhiom awe ẹgham mọ uuzuanan ni sịphe ạraaḅaraph phọ Ifraim. Abaija ọdaam mọ ạsiiny ạnyu Eegum aZemaraim kụ ạlho ạmagh Jeroboam rꞌawe phọ Ịzirel mọ, “Ịnaghanan ịmi.

⁵ Nyina ílegheri ḍụghum mọ Ọmoogh-we Ẹnaan phọ Ịzirel aghiran ịyo dị kótue oogbonyon rꞌaDevid, dị ẹngo nyọdi rꞌạnmuny ọdi ọda Ịzirel kꞌagee-pọ?

⁶ AJeroboam ọony aNebat aḍeenaan émeera esi Sọlomon ọdaam mọ ọdi.

⁷ Moḍighi pạ kụ ọdi aakpomoghi ḍita ighiil awe, kụ bịdi ọkpaariom Rehoboam ọony ạSolomon dị aḍighi mọony iboom kụ kátue ạḅem mọ mị úmeera ịlo bịdi ọḅeni.

⁸ Nyịidipho nyina ẹnyaaghian eenom ẹgham ọmar phọ ọpo Ọmoogh-we phọ ạngo bọ Devid rꞌạnmuny ạnmuny ọdi. Nyina ẹmoogh we ẹgham dị ẹmanam ḅịle rꞌịya ạsinam mọ aJeroboam ạsighe bọ gol ạlhemiom mọ eḍighi rụmugh phọ anyina.

⁹ Nyina iphorogh ni emitiom riil ạrikia Ọmoogh-we phọ, bụo ẹemara kꞌEeron, ḅịle rꞌạbuo aLivai phọ. Kụ riisi phọ ạbidi nyina ẹmaaghi riil ạrikia, ịdipho awe ịnon areelhe oḍighi bọ. Tọrobo oye lọ ạpham ḍilephiri onyugheel ạnam mꞌoḍual idughuna, koselemi nyọdi oḍighi oyil ạrikia ighiil ạrumugh phọ anyina.

¹⁰ “Kụ ọlo yoor odi ni okumu ọngo Ọmoogh-we Ẹnaan phọ ayoor kụ kọ́ḅitonaan nyọdi. Ạbupinyon rịkia, bụo ẹemara kꞌEeron kụ oḍighi ghan iiḍighi ạbidi, kụ ạbuo aLivai ọloghonaan bịdi ḍịghaagh.

¹¹ Tọrobo ạḍiroor rꞌạtorobo adulhe bịdi useenaan ghan nyọdi ịnsens rꞌạraraar aghuḍum ịnam dị ọsu ikpom. Bịdi ụngo rịkia ạbred ạnyu ịdaabili dị ụ́upu, kụ mem adulhe bịdi ọsu ịtozi sịphe ẹmeremiom agol phọ. Yoor roḍighi ghan ịpe Ọmoogh-we phọ mạto bọ, kụ ọlo nyina mẹḅitonaan nyọdi.

¹² Ẹnaan rꞌaloor kụ oḍiemiom ayoor kụ ariil ạrikia ọdi odi sịen rꞌaruuḍue, ọnya ophula ọmagham ayoor eenom anyina. Weye Ịzirel, kébeenan Ọmoogh-we Ẹnaan ạburude ạburude ayoor. Nyina kẹ́kpar epu!”

¹³ Ogbo ịphen phọ aJeroboam marom buniin awe ẹgham ọdi mọ ọghi ạaghian okori we ẹgham aJuda ẹgum ọman, mem dị bụeri phọ ọkpaariom bịdi risigh.

¹⁴ Awe ẹgham aJuda uphogh ni ọman kụ ọmiin mọ mokoom bịdi. Bịdi omoghi mọ Ọmoogh-we phọ ụlhoghonaan iyoor ḍịghaagh, kụ ariil ạrikia phọ ophula rụkuodu.

¹⁵ Awe aJuda phọ ụlooghi ọghiom ạnyu, kụ Abaija aḍiemiom, kụ bịdi ozuom. Pọ kụ amem dị Ẹnaan ẹkpar epu Jeroboam rꞌawe ẹgham Ịzirel.

¹⁶ Kụ awe Ịzirel phọ oghilighu ghisigh awe aJuda phọ osumughu, kụ Ẹnaan eḍighi ịdi ạbuo aJudia phọ kụ ọkpar opu.

¹⁷ Abaija rꞌawe ẹgham mọ ọdi oogulemi we Ịzirel phọ kụ ọze 500,000 ịgbagara awe ạbidi.

¹⁸ Ịdi eḍighi bọ awe aJuda phọ ụkpasi ologhi ạbidi esi Ọmoogh-we Ẹnaan ạburude ạburude phọ ạbidi, bịdi ụkpar ri opu weye Ịzirel.

¹⁹ Abaija aphorogh ni we ẹgham aJeroboam kụ ạsighiogh iniin igbogh ạramha ọdi: Bẹtel, Jesana, rꞌEfron, rꞌịbam ạramha phọ etuman bọ bịdi.

²⁰ AJeroboam órue mun ọmoogh ịikpo phọ ọdi mem mọ Abaija ạda bọ. Ekureriom mọ, Ọmoogh-we phọ ạgur nyọdi alher ude, bịn ọdi amugh.

²¹ Kụ ọlo Abaija ạbugh ni iboom. Ọdi aphin ḍioph rꞌinya ạnmariir kụ ḍighi ọde ịyaldi rꞌịyal alephiri ḅịle rꞌaḍioph rꞌodiiny ạnmanyaan.

²² Ịnon igbaany ịlo Abaija, ịdi ọdi ạḅem rꞌịdi ọdi aḍighi, ọsighe ni ịphen ọge sịphe ạḍinya Ịmiin Ido Oyil phọ.