2 Krọnikuls 10 - Ạḍinya Iigbia

Émeera arughunughun ạga ephunom mọ

¹ ARehoboam ạghi Sẹkem ịdi eḍighi bọ oomo arughunughun phọ Ịzirel uukpomoghan ẹpe oḍighi ọdi ọdaam.

² Mem dị aJeroboam ọony aNebat, ọpo agheel bọ Ijipt okpetenaan ạSolomon ọdaam mọ, ạnaghan bọ ịphen phọ, ọdi arigheel ẹmha.

³ Awe arughunughun ạga ephunom mọ urom ọghiom nyọdi, kụ oomo ạbidi ọghi ọteeny Rehoboam kụ ọḅeni nyọdi mọ,

⁴ “Ọde phọ ạna ạamoromi ni dool phọ ayoor kụ iḍighi nyịidipho dughe ịikpara aruukumuan phọ ọde phọ ạna, adughe dool phọ ọdi uwiririom ghan bọ iyoor, kụ yoor ogbi okumu ghan ạna.”

⁵ ARehoboam ạphagharanaan mọ, “Ịngo ịmi ịraar aḍio ọotughian ẹḍogh phọ, kụ ẹḅile eḅula.” Kụ awe phọ ọḍua.

⁶ ARehoboam ọdaam mọ ạḅaanaan ikumoor awe phọ oḍighi bọ butomoghiom ạSolomon ọde phọ ọdi kụ apuru mọ, “Eeghe ọphagharanaan kụ ẹdi nyina iroma ịmi ọḅeni awe phọ ạbuen?”

⁷ Kụ bịdi ọḅeni nyọdi mọ, “Eru mạar dị nạ ạmoogh ọnma ighirigiir esi awe phọ ạbuen kụ nạ ạkaaph ghan igey ikpo ọnhu mem dị nạ rạpagharanaan bịdi, pọ bịdi kọtolan rꞌạna rꞌosooromi aloor.”

⁸ Kụ ọdi aghel oroma ikumoor awe phọ kụ ạḅile ghụn ạghi ạteeny ugheel ạnmuny iigbo phọ ọdi otuman bọ nyọdi

⁹ kụ apuru mọ, “Nyina iroma ịmi oḍighi ika? Mị kạḅeni eeghe we phọ rọwa bọ mọ mị adughe ẹemor adool phọ ạbidi?”

¹⁰ Kụ bịdi ọphagharanaan, “Ịphen kụ ịdi nạ kạḅeni bịdi: ‘Ạkubam ạghunugh ạmi kụ ạbugh apu esin ọde ạmi.

¹¹ Ọde ạmi ạleti ḍigbogh adool rụmhu anyina; adool ḍio ạmi kẹemor epu ḍịphe ọde phọ ạmi. Ọdi ịguroghom inyina ịkpara kụ mị kịguroghom inyina ịkpara phọ rọgurom ghan bọ ạsu!’”

¹² Ịraar aḍio eten, aJeroboam rꞌoomo awe phọ oḅula kꞌaRehoboam ọdaam mọ, ịdipho ọdi mạḅeni bọ bịdi.

¹³ Ọdaam mọ aghel oroma ikumoor awe phọ kụ ạḅaanaan we phọ rꞌẹekpara ẹḍogh,

¹⁴ ịdipho ugheel phọ moroma bọ. Ọdi ạḅem, “Ọde phọ ạmi ạleti dool dị ẹemor rụmhu anyina. Mị kạleti ḍịdi kẹemor epu. Ọdi ịguroghom inyina ịkpara; mị kịguroghom inyina ịkpara ọgurom ạsu!”

¹⁵ Iḍighi ni ogbi Ọmoogh-we Ẹnaan phọ omitiom ẹḍogh phọ ọdi ạḅaanaan bọ Jeroboam ọony aNebat esi oyil Ahaija ọlo aSailo. Ịphen kụ iḍighi bọ ịyaar phọ ọdaam mọ ụ́naghanan bọ we phọ.

¹⁶ Mem dị awe phọ ọmiin mọ ọdaam mọ bụno kạ́naghanan, bịdi ụlooghi ni, “Emeel kụ ẹrolonaan Devid rꞌeghun ọdi! Bịdi muḍighinaan iyira eeghe? We Ịzirel, iḍighi pạ ogheel. ARehoboam aphogha loor ọdi.” Kụ awe phọ Ịzirel ọḅaar ẹmhu,

¹⁷ ọwilenaan Rehoboam ọdaam mọ dị ạda we phọ ọrol bọ eelhe phọ aJuda bịn.

¹⁸ Kụ aRehoboam ọdaam mọ arom dom Adoniram, ọpo oseere bọ ọkpaariom ghan awe oḍighi, ọghi ọteeny awe phọ Ịzirel, kụ bịdi oroḅol nyọdi ikpo oghiigh. Kụ aRehoboam aagborion rꞌephirighan aḍigh oghuugh ẹgham ọdi kụ asuma agheel Jeruselem.

¹⁹ Kꞌamem mọ ọpo awe arughunughun ạga ephunom mọ Ịzirel roḍeenaan ghan émeera esi oḍigh asiya phọ aDevid.