2 Krọnikuls 1 - Ạḍinya Iigbia

ẠSolomon ọdaam mọ ạlhom olegheri-ịyaar

¹ ẠSolomon, ọony phọ aDevid ọdaam mọ, ạpham ạkparami eelhe phọ Ịzirel, kụ Ọmoogh-we Ẹnaan ọdi ạseph nyọdi kụ aḍighi nyọdi oye dị ạkar ạmoogh ịikpo.

² ẠSolomon ọdaam mọ ạto ạḅeni weye ẹgham dị ropogh sita oniin ọonir awe rꞌạbudi ropogh oniin okuron awe, bụo iiḍighi ọdi, aruwo ẹmhu arughunotu, rꞌạbueri phọ awe phọ,

³ mọ oomo phọ ạbidi ọdaph nyọdi ọghi osi esi ooseeny ghan phọ ẹpe Gịbion. Bịdi ụghi ghan ẹpe loor esi dị ịsiphe kụ ẹdi ọlogh bọ Ogbogo Ạdol Ọmoogh-we phọ, nyọpo aMozis otelhedom Ọmoogh-we phọ ạlogh bọ ẹpe ẹdala phọ.

⁴ (Ụlogh Igbe Ịyo phọ ẹpe Jeruselem, oseere ologhi ogbogo ọpo aDevid ọdaam mọ amitiom bọ mem mọ ọdi ạsighe bọ Igbe phọ ẹpe Kịriat Jiarim arumom.)

⁵ Enmeny ạrikia phọ ẹpe ạBezalel ọony aUri ḅịle ọony ọony aHur ạsighe bọ enaba kụ ạlemom, ịrol li kẹn ẹpe Gịbion risigh Ogbogo Ạdol Ọmoogh-we phọ. ẠSolomon ọdaam mọ rꞌoomo awe phọ uboom ni Ọmoogh-we phọ sịphe.

⁶ Risigh Ogbogo phọ ọdaam mọ aboom Ọmoogh-we phọ kụ ạphinyonom rịkia ạngo Ọmoogh-we phọ sịphe ạnyu enmeny enaba phọ; ọdi ạze ni oniin ọonir ịnam kụ ạphophoghi ikpom ạnyu enmeny phọ.

⁷ Ḍughul phọ ạḍiphe Ẹnaan imite ni egaan eḍeenaan loor egbodo ạSolomon kụ epuru mọ, “Eeghe ịyaar kụ ẹdi nạ rạwa mọ mị ụngo nyịna?”

⁸ ẠSolomon ạphagharanaan mọ, “Nạ uḍeenaan ni Devid ọde phọ ạmi oboom ọnma ighirigiir, kụ nyịidipho nạ muḍighi ịmi ọdaam ọsighe esi ọdi.

⁹ Ọmoogh-we Ẹnaan, ḍighi amitiom ịpe nạ aguanaan bọ ọde phọ ạmi. Nạ muḍighi ịmi ọdaam ọda awe dị oḍiza dị kótue ogbi.

¹⁰ Esi ịduon phọ ụngo ịmi ologhi olegheri ịyaar rꞌọnaghan ạḍughum dị mị kạdaam bịdi. Ịduon kụ ílho, keḍighi ika kụ mị atue ạda we ạna oleeny ịduon?”

¹¹ Kụ Ẹnaan ẹphagharanaan Sọlomon mọ, “Nạ mapin agey. Kpạripe rꞌọlom aruphua mụghumo aḍien dị eeleghaan mụghumo ghuḍum ạbuphe ọlogh bọ nyịna ḍien mụghumo ạkuudoony aghuḍum kụo ạna, nạ mạḅile ạlom ologhi olegheri ịyaar rꞌọnaghan ạḍughum ẹrol dị nạ atue ạda we ạmi, bụphe mị mạḅem bọ mọ dạ phọ.

¹² Mị kạngo ni nyịna ologhi olegheri ịyaar rꞌọnaghan ạḍughum. Esi ọḅaram, mị kạngo nyịna ẹelha dị ẹbugh, ruphua, rꞌaḍigey aḍien dị ọdaam kọ̋moogh ghan kꞌekulha kụ kạ́moogh mun.”

Ịikpo rꞌẹelha ạSolomon ọdaam mọ

¹³ Kụ ạSolomon ạḍua esi ooseeny phọ ẹpe Gịbion, esi phọ Ogbogo Ạdol Ọmoogh-we phọ ạrol bọ, kụ arigheel Jeruselem. Kụ ạda Ịzirel sịphe.

¹⁴ Ọdi aakpomoghi ḍioph rꞌinya okuron arughuugh ẹgham rꞌiḍioph rꞌịyal ọonir awe dị rokiilom ghan rụsu. Buniin ọdi asereghi ẹpe Jeruselem, bụeri phọ rạmha phọ arughuugh ẹgham phọ ediighi bọ.

¹⁵ Mem mọ ọdi ạda bọ, asilva rꞌagol eetura sịphe Jeruselem mụdi ịkpingba, kụ ọsaga aapaany mụdi oopho oreeny ạsikamor.

¹⁶ Abumuul ḍighi ọdaam mọ ụphamaghan ghan ni ḍighi ịnam-ạsu dị ẹḍua ẹpe Musri rꞌaKilisia,

¹⁷ rꞌaḍighi arughuugh ẹgham dị ẹḍua ẹpe Ijipt. Bịdi ụghiomaan ghan rạalha ạHitait rꞌạSiria rụsu rꞌarughuugh ẹgham kụ aal ghan rughuugh ẹgham odiiny okuron ipoḍi asilva nyoniin, ḅịle rꞌạrusu oniin okuron rꞌooghdi ipoḍi asilva nyoniin.