2 Bụo ạKorint 6 - Ạḍinya Iigbia

¹ Yoor ạbuḅarama phọ sịphe oḍighi phọ Ẹnaan, rịiḅereghiom ni inyina mọ ighirigiir phọ Ẹnaan mịnma bọ inyina kípe oopho esi bịn.

² Ịnaghan ikpo ọnhu phọ Ẹnaan sịphe ạḍinya iigbia phọ mọ, “Mị ụnaghanan ni nyịna mem mọ mị ạse bọ nyịna. Mị ụlhoghonaan ni nyịna ḍịghaagh ḍio ạpeleeny phọ.” Ịmiin nụun, amem ịiseeny phọ mẹteeny. Arodon kụ aḍio ạpeleeny phọ.

³ Ịdipho yoor rọ́wa bọ mọ oye ạḍagha oḍighi phọ ọphon yoor roḍighi bọ kụ ịdi yoor ọtuan bọ kụ úseere bọ ẹkan dị oye kakpetaan ameel.

^4-5 Kpạripe ghụn, tọrobo ịlo ẹrol, mꞌịminimiin, mꞌịiḅaghami, mꞌẹkparam, mꞌikuphogh, mꞌikoli, mꞌịgbaragbara, mꞌọkpar aloor, mꞌẹnaani aḍughul, mꞌọkoony, yoor obigh ni ekpom oḍighi ghan rꞌoḍeenaan mọ yoor roḍighinaan ghan Ẹnaan.

⁶ Yoor mọsighe kẹn eeḅi ẹzo, rꞌolegheri ịyaar, rꞌọkparam, rꞌọnma ighirigiir, rꞌUwaloor Iigbia phọ, rꞌẹphomoghian dị ị́ḅaram ịikpukian,

⁷ rꞌọghaaph ghan igey phọ, rꞌịikpo phọ Ẹnaan, oḍeenaan mọ olegheriom mọ yoor roḍighinaan ghan Ẹnaan. Aruukuan kụ ịinya phọ yoor ọsighe bọ rotuphiom ghan ẹgham mọ kọḅile ọsuaram ikpo phọ.

⁸ Eeni amem ughueni iyoor, eeni amem uufolomi iyoor. Eeni amem ụgilaam iyoor, eeni amem ụseph iyoor. Rụlogh ni iyoor ọkpe, kụ yoor rọkaaph ni ịpe eru bọ ịne phọ.

⁹ Mụdi iyoor úlegheri, kụ ạri oomo awe ulegheri ni iyoor. Mụdi yoor momuughu, kụ ạri yoor odi ni ropooghu. Rụlhiom ni iyoor, kụ ạri iyoor ụ́ze.

¹⁰ Iloghi ayoor ị́ḅaal li, kụ ạri yoor odi ghan ni oboh ghan iboh oomo amem. Rukulom yoor ri, kụ ạri yoor kụ roḍume bụnon. Rꞌịlo iḍighom iyoor ílho, kụ ạri ịlo yoor ụ́moogh ílho.

¹¹ Iiḅi asiya ayoor ẹpe Kọrint, yoor mọghaaph ni oomo phọ ịdi ọmadan ịḅeni inyina. Yoor okunyon ni iloghi phọ ayoor ịwilenaan inyina.

¹² Yoor inyina ạ́aghinaan iloghi phọ ayoor. Nyina ghụn kụ ạaghinaan iyoor ịpe anyina.

¹³ Ịphen mị rạkaaph bọ, mị ạsighenom mọ nyina ạnmuny ạmi. Ịrolom aani iyoor ịdipho yoor idimom bọ inyina, ekpenyon iloghi phọ anyina ịwilenaan iyoor.

Kéḍigh ooḍikuan rꞌạbuphe kőmeeraam bọ

¹⁴ Kéḍigh mun ooḍikuan rꞌạbuphe kőmeeraam bọ Ẹnaan. Igey rꞌịkaraph kẹḅoph bọ eeghe ạmuḅoph? Ạḍiḅaal rꞌufiri kotughan bọ ika?

¹⁵ AKraist rꞌEru kọḅoph bọ ika ọnhu? Ọpo mameeraam bọ rꞌọpo kőmeeraam aani bọ kọḅaran bọ eeghe?

¹⁶ Otu ịiḅereghi phọ Ẹnaan rꞌạnmuny aghuḍuul ạbuo aruru phọ kọpomoghian bọ ika? Yira phọ kụ otu ịiḅereghi Ẹnaan phọ edi ghan bọ ni. Ịdipho Ẹnaan rꞌaloor ọdi kụ ẹḅem bọ mọ, “Mị kaḍighi bịdi marugh phọ ạmi, ạḅile atugh sịphe ogbo phọ ạbidi. Mị kaḍighi Ẹnaan ạbidi, bịdi oḍighi weye ạmi.”

¹⁷ Ịphen kụ ịdi Ọmoogh-we phọ ạḅem aani mọ, “Ịgbatanaan sịphe ogbo phọ ạbidi ẹrol ḍịo anyina. Mị Ọmoogh-we Oomo Ịikpo phọ rạḅem ghan mọ kẹ́moogh ịyaar oḍighinom ịlo eḍighi ḅạphanya, bịn mị kịloghoma ni inyina.

¹⁸ Mị kaḍighi ni ọde anyina, nyina eḍighi nmụny rꞌạnmanyaan ạmi.”