2 Bụo ạKorint 4 - Ạḍinya Iigbia

Yoor phọ ọmoogh bọ ẹeḍiom aruwaloor phọ ọkigh roko

¹ Ịdipho Ẹnaan mẹnma bọ ighirigiir phọ kụ mẹḅogh bọ oḍighi phọ ọphon ẹlogh ḍịghaagh ayoor, ologhi ayoor rꞌamem rádugh.

² Yoor moghel oomo omian ghan oḍighi yogh ạraraar umugholoor phọ. Yoor róḍighi ghan ịlo iigbegheḍiom, ḅịle kẹn yoor rọ́ḅighiḅighiom ghan ẹmhu ọghaaph phọ Ẹnaan. Ọghaaph ghan ịpe eru bọ ịne ghisigh phọ Ẹnaan omitiom bịn kụ ẹdi yoor moḍiku bọ ịitughian iloghi oomo awe phọ.

³ Ẹmhu ooḅi ọghaaph phọ yoor rọkaaph ghan bọ kụ eḍighi ịbooghian, pọ ẹbooghian esi ạbuphe ropeeghu bọ bịn.

⁴ Bịdi úmeeraam ịdi eḍighi bọ ẹmugh aḅirini phọ ọphon mẹsighe iloghi phọ ạbidi ẹlogh ẹku ufiri. Ọdi mamirighan mọ bịdi ọmiin ḍịḅaal phọ esoorom bọ bịdi. Ooḅi ọghaaph eegu aKraist phọ ạkpoghoron bọ Ẹnaan bịn ạmadan, kụ aseere bọ ḍịḅaal phọ ạḍien phọ.

⁵ Yoor rọkaaph ghan mọ káyoor, ạJizos Kraist kụ Ọmoogh-we phọ. Yoor moghol ḍien phọ ạJizos Kraist oḍighi rẹbene anyina bịn.

⁶ Ẹnaan phọ ẹḅem bọ mọ, “Ạḍiḅaal kemite ni esoor sịphe ufiri phọ,” kụ egina phọ Ẹnaan phọ eḍighi bọ ni dị ạḍiḅaal phọ ọdi rẹmu bọ iloghi phọ ayira ọsighenom ạḍiḅaal olegheri eegu phọ Ẹnaan rẹmu bọ ghisigh phọ aKraist oruom ayira.

⁷ Kụ ọlo yoor phọ ọmoogh bọ ẹeḍiom mọ ẹphen ọkigh ighiil aroko, ọbo olegheriom mọ oomo ịikpo phọ kị́lo ayoor, ịlo Ẹnaan.

⁸ Rụuḅaghami ghan ni iyoor ọman rꞌighisigh, kụ ọlo yoor úkururu. Rọwalawalami ghan ni ịitughian ayoor, kụ ọlo yoor útoph iloghi phọ ayoor.

⁹ Rụgbiphoghom ghan ni iyoor kụ ọlo iyoor úghel. Runyuughi ghan ni iyoor kolereghi kụ ọlo yoor roḅerenu ghan ni kogbam orelhe.

¹⁰ Oomo amem aloor ayoor regbirighaan ghan ni kẹbaphanu ịlo aḍuugh phọ ạJizos, ọbo ọmiin aani ghuḍum mọ ọdi ruzu-ạnyu phọ ayoor.

¹¹ Yoor okol ghan ni ẹmhu phọ ạJizos romuzaan ghan ḍuugh oomo aghuḍum mọ ayoor, ọbo ọmiin aani ghuḍum mọ ọdi sịen aḍizu ọposo phọ ayoor.

¹² Ịphen phọ rẹḅem ghan mọ ịdipho aḍuugh phọ ọdi kụ migho bọ iyoor ẹmoogh kụ ịdi aghuḍum mọ ọdi migho inyina ạmoogh aani.

¹³ Omeeraam mọ ayoor ạkigh nyọpo ọghaaph bọ oghol sịphe ạḍinya iigbia phọ mọ, “Mị mameeraam bọ kụ ạghaaph bọ,” ịdipho yoor momeeraam bọ kụ yoor rọkaaph ghan bọ.

¹⁴ Yoor olegheri ni mọ Ẹnaan phọ eḅeton bọ Jịzos Ọmoogh-we phọ sịphe aḍuugh phọ kiḅeton aani ni iyoor ẹḅaram nyọdi kụ ịḅophoghiom inyina ẹsighe ẹki ghisigh phọ ọdi.

¹⁵ Oomo ịphen phọ ughol ẹmhu anyina kụ ọmiinom ghan bọ, ọbo, ịdipho aḍita awe phọ Ẹnaan rẹnma bọ ighirigiir phọ rẹbugh bọ, oghur ạsuor iboh phọ rẹki bọ ọteeny Ẹnaan ạbugh aani ạghiom ghisigh.

Ạdol dị odimom omeeraam

¹⁶ Esi ịduon phọ rꞌịyaar ologhi ayoor rédughe. Ghạlamo ịduon aḍizu ọposo phọ memiigha bọ ni loor rẹḅor, rọosa ghan ni ruwaloor phọ ayoor ḍio etum ḍio.

¹⁷ Kụ ọony ịminimiin phọ yoor rọmiinom bọ ekulha amem mọ ạmuen phọ kiruom ni iyoor ẹbalabala eegu kꞌagee-pọ dị epeleghiom ni ịminimiin phọ iboom.

¹⁸ Yoor úgbononomi iloghi phọ ayoor ophogh ghan ạraraar phọ ịpe rọmiin bọ, yoor ropogh ghan ghụn ịpe rọ́miin ghan bọ ekpeḍien phọ. Ịpe rọmiin ghan bọ rébia ghan, kụ ịpe rọ́miin ghan bọ rẹtol ghan ni kꞌagee-pọ.