2 Bụo ạKorint 2 - Ạḍinya Iigbia

¹ Mị ụutughian ạkpaariom ịduon mọ mị kátu mun ọbo nyina kemeelom ghan bọ ọto.

² Mịna kụ aḍighi ịdi nyina kemeelom ọto, ạbuanhian kụ kụseenyaan bọ ịmina? Imuton inyina, ạbunon úlho.

³ Ịdipho kụ iḍighi kụ mị ạge bọ ḍịnya phọ ạḍiphe phọ iruom inyina. Mị ụ́wa oru ẹpe kụ nyina phọ ghụn kẹḅaalami bọ ologhi phọ ạmi kụ kẹḅile iseere ịmi dọl ọto. Mị alegheri ni akuphom owol mọ ologhi ạmi kụ ạḅaal, pọ ọlo anyina ạḅaal aani ni.

⁴ Mị ụrolom ịminimiin rꞌamukum ologhi rꞌeboom emoghi kụ ịge bọ inyina ḍịnya phọ ạḍiphe phọ. Mị ụ́ge ọphuenom iloghi anyina. Mị ụtuan ghụn mọ iloghoma mọ eekuna ílho ẹphomoghian phọ mị ạphomoghian bọ oomo phọ anyina.

Ịsar ẹwilenaan uwo ạsipioghom mọ

^5-6 Ilegheri mọ oye phọ ạngo bọ ịiḅaghami phọ ịpe mị aghol bọ kụ ạge ọ́phue ologhi ạmi ooleeny ịlo anyina — kụ ạri ologhi ọlo ạmi phọ ạpu aani ni ịminighan. Mị kạ́liom mun nyọdi apeelhe. Ịdipho nyina mẹḅoph bọ ni ọnhu eroph nyọdi ogbeph phọ mẹkasian ni.

⁷ Nyịidipho phọ ịsar bịn ẹwilenaan ẹkparami ghan ologhi ọdi, ọbo ologhi phọ ọdi kạgurogh ghan bọ nyọdi akiigh.

⁸ Mị rịlhom ni inyina mọ mẹkpe dị ọdi kạḅile aloghoma mọ nyina ẹpomoghian ni nyịno.

⁹ Mị ụge ni bịn olegheriom mọ nyina répogh ghan ghisigh ạmi kụ kẹnaghanan tọrobo ọkal ịyaar lọ mị ịḅeni inyina.

¹⁰ Oye lọ nyina ẹsar ẹwilenaan, pọ mị mạsar ri ạbilenaan aani. Ạmi ạmi, oye lọ ạpioman kụ mị mạsar ạwilenaan, pọ mị ughol ẹmhu anyina ghisigh aKraist kụ ạsar bọ ạwilenaan.

¹¹ Yoor ụ́wa mọ aSetan ạkpar upu iyira. Yoor olegheri ni okuphom owol mọ ọdi ạman ịkala.

Ologhi ạPol ọ́pho ẹpe Troas

¹² Mem mọ mị asi bọ Troas ọghaaph ooḅi ọghaaph phọ aKraist, mị ụmiin ni mọ Ọmoogh-we phọ maghughuron ni eghuugh oḍighi phọ ạbile.

¹³ Kụ ịdipho mị ụ́miin bọ Tạitos ọnyo asiya phọ ayira, aloor ạmi ípooph bịn mị ạḅeni bụo ẹmha phọ mọ ọmaar ọrol kụ mị aten bọ anyeene Masidonia.

AKraist kụ rạngo ghan ọkpar opu

¹⁴ Kụ ạḍiseph edianaan ni Ẹnaan. Ọdi mụkpotonom iyoor phọ mosiph bọ ọḅaranaan Kraist ḍita igiri ọkpar opu phọ ọdi. Ụsighe ghan iyoor ịdipho eeḅi eḍu dị ephur reeleghaan oomo arikpisi, mọ oḍighi ịdi olegheri ịlo aKraist keeleghaan aani.

¹⁵ Yoor kụ eeḅi eḍu ịnsens phọ aKraist rasuanaan ghan bọ Ẹnaan. Eḍu phọ repur ghan ni kẹteeny bụphe rọpel bọ kotene rꞌạbuphe ropeeghu bọ.

¹⁶ Esi ạbuphe ropeeghu bọ, eḍu phọ ẹlo aḍuugh-aḍuugh; esi ạbuphe rọpel bọ kotene, eḍu phọ ẹlo aghuḍum. Ạnhian nụun kụ ạmanam bọ ọmeera oḍighi ịphen phọ?

¹⁷ Yoor ụ́kigh aani ịbadi ạbunon phọ ọsighe bọ ọghaaph phọ Ẹnaan kụ rọwaam bọ ikpoki phọ. Yoor phọ Ẹnaan kụ erom bọ ẹḅile repogh rọ́kaaphom ghan iguegue, ịdi eḍighi bọ yoor ạbuo aKraist.