2 Bụo ạKorint 11 - Ạḍinya Iigbia

ẠPol rꞌabutelhedom ọkpe phọ

¹ Mị aḅo ẹphurukpu ịlo elologhi, iseseeny ipogh ni bịn ịwilenaan ịmi.

² Mị rịseeghian ni inyina ịdipho Ẹnaan, loor esi dị nyina ẹkigh ọser-sẹr esina ọnyani dị olephiri ọony kólhegheri dị mị aguan ọnughenyan oniin oye — Kraist.

³ Oḅio ạmi rakaph ni mụdi Eru keḍighi ni dị iloghi phọ anyina kẹpuphogh bịn nyina ẹbile ọkuom aloor phọ anyina Kraist ọmadan, ịdipho ẹkaraph-ịyaar phọ ẹsighe bọ iguegue phọ eekeleghiom Iiv.

⁴ Mị mạmiin ni mọ nyina rekuraam ghan ni tọrobo oye lọ aru ạghaaph ịlo ạJizos dị ạgbatanaan nyọpo ayoor ịḅeni inyina. Nyina ẹḅile kẹn ni ekuraam uwaloor rꞌooḅi ọghaaph dị ẹgbatanaan ni ẹmadan ịpe yoor ịḅeni bọ inyina.

⁵ Mị úmeeraam rꞌẹnum mọ mị asoorom ni apu butelhedom mọ ạbuphe nyina reephughemi ghan bọ.

⁶ Iini sịen mị ụ́maar oghelegel ọghaaph, kụ mị alegheri ẹmhu ịpe mị rạkaaph bọ. Yoor rọma ghan ni ịphen phọ kiḍeenaan inyina oomo amem esi oomo areten.

⁷ Mị inyina ịyaar ímuulaan mem mọ mị ạghaaph bọ ooḅi ọghaaph phọ ịḅeni inyina. Ịdipho mị asooromi bọ loor aḍighi ghan oḍighi phọ oopho ịlo ọbughiom anyina, eḍighi ni ọpioman ḍụghum?

⁸ Mem mọ mị raḍighi bọ oḍighi phọ sịphe ogbo phọ anyina, ạbuo ịnon ạsiosi kụ ụkpe ghan ịmi ikpoki. Oḍighom ọghaaph, mị ụmooph ghụn ni bịdi ọloghonaan anyina ḍịghaagh.

⁹ Ḅịle yira ọrolan bọ kụ ikpoki ikuom bọ ni ịmi, mị inyina dool ikpoki ị́leti. Bụo asiya phọ odi bọ Masidonia uruom ni ịmi oomo ịlo ikuom ịmi. Ịdipho mị ạrol bọ mem mọ ọpo eten bọ kụ ịdi mị kạtol li ạkiom ghisigh. Mị inyina dool ikpoki kị́leti.

¹⁰ AKraist alegheri ni mọ ịphen mị rạkaaph bọ ịne ni. Mị raatuma ni mọ ẹphen eelhe phọ Ạkaya mị ụ́sighe ooko phọ ạmi ugbi kꞌoye.

¹¹ Ịphen mị rạkaaph bọ ẹkigh mụdi mị inyina ị́phomoghian ḍụghum? Eeye, Ẹnaan elegheri ni mọ mị ịphomoghian ni inyina.

¹² Mị kạpamanam ni eḍighinom ịyaar phọ ạmi, ọbo bụphe nyina reephughemi ghan bọ kọmoogh ghan bọ ịyaar ọghaaph ootumaam mọ bụno roḍighi aani ni ọdo phọ oḍighi phọ yoor oḍighi bọ.

¹³ Awe phọ ạbuphe kábugey abutelhedom — bịdi eepua abutelhedom dị rọgbaam ọkpe oḍighi phọ ạbidi ọḅile okue rọwa ghan ọghigh aani abugey abutelhedom mọ aKraist.

¹⁴ Te, phọn eeghe nụun? Ghạlamo aSetan bịn atue ni azuughian ạkigh aani ọokpaany ạḍiḅaal.

¹⁵ Eḍighi ịphen phọ bịn eḍeenaan mọ iikia ílho dị awe oḍighi phọ ọdi kozuughian ọkigh aani we oḍighi aruukuan phọ. Ruukuna phọ kọkpe ni bịdi ịlo ẹkasian oḍighi oye rꞌoye.

Ịminimiin dị ạPol maghol oḍighi phọ ạmiinom

¹⁶ Mị ạḅile ni rạḅem mọ ọnyo anyina kụ́utughian mọ mị uwelologhi. Kụ oye lọ ạatughian ịduon, pọ kụ́bile ọngo uwelologhi phọ mọony eepoogh ootuma aani.

¹⁷ Kụ ọlo Ọmoogh-we phọ kụ ọ́lhogh ologhi ạmi ịphen mị rạkaaph bọ. Sịen ọghaaph iituma phọ, mị ạkaraghi ni rạkaaph ịlo arolologhi.

¹⁸ Kụ ịduon ịbadi momite bọ ọtuan ịkaraph ạruuphua aḅirini phọ rootuma, mị kaatuma aani ni.

¹⁹ Ịdipho nyina rꞌaloor anyina mẹsu bọ ogbogh ologhi phọ, mị ameeraam ni mọ nyina rẹmiloghom ghan ni bụo arolologhi kẹwilenaan.

²⁰ Tọrobo oye lọ ịphamam inyina ḍịikpara ạḍighaagh, ịmooph inyina, ịḍaaghi inyina, ịḅitonaan inyina, aaḅorogh rukpo anyina, nyina rẹbilenaan ghan ni.

²¹ Eḍighi ni umugholoor dị mị kạḅem mọ yoor ụ́kpaph ẹphiph ọdo awe phọ ạbuphe phọ! Eru mạar dị oye ạmoogh ni ịyaar omighirom oghol ootumaam — kụ ọlo oboh ịduon phọ eḍighi ni ọghaaph uwelologhi — pọ mị kamighirom ni akol aatumaam aani.

²² Bịdi kootuma mọ bụno awe aHibru ḍụghum? Pọ mị odi aani ni. Mọ bụno aweye Ịzirel? Mị odi aani ni. Mọ bụno bụo ẹemara Ebraham? Mị odi aani ni.

²³ Mọ bụno bụo oḍighi aKraist? Mị odi aani ni. Ẹkigh mụdi mị ụbomoghan, kụ ạri mị kụ oomo phọ ịdi. Mị kụ mạkpar ḍịghaagh apu. Mị kụ magbor ạtol ikoli. Mị kụ ọdi ụ́gba mem ọguroghom ịkpara. Mị kụ magbor ghan amuzaan ḍuugh.

²⁴ Oogh ọdo amem bụo aJu phọ ụgurogh ghan ịmi ịraardi rꞌesugha ạsigur.

²⁵ Ịraar ọdo amem bụo aRom ụguroghom bọ ịmi rạḅam. Eniin amem awe uroḅol ịmi ikpo. Ịraar ọdo amem mị ạgbana bọ otu-ḅualhe kụ eniin amem mị ụrol li ụmuum ḍiniin aḍughul rꞌoniin ootaany.

²⁶ Sịphe ịbadi oghirighaan erelhe phọ ạmi, mị mazuan ni omuzaan aḍuugh ạmuum-aḍigho rꞌạruḅa rꞌạraghaagh ạbuo aJu eelhe phọ ạmi, ḅịle rꞌaruuruen phọ. Mị mazuan kẹn ni omuzaan aḍuugh ologhi igbogh ạramha rꞌạradala rꞌotu-ḅualhe ḅịle rꞌịkaraph asiya.

²⁷ Oḍighi rꞌelhoman emuza ni; ịbadi amem mị ụrol ghan ni ẹnaani; mị umugh ghan ni ọkoony eḍien rꞌạmuum; ịbadi amem mị ụ́moogh ghan eḍien rꞌoonmenemineen. Mị ụrol ghan ni ooroogh.

²⁸ Epel ịphen aloor phọ ạmi, ḍio etum ḍio mị ạḅaram ni ẹemor adool oḍighi ạsiosi phọ mị arool bọ.

²⁹ Omeeraam oye kụ adugh, pọ rudughe aani ni ịmi. Oye kụ ameel aḍighanaan ịkaraph, pọ musiphe ịmi umugholoor.

³⁰ Eḍighi iituma, pọ mị kaatumaam rạraar phọ ịpe reḍeenaan ghan bọ ọdo aḍidugh phọ ạmi.

³¹ Ẹnaan rꞌỌde phọ ạJizos Ọmoogh-we phọ, ẹpe ạḍiseph edianaan bọ ḍien phọ ọdi kꞌagee-pọ, elegheri ni mọ mị ọkpe rạ́gba.

³² Mem mọ mị ạrol bọ Dạmaskos, ọpo atum bọ Ọdaam Ạretas ạlogh bụphe rokori ghan bọ rụnhu-aḍibuo ẹmha phọ mọ usiph ịmi.

³³ Kụ ụlogh ni ịmi egunum oḅughe epogh iikpe ẹmha phọ ọkpaaghi oseere ude kụ mị asuma ạḍua.