2 Ạbudaam 9 - Ạḍinya Iigbia

Ookuom mụnum ẹmhu aJehu mọ ạda Ịzirel

¹ Ilaisa oyil phọ Ẹnaan ạmagh oniin sịphe ariil phọ kụ ạḅeni mọ, “Nyạaghian ạkparamian loor ạna, ạsighe eeko ạmunum ạpham, ạghi Ramot Gịliad.

² Nạ masi ẹpe phọ, wạ Jehu ọony phọ ạJehosafat ọony phọ aNimsi, ạḅeni nyọdi mọ ḅetenu sịphe abumor phọ ọdi rꞌọdi odi bọ, ạpham nyọdi ạghi aḍighom ẹpe ạnyu otu phọ,

³ ạsighe eeko ạmunum mọ aakuom ẹmhu ọdi kụ ạḅeni mọ, ‘Ọmoogh-we phọ ạḅem mọ ọno maḍighi nyịna ọdaam Ịzirel,’ bịn aghughuron eghuugh otu phọ, asuma ạḍua. Kạ́tol sịphe atoph mem.”

⁴ Kụ ọnyo ugheel ọony oyil phọ ạghi Ramot Gịliad.

⁵ Kụ mem dị ọdi ạghi bọ asi ẹpe phọ, ạbuo ạrumhu awe ẹgham mọ ọtologhu ude, kụ ọdi ạḅeni mọ, “Mị ạmoogh ni ịyaar ọḅeni ạna uwo ẹmhu phọ.” Kụ aJehu apuru nyọdi mọ, “Ạnhian sịen aḍita phọ ayoor?” Kụ ọdi ạḅem mọ, “Nạ uwo ẹmhu phọ.”

⁶ Kụ ọdi aḅetenu ạghi aḍigh otu, kụ onyugheel ọony oyil phọ ạsighe mụnum mọ aakuom ẹmhu aJehu kụ ạḅeni nyọdi mọ, “Ọmoogh-we Ẹnaan phọ Ịzirel ạḅem mọ, ‘Mị maḍighi nyịna ọdaam Ịzirel awe phọ ạmi.

⁷ Kori alhereghi ọto kꞌEhab asiemi ude, ẹrol dị mị akori ạle ghẹlhe ịḅaal abutelhedom mọ ạmi rꞌịḅaal oomo abutelhedom Ọmoogh-we phọ ḍịghaagh ạJezebel.

⁸ Mị kaguulemi ni oomo ọto kꞌEhab, apiemi tọrobo olephiri ọony mꞌọnyo arisigh mꞌọnyo ẹbene sịphe Ịzirel.

⁹ Kụ mị kaḍighi ọto kꞌEhab ịdipho ọto kꞌaJeroboam ọony phọ aNebat rꞌịdipho ọto kꞌaBaasa ọony phọ Ahaija.

¹⁰ Asuogh kụ kẹba Jẹzebel ẹpe ade iizo phọ ạJezreel. Oye nyọdi ráḍi.’” Kụ ọnyo ugheel ọony oyil phọ aghughuron eghuugh phọ asuma.

¹¹ AJehu roḅula kụ iigbo phọ ọdi opuru nyọdi mọ, “Ạraraar edi ika? Uw-ẹlaal phọ ọpo phọ ạwa ghan nyịna ịlo eeghe?” Kụ aJehu ạphagharanaan mọ, “Nyina elegheri ni ịyaar phọ ọdi rạwa bọ.”

¹² Bịdi mọ, “Eeye, yoor úlegheri. Ụḅeni iyoor ịpe ọdi ạḅem bọ.” “Ọdi ụḅeni ịmi mọ Ọmoogh-we phọ ạḅem mọ, ‘Mị maḍighi nyịna ọdaam Ịzirel.’”

¹³ Mem mem mọ, iigbo phọ aJehu ọdeeghi rukpe sịphe ẹsiinyom otu phọ ọdi katen bọ, ophula yogh ruuḍue kụ ọlo ghan mọ, “AJehu ọdaam!”

Ịdi oghiigh bọ Jọram ọdaam mọ Ịzirel

^14-15 Kụ aJehu agbiighi ịlo oghiigh ạJoram ọdaam mọ, mem dị ọdi ạghi ẹpe Jẹzreel rookonoma ịyaar phọ ọdi aḍighima bọ mem mọ ẹgham mọ ọdi rꞌạHazael ọdaam mọ ạSiria eeghi bọ ẹpe Ramot. Kụ aJehu ạḅeni iigbo phọ ọdi mọ, “Eḍighi ịyaar dị nyina edi ni rꞌạmi, pọ kémeera oye amite ẹphen Ramot, ọbo kạki ghan bọ ạpur rụru we ẹpe Jẹzreel.”

¹⁶ Kụ ọdi aḍigh oghuugh-ude ọdi anyeene Jẹzreel. Mem mọ ọphon ạJoram kőmoon, kụ Ahazaya ọdaam mọ aJuda atu ọmiin ọdi.

¹⁷ Oye dị odi otu ogona aloor ẹpe Jẹzreel ạrol kụ ạmiin dị aJehu rꞌawe ọdi rotu, kụ ạlho mọ, “Mị ạmiin we dị rotu.” Kụ ạJoram ạphagharanaan mọ tom oye aḍigh ạsu aghiilom ạghi apuru mọ, “Nyina ịga ni?”

¹⁸ Kụ otelhedom mọ ạghi ạteeny Jehu, kụ apuru mọ, “Ọdaam mọ rạwa olegheri mọ nạ ratu ịdipho ọyaghiri ḍụghum.” “Ịpe kị́iḅaghami ạna,” kụ ẹdi aJehu ạphagharanaan kụ ạḅeni nyọdi mọ, “Ḍigh ẹpe ọman ạmi.” Oye okoriom otu-iḅiligha phọ ạḅeni bịdi mọ otelhedom mọ mạteeny ni we phọ kụ ọlo rátigheel.

¹⁹ Kụ orom ọnon otelhedom dị ạghi kụ apuru ḍiniin phọ aḍipuru phọ kẹn. AJehu ạḅile ạḅeni nyọdi mọ, “Ịpe kị́iḅaghami ạna! Ḍigh ẹpe ọman ạmi.”

²⁰ Oye okoriom otu-iḅiligha phọ ạḅile kẹn ạḅem mọ otelhedom mọ mạteeny ni we phọ, kụ ọlo rátigheel. Kụ ạloghom mọ, “Ọpo aḍiemiom bọ rakiilom ni oghuugh-ude phọ ọdi ịdipho uw-ẹlaal, kụ ạkigh ni Jehu!”

²¹ Kụ ạJoram ọdaam mọ ạto ạḅeni we phọ ọdi mọ, “Imitiom oghuugh ẹgham mọ ạmi.” Kụ ọdi rꞌọdaam Ahazaya oḍiku rughuugh ẹgham mọ ạbidi ọghi ọteeny aJehu. Bịdi uzuan nyọdi ẹpe ozo aNebot.

²² ẠJoram apuru Jehu mọ, “Nạ ratu ni rꞌẹepho?” AJehu ạphagharanaan mọ, “Ẹepho kẹtol bọ ika, mem dị ịkaaghineen ạraraar rꞌạghama dị ạJezebel onhiin phọ ạna kụ amiigh ediighi ni?”

²³ ẠJoram ạlho ạghiom ạnyu mọ, “Ahazaya, ịphen phọ ịkaraph ophiemi eelhe,” kụ ọdi akiton oghuugh-ude phọ ọdi anyeene osuma.

²⁴ AJehu amitiom ẹkpina kụ ạraph nyọdi, kụ emeelom ọman ạJoram, dị ẹghi ẹteeny ekpom ọdi. Kụ ọdi ameel pạ oghuugh-ude phọ ọdi kụ amugh,

²⁵ kụ aJehu ạḅeni Bidkar oye ẹgham mọ rakori ghan bọ nyọdi mọ, “Sịghe oḍim mọ ọdi aroph ẹpe ozo phọ aNebot. Tụutughian mọ, mem mọ nạ rꞌạmi rokiilom bọ ọman Ehab ọdaam mọ, Ọmoogh-we phọ ạḅa ni ikpo ọnhu ịlo Ehab:

²⁶ ‘Mị ụmiin ni ịpe oghiigh bọ Nebot rꞌạnmuny phọ ọdi iḍue phọ, kụ mị uguanaan ni mọ mị kạmiine ni nyịna sịen ozo phọ ọphon phọ.’ Ịduon kụ iḍighi kụ sịghe oḍim mọ ạJoram aroph ẹpe ozo phọ aNebot, omuneni ịpe Ọmoogh-we phọ aguanaan bọ.”

Ịdi oghiigh Ahazaya ọdaam mọ aJuda

²⁷ Ahazaya rọmiin ịpe eḍighi bọ kụ ọdi aghiil rasuma ẹpe ẹlo ẹmha ạBet Hagan, aJehu rꞌawe ẹgham mọ ọdi ophoroghan nyọdi. Kụ aJehu amooghaam we ẹgham mọ ọdi mọ, “Ikiigh aani nyọdi,” kụ bịdi oḍighi nyọdi ịyaar. Ọdi ạkparagham ni ạghi asi ẹpe Gur, esi dị etuman ẹmha Ibleam. Kụ ọdi ạkparam ni asi ẹmha aMegido kụ agbi omugh.

²⁸ Ạbuo iiḍighi phọ ọdi ụsighe ni oḍim mọ ọdi osiemi ẹpe Jeruselem, kụ oḍi nyọdi sịphe ariiḍi ạbudaam mọ ẹpe ẹmha phọ aDevid.

²⁹ Ahazaya amiigh ọda aJuda lhạ phọ ạḍiphe emuneniom bọ ḍioph rꞌaḍiniin kꞌamem mọ ạJoram ọony Ehab amiigh bọ ọda Ịzirel.

Ịdi oghiigh Jẹzebel ạnir ọdaam mọ

³⁰ AJehu aru asi ẹpe Jẹzreel, kụ ạJezebel rọnaghan rạraar phọ emite bọ kụ amiigh ọto. Ọdi agbula urianya riḍien, aselemian sịlaal ọdi, kụ aghughuron eghuugh-ookuugh otu ogiga ọdaam mọ kụ aphogh ghan ẹpe oḅodo phọ.

³¹ Kụ aJehu aru asi pạ ọnhu-aḍibuo otu ọdaam mọ, ạnir phọ rọmiin nyọdi kụ ạlho ạmagh mọ, “Nạ Zimri! Ọziom-we! Nạ ạtu eeghe kụ aru sịen?”

³² AJehu rophogh ạnyu kụ ạlho mọ, “Ạbunhian kụ ọdi ạga ạmi?” Ịyal mọ ịraar ạbuo arukumuan sịphe otu ọdaam mọ ophogh loor eghuugh-ookuugh kụ ọmiin nyọdi ẹphen ude phọ,

³³ kụ aJehu ạḅeni bịdi mọ, “Isiph nyọdi eroph ẹphen ude!” Kụ bịdi osiph nyọdi otebeeny ude, kụ ịḅaal phọ ọdi ẹsaraghiom iikpe phọ rꞌạrusu phọ. AJehu aḍigh rụsu rꞌoghuugh-ude phọ ọdi, kụ ạsiinyom ạnyu oḍim ạnir phọ.

³⁴ Ọdi aghiil aḍigh pạ otu ọdaam mọ ạrol alhe eḍien. Kụ agbi ọḅem mọ, “Ịsighe oḍim ọḅoria phọ ạnir phọ ọphon ẹghi eḍi, ịdi eḍighi bọ ọdi ọkpanyan ọdaam.”

³⁵ Awe phọ ọghi bọ oḍi ọdi ụmiin ọkeeghi ẹmhu phọ ọdi rꞌịḅarara ạraghaagh rꞌaruwol phọ ọdi bịn.

³⁶ Bịdi rorigheel, kụ ọghaaph ịduon phọ ọḅeni Jehu, kụ ọdi ạḅem mọ, “Ịphen kụ ịdi Ọmoogh-we phọ ạḅem mọ keḍighi, mem mọ ọdi ạḅaam bọ ọnhu phọ Ilaija otelhedom mọ ọdi kụ ạḅem bọ mọ: ‘Asuogh kụ kẹba ruzu ạJezebel ẹpe ade iizo phọ ạJezreel.

³⁷ Mọ iphulupul ọdi kẹwalala ni ịdipho ạriir ịnam, ịdi oye kátue ạlogh elegh.’”