2 Ạbudaam 8 - Ạḍinya Iigbia

Ạnir ọlo aSunem mọ atigheel

¹ Kụ Ilaisa ạḅeni ạnir phọ ọpo ọdi aakonom bọ mọony phọ ọdi aḍume mọ, “Ḅetenu, nạ rꞌọto kꞌạna. Isuma egheel ekpisi lọ nyina ketue ẹtol, ịdi eḍighi bọ ịgbakuro phọ Ọmoogh-we phọ maseere bọ sịen ade phọ kẹtol li oḍual ạsia.”

² Kụ ạnir phọ aḅetenu aakoroghian ạtuugh ịpe oye phọ kꞌẸnaan ạḅeni bọ nyọdi aḍighi, kụ ọdi rꞌọto kꞌọdi osuma ogheel ẹpe eelhe phọ aFilistia ọrol ẹpe phọ oḍual ạsia.

³ Kụ remunughan oḍual phọ ạsia phọ, kụ ạnir phọ ạḍua ẹpe ade phọ aFilistia agheel. Kụ ọdi ạghi amoghiom ọdaam mọ Ịzirel ịlo otu phọ ọdi rꞌade phọ ọdi.

⁴ Ọdaam mọ odi rapuru ghan Gehazi otelhedom mọ oye phọ kꞌẸnaan mọ, “Kạaph oomo igbogh ạraraar phọ ịpe Ilaisa aḍighi yogh bọ ụḅeni ịmi.”

⁵ Ịdipho aGehazi rạkaaph bọ kạḅeni ọdaam mọ ịpe Ilaisa aḅeton bọ mọony dị amugh aḍume, bịn ạnir phọ ọpo Ilaisa aḅeton bọ mọony phọ ọdi aḍume aru asi. AGehazi ạḅeni mọ, “Ọde-otu ạmi ọdaam mọ, ọphon kụ ạnir phọ, ọphon kụ ọony phọ ọdi ọpo Ilaisa aḅeton bọ aḍume.”

⁶ Kụ ọdaam mọ apuru ạnir phọ, kụ ạnir phọ ạghaaph oomo ịpe emite bọ ạḅeni ọdaam mọ. Kụ ọdaam mọ ạma oniin otelhedom ọdi ạngo ạnir phọ, kụ ạḅeni mọ, “Kịa ạsighe oomo ạraraar phọ ịpe eru bọ ịlo ạnir phọ ọphon, aḅulemi ạngo nyọdi; ạḅaram ikpoki oomo ariiḍien phọ ẹrol bọ sịphe iizo phọ, emiigh kꞌaḍio phọ ạḍiphe ọdi ạḍua bọ kụ ẹteeny kꞌarodon.”

Ilaisa rꞌạBen Hadad ọdaam mọ ạSiria

⁷ Ilaisa ạghi Dạmaskos loor esi dị ạBen Hadad ọdaam mọ ạSiria aloor ị́nighe, kụ ọḅeni nyọdi mọ, “Oyil kꞌẸnaan odi ni ẹphen.”

⁸ Kụ ọdaam mọ ạḅeni Hạzael mọ, “Sịghe ruunmo ạpham ạghi ạteeny oyil phọ Ẹnaan apuru ḍipuru esi Ọmoogh-we phọ mụghumo mị kaḍum ni ẹzegh phọ ẹphen.”

⁹ Kụ ạHazael aakpomoghi oomo igey ạraraar phọ edi bọ Dạmaskos, ạpham ruunmo dị inyadi ạsikamel kụ ketool, ạghi asi ạmeera risigh Ilaisa kụ ạḅeni mọ, “Ọony phọ ạna ạBen Hadad ọdaam mọ ạSiria kụ urom ịmi mọ mị utu apuru nyịna mọ ọno kaḍum ni ẹzegh phọ eḍighi bọ nyịno.”

¹⁰ Kụ Ilaisa ạḅeni nyọdi mọ, “Keel ạḅeni nyọdi mọ ọdi kaḍum ni. Kụ ọlo Ọmoogh-we phọ muḍeenaan ịmi mọ ọdi kamugh ni.”

¹¹ Kụ Ilaisa akiton aphogh Hạzael ạnmagharan risigh phọ ọdi tụtu umugholoor rasiph nyọdi. Kụ oye phọ kꞌẸnaan amoghi.

¹² ẠHazael apuru mọ, “Iḍighi ika kụ ọde-otu phọ ạmi ramoghi bọ?” Kụ ọdi ạphagharanaan mọ, “Mị alegheri ni ịkaraph dị nạ kaḍighi we phọ Ịzirel. Nạ kạsu nịan oomo ariisi phọ ạbidi ịpe ọkuami bọ oselemi. Nạ kạsighe elhool ẹgham ạziom oomo ugheel ạnmuny phọ ạbidi. Nạ kạze ịbam ạnmuny phọ ạbidi bụphe rọmaam bọ. Kụ nạ kabiighi oomo ạnmariir phọ ạbidi bụphe roomorogh bọ.”

¹³ ẠHazael apuru mọ, “Otelhedom mọ ạna eeghia, aghoogh ḍụghum dị kaḍighi yogh bọ oomo imananaan phọ ịphen phọ?” Kụ Ilaisa ạphagharanaan mọ, “Ọmoogh-we phọ muḍeenaan ịmi mọ nạ kụ kạsighe dọl ạBen Hadad ọdaam mọ ạda Sịria.”

¹⁴ ẠHazael ạḍua sịphe kꞌIlaisa agheel kꞌọde-otu phọ ọdi. Kụ ạBen Hadad apuru nyọdi mọ, “Ilaisa ạḅeni nyịna ika?” Kụ ọdi ạphagharanaan mọ, “Ọdi ụḅeni ịmi mọ nạ kaḍum ni.”

¹⁵ Kụ rẹḅaal kụ ạHazael ạsighe ogbigiri ukpe asumeeny ologhi ạmuum ạsighe azuom risigh ọdaam mọ tụtu amugh. Kụ ạHazael ạsighe dọl phọ ọdi ạda.

ẠJehoram ọdaam mọ aJuda

¹⁶ Ẹman bọ oogh ạsia mem mọ ạJoram ọony phọ Ehab aḍighi bọ ọdaam mọ Ịzirel, kụ ạJehoram ọony phọ ạJehosafat amiigh ọda Juda.

¹⁷ Ọdi ạman bọ ịraardi rꞌịyal ạsia mem mọ dị aḍighi bọ ọdaam; kụ ọdi ạda Jeruselem ọphaanya ạsia.

¹⁸ Ọdi ạdaph ni oomo areten eḍighinom ạraraar phọ ạbudaam mọ Ịzirel, ịdipho ọto kꞌEhab; ịdi eḍighi bọ ọnyani Ehab kụ ạnir ọdi kụ ọdi aḍighi ịkaraph risigh Ọmoogh-we phọ.

¹⁹ Kụ ị́ḅeeraan Ọmoogh-we phọ ophiemi aJuda loor ẹmhu aDevid otelhedom mọ ọdi loor ịpe ọdi aguanaan bọ mọ ọno kạngo nyọdi ọtozi, ạngo kẹn nmụny phọ ọdi kꞌagee-pọ.

²⁰ Amem mọ ọdi kụ ẹdi awe phọ Idom ọgbatanaan bọ Juda, ọḍua ọghi omitiom ọdaam ọlo ạbidi.

²¹ ẠJehoram ạsighe oomo arughuugh-ude phọ ọdi ạghimom asi ẹpe Zair, aḅetenu ḍughul ạze we Idom bụphe oko bọ nyọdi okitonom. Kụ awe ẹgham mọ ọdi osuma ogheel ẹpe arugbogo phọ ạbidi.

²² Kụ Idom ọgbatanaan ọḍua ḍịghaagh aJuda, bịdi ọḍua kꞌarodon. ALibna ọgbatanaan aani mem mọ ọpo.

²³ Ọghaaph phọ ạJehoram rꞌiiḍighi phọ ịpe esugha bọ dị ọdi aḍighi yogh bọ, ọsighe ni ịphen phọ ọge sịphe ạḍinya phọ ịpe emiteghu bọ mem ạbudaam mọ aJuda.

²⁴ ẠJehoram amugh ạtuonom bụrude phọ ọdi, kụ oḍi nyọdi sịphe oḍi bọ bụrude phọ ọdi ẹpe Jeruselem ẹmha phọ aDevid. Kụ Ahazaya ọony phọ ọdi ạsighe dọl phọ ọdi ạda.

Ahazaya ọdaam mọ aJuda

²⁵ Ẹman bọ ḍioph rꞌịyal ạsia mem mọ ạJoram ọony phọ Ehab ạda bọ Ịzirel kụ ẹdi Ahazaya ọony phọ ạJehoram amiigh ọda Juda.

²⁶ Ahazaya ạman bọ ịyaldi rꞌịyal ạsia kụ amiigh bọ ọda, kụ ọdi ạda Jeruselem ḍiniin ạlha. Ḍien onhiin phọ ọdi ughol mọ Atalaya ọnyani Ọmri ọdaam mọ Ịzirel.

²⁷ Kụ Ahazaya ạdaph ịkaraph areten eḍighinom ọto kꞌEhab, kụ ọdi aḍighi ịkaraph risigh Ọmoogh-we phọ, ọdo eḍighinom ạraraar phọ ọto kꞌEhab loor esi dị ọdi ọnyogo ọto kꞌEhab.

²⁸ Ahazaya ạdaph Jọram ọony phọ Ehab ạghi eenom ẹgham Hạzael ọdaam mọ ạSiria ẹpe Ramot Gịliad, kụ awe phọ ạSiria oḍighi Jọram ịyaar, ọlogh ẹgha.

²⁹ Kụ ạJoram ọdaam mọ aḅula ạghi Jẹzreel ookonoma ẹgha phọ awe phọ ạSiria ọlogh bọ nyọdi ẹpe Ramot mem mọ ọdi ạghi bọ azuom ẹgham mọ Hạzael ọdaam mọ ạSiria. Kụ Ahazaya ọony phọ ạJehoram ọdaam mọ aJuda ạghi ophogh ạJoram ọony phọ Ehab ẹpe Jẹzreel, ịdi eḍighi bọ dị ómoon.