2 Ạbudaam 7 - Ạḍinya Iigbia

¹ Ilaisa ạphagharanaan mọ, “Ịnaghan ịdi Ọmoogh-we phọ ạḅem. Iḍue ọdo phọ amem mọ ạmuen, kobool ghan ịraar igbogh ịtoom ẹemor ịgbieneen ịbiakpa oniin opoḍi asilva, odiiny igbogh ịtoom ẹemor abali oniin opoḍi asilva, sịphe eḍighom aSameria.”

² Uw-ẹmhu ạbuo ẹgham ọdaam mọ ọpo ọdi ạbeḍenom bọ ẹmhu ạphagharanaan oye phọ kꞌẸnaan kụ ạḅem mọ, “Mạar ạnaghan. Eru mạar dị Ọmoogh-we phọ kakunyon rughuugh ookuugh ẹpe kꞌạke, ịphen phọ kemite ni?” Kụ Ilaisa ạḅeni mọ, “Nạ kạsighe ni ịyal phọ ariḍien phọ ạna ạmiinom, kụ ọlo nạ kále aani.”

Bụo ẹgham mọ ạSiria ọḍuaghu

³ Inya awe dị ẹzegh ọku ufe eḍighi ụrol ghan sịphe eḍighom ẹmha phọ aSameria, kụ oniin apuru nyoniin mọ, “Yira kọtol sịen bịn tụtu yira omugh?

⁴ Eru mạar dị yira oḍigh ẹpe ologhi ẹmha phọ, iboom ịgbakuro edi ni ẹpe ologhi ẹmha phọ kụ yira komugh ni. Kụ eru mạar dị yira ọrol sịen phọ pọ yira komugh ni. Nyịidipho itu ọghi oḍigh ẹpe arugbogo awe ẹgham mọ ạbuo ạSiria phọ, kụ eru mạar dị bịdi iyira ụ́ze pọ yira moḍum. Eru mạar dị bịdi ụze iyira, pọ omugh.”

⁵ Aḍughul rekul kụ bịdi ọghi ẹpe arugbogo phọ ạSiria, bịdi ọtol ropogh rugbogo phọ ạSiria, oye ólho sịphe phọ,

⁶ ịdi eḍighi bọ Ọmoogh-we phọ maḍighi ịdi awe ẹgham mọ ạSiria ọnaghan ḍịgum arughuugh-ude rꞌạrusu rꞌạḍigum awe ẹgham, kụ oniin ạḅeni nyoniin mọ, “Pogh. Ọdaam mọ Ịzirel mụtuan iyira apir ọdaam mọ ạHitait rꞌọdaam mọ Ijipt mọ oru uzuom iyira.”

⁷ Kụ bịdi oḅetenu mem dị aḍughul rekul osumughu ọwile oomo arugbogo phọ ạbidi rꞌạrusu rꞌịnam adool phọ ạbidi; ọwile rugbogo phọ ịdipho ẹrol bọ osumughu loor ẹmhu aghuḍum ạbidi.

⁸ Mem dị bụphe ẹzegh ọku ufe phọ eḍighi bọ ọghi osi eḍighom arugbogo phọ, bịdi ọghi oḍigh oniin ogbogo olhe eḍien ọphughol mụum. Bịdi orool silva rꞌagol rꞌarukpe ọsighe ọpham ọḍuanam ọghi ạaghi, kụ oḅula ọghi oḍigh ọnon ogbogo orool rạraar ogbogo phọ ọsighe ọḍuanam ọsighe ọghi ạaghi.

⁹ Kụ oniin ạḅeni nyoniin mọ, “Ịphen yira roḍighi bọ ị́nighe. Arodon phọ ạḍien phọ aḍio igey ịinaghan, kụ yira oḅoorian ni bịn. Eru mạar dị yira ọrol sịen phọ kụ ẹḅaal, pọ ịminimiin kisoroghuom ni iyira. Kụ iḍighi nyịidipho ọghi ọghaaph ọḅeni kꞌọdaam mọ.”

¹⁰ Kụ bịdi ọghi Sameria kụ ọmagh we phọ rokori bọ ẹmha phọ kụ ọḅeni bịdi mọ, “Yoor ụghi ẹpe arugbogo ạSiria, kụ rꞌoye yoor ụ́miin. Rꞌẹḍogh oye yoor ụ́naghan. Ọkpooghi rụsu phọ ạbidi, ọkpooghi ịnam adool phọ ạbidi. Ịdipho arugbogo phọ ẹrol ghan bọ kụ ịdi edi ni.”

¹¹ Kụ ọdi ạmagh bụphe rokori ghan bọ eḍighom ẹmha phọ kụ bịdi ọghaaph ịphen phọ ọḅeni bụphe odi bọ sịphe otu ọdaam mọ.

¹² Ọdaam mọ aḅetenu ḍughul kụ ạḅeni butelhedom mọ ọdi mọ, “Mị kịḅeni ni inyina ịdi bụo ạSiria mụtuan iyira ookolobian. Bịdi olegheri ni mọ yira odi ọkoony. Kụ iḍighi kụ bịdi ọtu bọ ọḍuaghu ẹpe arugbogo phọ ạaghian yogh ologhi eḍum. Bịdi ọotughian mọ, ‘Mem lọ bịdi ọḍua sịphe ẹmha phọ omite, yira kosiphi bịdi imoom kụ oḍigh ẹmha phọ.’”

¹³ Kụ oniin otelhedom mọ ọdi ạphagharanaan nyọdi mọ, “Seseeny, bịle buniin awe ọsighe oogh ạrusu phọ ịpe esugha bọ sịen ẹmha ọghi, pịdi ọmiin ịpe emite phọ.”

¹⁴ Kụ bịdi ọsaḅar buniin awe ḅịle rꞌịyal arughuugh-ude rꞌạrusu, kụ ọdaam mọ arom bịdi mọ ọghi ẹpe arugbogo awe ẹgham mọ ạSiria ophogh.

¹⁵ Kụ bịdi ọdaph bịdi ọghi osi ẹpe Jọdan, kụ, oomo phọ eten phọ arukpe rꞌạraraar ẹgham dị bụo ạSiria phọ oroḅologhi bịn kụ imuza. Kụ ạruukpaany phọ oḅula, kụ ọḅeni ọdaam mọ.

¹⁶ Awe phọ ọghi ẹpe arugbogo phọ ạSiria, kụ owum oomo ạraraar phọ. Kụ ịphen phọ eḍighi ịdi aal ghan ịraar igbogh ịtoom ẹemor ịgbieneen ịbiakpa oniin opoḍi asilva, odiiny igbogh ịtoom ẹemor abali oniin opoḍi asilva, ọdaph ịpe Ọmoogh-we phọ ạghaaph bọ.

¹⁷ Kụ ọdaam mọ ạma uwo ẹmhu ạbuo ẹgham mọ nyọpo ọdi ạbeḍenom bọ, mọ ọdi aphogh ghan eḍighom ẹmha phọ, kụ awe phọ Ịzirel ọozeghi nyọdi bịn amugh, ịdipho oye phọ kꞌẸnaan ạghaaph bọ mem mọ ọdaam mọ ạghi bọ asi kꞌọdi.

¹⁸ Imite ni ịpe oye phọ kꞌẸnaan ạghaaph bọ ạḅeni ọdaam mọ mọ, “Kobool ghan ni ịraar igbogh ịtoom ẹemor ịgbieneen ịbiakpa oniin opoḍi asilva, odiiny igbogh ịtoom ẹemor abali oniin opoḍi asilva ọdo phọ amem mọ ạmuen iḍue, sịphe eḍighom aSameria.”

¹⁹ Kụ uwo ẹmhu ạbuo ẹgham mọ ạphagharanaan bọ oye phọ kꞌẸnaan mọ, “Eru mạar dị Ọmoogh-we phọ kakunyon rughuugh ookuugh ẹpe kꞌạke, ịphen phọ kemite ni?” Kụ ọdi ạḅeni mọ, “Nạ kạsighe ni ịyal phọ ariḍien phọ ạna ạmiinom; kụ ọlo nạ kále aani.”

²⁰ Kụ imitenaan ni nyọdi ịdipho. Awe phọ ụuzeghi ni nyọdi sịphe eḍighom ẹmha phọ, kụ ọdi amugh.