2 Ạbudaam 4 - Ạḍinya Iigbia

Ilaisa ạloghonaan ḍịghaagh uwekulom ekpukele ạnir

¹ Ekpukele ạnir sịphe aḍita ariil phọ amoghi ạmagh Ilaisa kụ ạḅeni mọ, “Olhom mọ ạmi otelhedom mọ ạna mamugh, kụ nạ alegheri ni mọ olhom mọ ạmi otelhedom mọ ạna aghiilaan ghan ni Ọmoogh-we phọ. Kụ oye dị atene nyọdi ọmugh atu ọsighe ịyal phọ ạnmuny phọ ạmi oḍighi rẹbene ọdi.”

² Kụ Ilaisa apuru ạnir phọ mọ, “Mị aḍighinaan nyịna eeghe? Ụḅeni ịmi eeghe ịyaar kụ ẹdi nạ ạmoogh sịphe otu phọ ạna?” Kụ ạnir phọ ạḅeni mọ, “Mị otelhedom mọ ạna ụ́moogh rꞌẹnum ịyaar sịphe otu phọ, emuton ote ạmunum bịn.”

³ Kụ ọdi ạḅeni mọ, “Kịa kꞌasimatuman phọ ạna ạlomi rete lọ ịyaar ụ́logh ologhi. Lọm ni ịminighan.

⁴ Kụ mem dị nạ aḅula aḍigh otu, kughiom nmụny phọ ạna rꞌạna otu, ạsighe mụnum mọ ạsanyan sịphe ologhi arete phọ, ạsighe ghan ọlo mamuza aseere ọgbal.”

⁵ Kụ ạnir phọ ạḍua sịphe kꞌọdi agheel kụ aghughiom nmụny phọ ọdi rꞌọdi otu; kụ bịdi ọsighe rete phọ ọobemi loor ạbidi, kụ ọdi ạsighe ghan mụnum mọ ạsanyan.

⁶ Mem dị ạmunum mọ mamuza oomo phọ arete phọ, kụ ạnir phọ ạḅeni mọony phọ ọdi mọ ạsighe ọnon ote aruom nyịno. Kụ ọdi ạḅeni ạnir phọ mọ ọnon ote ólho mun. Bịn ạmunum mọ ómite mun.

⁷ Ạnir phọ ạghi ạḅeni oyil Ẹnaan phọ. Kụ ọdi ạḅeni nyọdi mọ, “Keel aalhaghi mụnum mọ, ạsighe ạkpiom ọmugh phọ, kụ nạ rꞌạnmuny phọ ạna ẹsighe ịpe esugha bọ ẹrolom.”

Ilaisa rꞌọolha-ạnir ọlo aSunem

⁸ Eniin aḍio kụ Ilaisa ạghi ẹpe Sunem. Oniin ukueni-ạnir dị arugh ẹpe phọ ạkpaariom nyọdi mọ alhe eḍien kꞌọno. Tọrobo amem lọ ọdi raten ẹpe phọ, ọdi aḍigh sịphe kꞌạnir phọ alhe eḍien.

⁹ Kụ ạnir phọ ạḅeni olhom mọ ọdi mọ, “Mị ragbi mọ oye phọ ọphon phọ rạ́gba ghan bọ mem oten ịsien, oye iigbia kꞌẸnaan.

¹⁰ Seseeny, ọloghonaan nyọdi mọony ẹnum otu ọsighe ẹmina, ạgada, ịdaabili rꞌọtozi oseenaan nyọdi sịphe otu phọ, ẹrol dị tọrobo amem lọ ọdi aru, ọdi ạtol ghan sịphe otu phọ.”

¹¹ Eniin aḍio kụ Ilaisa ạghi ẹpe phọ kụ ạghi aḍigh sịphe otu phọ ạmina.

¹² Kụ ọdi ạḅeni Gehazi otelhedom mọ ọdi mọ, “Ụmaghanaan ạnir ọlo aSunem phọ.” Kụ ọdi ạmagh ạnir phọ. Ạnir phọ aru ạmeera risigh ọdi.

¹³ Ilaisa ạḅeni Gehazi mọ, “Seseeny, ḅẹni nyọdi mọ nạ ụtuan iyoor kụ ạmiinom bọ ịminimiin dị eleeny ịduon, kụ oḍighinaan nyịna eeghe, mị ụkaaph ịlo ạna ụḅeni ọdaam mọ mụghumo uwo ẹmhu ạbuo ẹgham mọ ḍụghum?” Kụ ạnir phọ mọ, “Mị rꞌasiya ạmi odi. Ịyaar ịmi íkuom.”

¹⁴ Ilaisa apuru Gehazi mọ, “Koḍighinaan bọ ạnir phọ ọphon phọ eeghe?” Kụ aGehazi ạphagharanaan mọ, “Ạnir phọ ọphon phọ ọ́moogh mọony, kụ olhom mọ ọdi mạkpo.”

¹⁵ Kụ Ilaisa ạḅeni Gehazi mọ, “Mạgh ạnir phọ.” Kụ ạnir phọ ạghi ạmeera sịphe eghuugh phọ.

¹⁶ Kụ Ilaisa ạḅeni nyọdi mọ, “Nana ọdo amem mọ ạmuen, nạ kakuraam ni mọony olephiri ọony rụgbo ạna.” Kụ ạnir phọ ạḅem mọ, “Eeye, oye dị ụmoogh ịmi. Nạ oye kꞌẸnaan, kạ́gbaam ọkpe ọnyani-otu phọ ạna.”

¹⁷ Ạnir phọ aamor kụ ạmar olephiri ọony ọdo phọ amem osoor phọ ịdipho Ilaisa ạḅeni bọ ạnir phọ.

¹⁸ Eniin aḍio mem dị ọony phọ maphoph ạmanam, ọdi ạghi kꞌọde phọ ọdi, dị odianaan rꞌabụphe roogbo bọ ịbiakpa.

¹⁹ Kụ ọdi ạḅeni ọde phọ ọdi mọ, “Ẹmhu ạmi repin ni; ẹmhu ạmi repin ni.” Kụ ọde phọ ạḅeni otelhedom ọdi mọ, “Sịghe mọony phọ ạghiom onhiin phọ ọdi.”

²⁰ Kụ ọdi aḅeton mọony phọ ạsighe ạghiom onhiin ọony phọ. Rọteeny ootaany bịn ọony phọ amugh.

²¹ Kụ onhiin phọ ạsighe nyọdi ạghi ạmuneen ẹmina oye phọ kꞌẸnaan aghughiom otu aten aḅula.

²² Ạnir phọ ạmagh olhom mọ ọdi kụ ạḅeni mọ, “Seseeny ụmaghanaan ịmi oniin oye rꞌẹnam adool ẹrol dị mị akiil ạki ạteeny oyil phọ Ẹnaan kụ mị uḅula.”

²³ Kụ ọdi apuru nyọdi mọ, “Iḍighi ika kụ nạ rạki bọ ọmiin ọdi rodon? Kómoom ụnwanyu, ḅịle kẹn káḍio ophooghian.” Kụ ạnir phọ mọ, “Ẹnighe ni.”

²⁴ Ạnir phọ aselemi ẹnam adool phọ kụ ạḅeni otelhedom mọ ọdi mọ, “Ụsaany ịmi ọghi. Kiil onyeene. Kạ́koronaan sịen nạ ụsaany bọ ịmi emuton lọ mị kụ ạḅeni nyịna mọ dughiom.”

²⁵ Ạnir phọ ạghi ạteeny oye phọ kꞌẸnaan ẹpe Eegum ạKarmel. Kụ oye phọ kꞌẸnaan ạrol ạmiin nyọdi ẹpe egher dị ratu, kụ ạḅeni Gehazi otelhedom mọ ọdi mọ, “Pogh ẹpe risigh. Ọpo phọ ạnir ọlo aSunem phọ ni.

²⁶ Seseeny, kiil ạghi azuan nyọdi apuru mọ, ‘Ụga ni? Ẹḅaal li nyịna rꞌolhom mọ ạna rꞌọbumoony phọ?’” Kụ ạnir phọ ạphagharanaan mọ, “Ẹnighe ni.”

²⁷ Ạnir phọ ạghi ạteeny oye phọ kꞌẸnaan ẹpe Eegum ạKarmel, kụ ạpham ruwol ọdi. Kụ aGehazi ạghi ọopoghion ọdi ọsighe, kụ oye phọ kꞌẸnaan ạḅeni mọ, “Bịle nyọdi. Ologhi ọdi ọ́ḅaal. Ịyaar rẹeḅaghami ni nyọdi. Kụ Ọmoogh-we phọ ạaghinaan ni ịmi, ịmi kụ̋ḅeni.”

²⁸ Kụ ạnir phọ apuru mọ, “Ọde-otu ạmi. Mịna ḍịen ụ́ḅeni nyịna mọ mị rạwa mọony? Mịna nyịna ụ́ḅeni mọ ịmi kúukeleghi?”

²⁹ Kụ Ilaisa ạḅeni Gehazi mọ, “Nmeenmenian ạsighe ịkpara phọ ạmi ạpham ạghimom. Nạ azuan oye eten ụ́magh ghan, kụ oye ạmagh nyịna, ụ́meera ghan. Nạ masi, ạsighe ịkpara phọ ạmi ạḅam sịphe arisigh ọony phọ.”

³⁰ Kụ onhiin ọony phọ ạḅem mọ, “Ịdipho Ẹnaan phọ edi bọ ni kụ uwaloor ạna odi bọ ni, mị nyịna rạ́wile.” Kụ ọdi aḅetenu ạdaph ạnir phọ.

³¹ AGehazi aḍia ghan kụ ạsighe ịkpara phọ ạḅam risigh ọony phọ, kụ ọony phọ óloghoma loor, eḍeenaan aghuḍum ị́tol. Kụ ọdi aḅula ạghi azuan Ilaisa, kụ ạḅeni nyọdi mọ, “Ọony phọ ósuma.”

³² Kụ Ilaisa ạghi aḍigh sịphe otu phọ ạmiin ọony phọ ọdi ọmuneen sịphe ẹmina phọ dị mamugh.

³³ Kụ ọdi ạghi aḍigh otu, kụ aghughiom nyọdi rꞌọony phọ otu kụ ạaḅereghi Ọmoogh-we phọ.

³⁴ Kụ ọdi ạghi ạminanam mọony phọ, kụ ạsighe ọnhu ọdi azuom ọnhu ọony phọ, ạsighe riḍien ọdi azuom riḍien ọony phọ, ạsighe rạghaagh ọdi ạkpasi rạghaagh ọony phọ kụ aḅololoom mọony phọ, kụ aloor ọony phọ emiigh ọghologhol.

³⁵ Kụ ọdi aḅetenu arelhe yogh ạghi arelhe aḅula, kụ ọdi ạḅile ạghi aḅololoom mọony phọ kụ ọony phọ ạzia oḍual amem kụ ọony phọ ạḅarion riḍien.

³⁶ Kụ ọdi ạmagh Gehazi ạḅeni mọ, “Mạgh ạnir ọlo aSunem phọ.” Kụ ọdi ạmagh ạnir phọ, kụ ạnir phọ ạghi ạteeny nyọdi. Kụ ọdi ạḅeni mọ, “Ḅeton mọony phọ ạna.”

³⁷ Ạnir phọ ạghi aḍigh ameel sịphe aruwol phọ ọdi ezuemi, azumeri risigh ọdi ude. Ạnir phọ aḅeton mọony phọ ọdi amitenom ạḍua.

Ịnon ịyal ịiḍaany

³⁸ Ilaisa ạḅile ạghi ẹpe Gịlgal kụ ịgbakuro edi ẹpe eelhe phọ. Kụ ariil ạrikia phọ ọtologhu ude osoman nyọdi. Kụ ọdi ạḅeni otelhedom mọ ọdi mọ, “Sịghe ogbogh aguugh ạdepheri ạsaanaan mooboph ariil phọ.”

³⁹ Kụ oniin ọnyo ạbidi ạghi ẹpe aleeny phọ ogbo ịikiripha kụ ạmiin loor azin olhom avain ḍịkporogho kụ ạsighiogh aakpomoghi ạkiriph ạlogh sịphe ologhi aguugh amooboph phọ bịdi úlegheri ịdo phọ ịikiripha phọ.

⁴⁰ Kụ bịdi okorogh mooboph phọ ọngo we phọ mọ ile, kụ bịdi rotiom mooboph phọ, kụ bịdi ọlooghi ọḅeni oye phọ kꞌẸnaan mọ, “Aḍuugh edi ni sịen ologhi aguugh phọ.” Kụ bịdi ọwile, úle mun eḍien phọ.

⁴¹ Kụ Ilaisa ạḅeni mọ, “Ịsighe ịgbieneen ịbiakpa iruom.” Kụ ọdi ạsighe ạsagharan sịphe ologhi aguugh phọ. Kụ ọdi ạḅeni mọ, “Ikorogh ẹngo we phọ bịdi ole.” Ịyaar aḍuugh ílho mun sịphe aguugh phọ.

⁴² Kụ oniin oye ọlo ẹpe Baal Salisa ạḍua aru ạpham eḍien ịḅel iimuma ịyaldi iiḅoghoḍi ạbred abali aruomonaan oyil phọ Ẹnaan ḅịle rꞌịbiakpa dị adoghoḍi ologhi ạkpuru dị ạpham. Kụ Ilaisa ạḅeni otelhedom mọ ọdi mọ, “Sịghe ạngo we phọ bịdi ole.”

⁴³ Kụ otelhedom mọ ọdi apuru mọ, “Esi ika kụ ẹdi mị katue bọ ạngo nyẹen oniin okuron awe?” Ọdi ạḅile ạḅeni nyọdi mọ, “Ngọ we phọ bịdi ole. Ọmoogh-we phọ ạḅem ịduon mọ bịdi kole ni kụ esugha.”

⁴⁴ Kụ ọdi ạsighe eḍien phọ ạngo bịdi, kụ bịdi ole. Kụ esugha ịdipho Ọmoogh-we phọ ạḅem bọ.