2 Ạbudaam 3 - Ạḍinya Iigbia

Ẹgham Ịzirel rꞌạMoab

¹ Ẹman bọ ḍioph rꞌọphaanya ạsia ạJehosafat ạda bọ Juda, kụ ạJoram ọony phọ Ehab amiigh ọda Ịzirel ẹpe Sameria kụ ọdi ạda ḍioph rꞌịyal ạsia.

² Kụ ọdi aḍighi yogh ịkaraph dị ị́nighe ghisigh Ọmoogh-we phọ, kụ ọdi ọ́kar eeph ịdipho ọde phọ ọdi rꞌonhiin phọ ọdi. Ọdi agbonyon igbudu phọ aBaal ịpe ọde phọ ọdi ạḅol bọ.

³ Kụ ọlo rꞌẹnum ọdi ọ́wile ịkaraph phọ ịpe aJeroboam ọony phọ aNebat aḍighi bọ, ịpe eḍighi bọ ịdi Ịzirel oḍighi yogh ịkaraph.

⁴ AMesa ọdaam mọ ạMoab aakonom ghan ịminighan aḍita iyool-ịga kụ ọdi ạghiom ghan oniin okuron ọonir ạnmuny iyool-ịga rꞌasuphuugh oniin okuron ọonir idughuna, ịdipho osogh ọdaam mọ Ịzirel.

⁵ Kụ Ehab romugh bịn ọdaam mọ ạMoab ạnyaaghian bịn ạghi azuom ẹgham Jọram ọdaam mọ Ịzirel.

⁶ Kụ ạJoram ạḍua ẹpe Sameria eniin phọ amem mọ, kụ ạghi aakpomoghi we ẹgham mọ ọdi.

⁷ Kụ ọdi ạghi kụ arom ạghiom Jẹhosafat ọdaam mọ aJuda ạḅeni mọ, “Ọdaam mọ ạMoab ạnyaaghian ni bịn atu uzuom ịmi ẹgham. Nạ kụdaph aani ni ịmi ḍụghum yira ọki ozuom Mọab obiom ẹgham?” Kụ ọdi ạḅeni mọ, “Mị kạdaph ni nyịna ạki. Mị pọ ạna. Nạ pọ ạmi. Awe phọ ạmi awe ạna. Ạrusu phọ ạmi, pọ ạrusu ạna.”

⁸ Kụ ọdi apuru nyọdi mọ, “Yira kokiton nyẹghen eten kụ ọki?” Kụ ọdi ạphagharanaan mọ, “Yira kokiton eten phọ nyẹpe ẹdala phọ Idom.”

⁹ Kụ ọdaam mọ Ịzirel rạki rꞌọdaam mọ aJuda rꞌọdaam mọ Idom. Bịdi orelhe ẹdi ẹman oḍual aḍughul-otu. Kụ ạmuum ólho sịphe arugbogo phọ ẹpe phọ; ólho kẹn mụo ịnam mọ bịdi ọpham bọ rọkimom.

¹⁰ Kụ ọdaam mọ ọpo Ịzirel ạḅem mọ, “Sey ị́nighe, mọ Ọmoogh-we phọ mạmagh ịraar phọ ạbudaam mọ ạbuen aakpomoghi ọḅogh ạbidi ạlogh ḍịghaagh ạMoab.”

¹¹ Kụ ạJehosafat apuru mọ, “Oyil Ẹnaan ólho ẹphen phọ ḍụghum ọlo yira kọki opuru ḍipuru Ọmoogh-we phọ esi ọdi?” Kụ oniin otelhedom ọdaam mọ Ịzirel ạphagharanaan kụ ạḅem mọ, “Ilaisa ọony phọ aSafat odi ni ẹphen, ọpo akumu bọ Ilaija.”

¹² Kụ ạJehosafat ạḅem mọ, “Ọdi ọkar oyil ịmiin.” Kụ ọdaam mọ Ịzirel rꞌạJehosafat ọdaam mọ Idom ọghi ọteeny nyọdi.

¹³ Kụ Ilaisa apuru ọdaam mọ Ịzirel mọ, “Mịna rꞌạna eeghe rꞌeeghe? Mịna kaḍighinaan nyịna eeghe? Kịa ẹpe kꞌariil ọde phọ ạna rꞌariil onhiin phọ ạna.” Kụ ọdaam mọ Ịzirel ạḅeni nyọdi mọ, “Eeye, ịdi eḍighi bọ Ọmoogh-we phọ mụmagh iyoor ịraar phọ ạbudaam mọ ạbuen ụḅogh iyoor ạlogh ḍịghaagh ạMoab.”

¹⁴ Ilaisa ạḅeni nyọdi mọ, “Ịdipho Ẹnaan Oomo Ịikpo edi bọ ni, ọpo mị ạmeera bọ risigh phọ ọdi, mụghumo mị rạ́miin bọ Jẹhosafat egey ẹzo, ọbo mị nyịna múpogh, mị nyịna mụ́miin.

¹⁵ Ịki ẹsighe otiom ogumogum ẹpham erumom.” Kụ otiom ogumogum mọ ọdi rati kụ ịikpo Ọmoogh-we phọ ẹsiiny nyọdi,

¹⁶ kụ ọdi ạḅem mọ, “Ọmoogh-we phọ ạḅem ịduon mọ, ‘Iguphogh riini sịphe ariḍiiny phọ.’

¹⁷ Ọmoogh-we phọ ạḅem ịduon mọ, ‘Nyina kẹ́miin oghim, ḅịle kẹn nyina kẹ́miin ọlophia, kụ ạmuum kamuza ni ẹpe ariḍiiny phọ mụdi nyina rꞌịnam anyina kẹpughol.

¹⁸ Ịphen phọ ị́man ịyaar esi Ọmoogh-we phọ. Ọdi katorori we phọ ạMoab ạlogh ḍịghaagh anyina.

¹⁹ Nyina kepiemi ni oomo ạramha phọ ạbidi ịpe oghoony bọ, rꞌoomo igbogh ạramha phọ ạbidi, elereghi oomo igey ireeny phọ ạbidi, eḍueghi oomo asighuḍia phọ ạbidi, ẹsighe sighiigh ẹphuenom oomo ade phọ ạbidi.’”

²⁰ Rẹḅaal ḍịroor, ọdo phọ amem mọ ọpo rọpighiron ghan ẹkia ạḍiroor phọ kọngo Ẹnaan, bịn ạmuum ạḍua ẹpe Idom aru amuza oomo ade phọ.

²¹ Mem dị awe phọ ạMoab ọnaghan bọ mọ ạbudaam mọ rotu ozuom ạbuno ẹgham, kụ oomo ạbuphe ọmanam bọ ọghi ẹgham ookpomoghan omunughian ịlo ẹgham, emiigh ugheel ạnmuny kụ ẹteeny ikumoor awe, ọghi ọmeregha ẹpe ọku phọ.

²² Kụ bịdi oḅon oḅetenu esoph ạḍiroor, kụ ogogo rạmu kasoorom mụum mọ, kụ awe phọ ạMoab ọmiin dị ẹpe ạḍieri phọ ạḍighaagh phọ rẹtogh ịdipho ịḅaal.

²³ Kụ bịdi ọḅem mọ, “Ịpe phọ ịḅaal. Ịraar phọ ạbudaam mọ rꞌawe ẹgham mọ ạbidi mọzian siloor. Ụgua itu ọghi owum rugbogo phọ ạbidi.”

²⁴ Kụ bịdi ọghi osi ẹpe arugbogo phọ Ịzirel kụ awe phọ Ịzirel oḅerenu ọghi ọze we phọ ạMoab, kụ bịdi ọḍua esomanan Ịzirel osumughu, kụ bịdi ophorogh Mọab ọze osiemi ẹpe ẹmha phọ ạbidi.

²⁵ Kụ bịdi olhereghi oomo ạramha phọ ạbidi ophiemi rꞌoomo igey arere phọ, kụ oye ye ạsighe ghan ḍighiigh oroḅologhi sịphe ade phọ, oḍueghi oomo asighuḍia ạrumuum mọ, olhereghi oomo igey ireeny; emuton ẹpe Kir Heres kụ ẹdi bịdi ọwile.

²⁶ Mem dị ọdaam mọ ạMoab ạmiin bọ mọ ẹgham mọ mẹkpar epu nyịno, ọdi ạsighe oḍual okuron awe bụdi ọmaar ịlo elhool ẹgham ọḅaram nyọdi ạay oḍigh ọghi ọteeny ọdaam mọ Idom, kụ ị́ḅoph.

²⁷ Bịn ọdi ạsighe okumoor ọony ọdi ọpo mụsighe bọ ạgada ọdaam ẹmha phọ ọdi mem lọ ọdi amugh, ạphighironom ẹkia oguom ạnian ạnyu iikpe ẹmha phọ ạngo ẹnaan ạMoab. Kụ akuboom aruugu asiph we phọ Ịzirel kụ bịdi ọwile nyọdi kụ oḅula eelhe ạbidi.