2 Ạbudaam 22 - Ạḍinya Iigbia

AJosaya ọdaam mọ aJuda

¹ AJosaya ạman bọ ọphaanya ạsia kụ amem dị ọdi amiigh ọda aJuda. Kụ ọdi ạda bọ ịraardi rꞌoniin ạsia ẹpe Jeruselem. Ḍien onhiin phọ ọdi ughol mọ aJedida ọnyani phọ Adaya ọlo aBozkat.

² AJosaya aḍighi ghan ịdi eseleman risigh Ọmoogh-we phọ, ạdaph oomo areten phọ aDevid ọde phọ ọdi kụ arelhe ghan. Ọdi ókiton oḅula ọ́ghi mꞌeliom mꞌekeeny.

Ọmiin ḍịnya Iilogh phọ

³ Rẹman ḍioph rꞌọphaanya ạsia aJosaya ọdaam mọ ạda bọ, kụ ọdaam mọ arom Safan ọony phọ Azalaya ọony phọ aMesulam, ọgeeghia ạrinya phọ, mọ ạghi sịphe Otu Ịiḅereghi phọ rꞌadom mọ ạḍien:

⁴ “Kịa ạteeny Hịlkaya uwo ẹmhu oyil ạrikia phọ ạḅeni mọ ọdi agbi ikpoki phọ edi bọ sịphe Otu Ịiḅereghi phọ, ịpe ạbuphe rokori ghan bọ sịphe ọnhu-aḍibuo phọ ạanyi bọ we phọ Ịzirel.

⁵ Bịdi ọsighe ọngo ọlogh ḍịghaagh ạbuphe roḍighi ghan bọ iiḍighi phọ, ịpe bụphe ropogh ghan bọ Otu Ịiḅereghi phọ. Bịdi ọsighe ọngo bụo iiḍighi phọ bụphe odi ghan bọ sịphe Otu Ịiḅereghi phọ, ọsighe oselemiom riisi lọ mẹphu sịphe otu phọ.

⁶ Bịdi ọsighe ọngo bụo ạmaka phọ rꞌạbuphe rodoghoḍi ghan bọ rutu phọ rꞌạbuphe roselemi bọ rukuron phọ, ọsighe oghoom ireeny rꞌasighiigh lọ mạayagh ọsighe oselemiom Otu Ịiḅereghi phọ.

⁷ Bịdi rꞌawe phọ ạbuphe bịdi ọngo bọ ikpoki phọ rógbiighian ịdi eḍighi bọ eeghe; bịdi awe oḍuom ologhi.”

⁸ Kụ ạHilkaya uwo ẹmhu oyil ạrikia phọ ạḅeni Safan ọgeeghia ạrinya phọ mọ, “Mị mạmiin ḍịnya Ologh phọ ạḍiphe ephe bọ sịphe Otu Ịiḅereghi phọ.” Kụ ạHilkaya ạsighe ḍịnya phọ ạngo Safan kụ ọdi ạal.

⁹ ASafan ọgeeghia ạrinya phọ ạghi ạteeny ọdaam mọ kụ ạḅile aḅulemi ạghaaph ạḅeni ọdaam mọ kẹn kụ ạḅeni mọ, “Otelhedom mọ ạna maakpomoghi ikpoki phọ ịdi ọmiin sịphe Otu Ịiḅereghi phọ, kụ mọḅogh ọngo ḍịghaagh ạbuphe roḍighi bọ oḍighi phọ, bụphe ropogh bọ Otu Ịiḅereghi phọ.”

¹⁰ Kụ aSafan ọgeeghia ạrinya phọ aḍeenaan ọdaam mọ kụ ạḅeni mọ, “ẠHilkaya uwo ẹmhu oyil ạrikia phọ ụngo ni ịmi ḍịnya phọ aḍien.” Kụ aSafan ạal sịphe risigh ọdaam mọ.

¹¹ Mem dị ọdaam mọ ạnaghan bọ ịpe edi bọ sịphe ạḍinya Ologh phọ, bịn dị ạphanyi rukpe ọdi loor ọto.

¹² Ọdaam mọ ạlogh ologh ạngo Hịlkaya oyil ạrikia phọ rꞌAhikam ọony phọ aSafan rꞌAkbor ọony phọ aMikaya rꞌaSafan ọgeeghia ạrinya phọ rꞌAsaya otelhedom ọdaam mọ ạḅeni mọ,

¹³ “Ịki ipurunaan ịmi rꞌawe phọ rꞌoomo aJuda ḍipuru esi Ọmoogh-we phọ ịlo oomo ọghaaph phọ ịpe edi bọ sịphe ạḍinya phọ ọmiin bọ. Ọghagh ologhi phọ Ọmoogh-we phọ ạbugh ni, ọpo ọdi rụghagham bọ iyira, ịdi eḍighi bọ ạburude phọ ayira ụ́naghanam ịphen edi bọ sịen ạḍinya phọ ạḍien, ụ́daph úḍighi oomo ịpe ụtu bọ iyira kụ ọge bọ.”

¹⁴ ẠHilkaya oyil ạrikia phọ rꞌAhikam rꞌAkbor rꞌaSafan rꞌAsaya ọghi ọteeny Hulda oyil-aḍien phọ, ạnir phọ aSalum ọony phọ aTikva ọony phọ aHahas ọpo rasereghi ghan bọ rukpe ariil ạrikia phọ. (Mem ọpo ạnir phọ arugh ẹpe emoom ẹkpigh ẹmha phọ aJeruselem.) Kụ bịdi ọghaaph ịpe emiteghu bọ ọḅeni nyọdi.

¹⁵ Kụ ạnir phọ ạḅeni bịdi mọ, “Ọmoogh-we Ẹnaan phọ Ịzirel ạḅem ịduon mọ ịḅeni oye phọ irom bọ inyina mọ itu esi ạmi phọ,

¹⁶ mọ mị kạsighe ịkaraph ạsighe atu ekpisi phọ ẹpe esoroghuom bụphe orugh bọ ẹpe phọ, oomo ịpe edi bọ sịphe ạḍinya phọ ạḍiphe ọdaam mọ aJuda ạal bọ,

¹⁷ ịdi eḍighi bọ bịdi mughel ịmi rọsuughinaan ghan ịnsens ịnon ạrumugh. Oomo ịpe bịdi ọsighe bọ rạghaagh ạbidi kụ oḍighinom mịngo ịmi ọghagh ologhi. Mị kạkagham ologhi Jeruselem, kụ ạnian dị kótue oḍime eemor.

¹⁸ Kụ ịlo ọdaam mọ aJuda ọpo irom bọ inyina opuru Ọmoogh-we phọ ḍipuru, ịḅeni nyọdi ịduon, mọ Ọmoogh-we Ẹnaan phọ Ịzirel ạḅem mọ: Ịlo ọghaaph phọ ọpo nạ mạnaghan bọ ni,

¹⁹ loor esi dị ologhi ạna mạkonono kụ nạ masooromi loor ạna risigh Ọmoogh-we phọ mem dị nạ ạnaghan bọ ịpe mị ạghaaph bọ ịlo esi phọ ịsien rꞌịlo ạbuphe orugh bọ sịphe phọ mọ koogulemi bịdi ophiemi otonyon osu ọnhu, kụ nạ ạphaanyi rukpe ạna risigh ạmi amoghi yogh, mị mạnaghan ni ịiḅereghi phọ ạna.

²⁰ Kụ iḍighi, mị kạsighe nyịna ạki ạḅophoghiom rꞌạburude phọ ạna ẹpe ọmar iḍim, ọsighe nyịna oḍi sịphe oḍi phọ ạna rꞌẹepho. Nạ kạ́sighe riḍien ạna ạmiinom aani oomo ịkaraph phọ ịpe mị kạsighe bọ atu esoroghuom esi phọ ẹphen.” Kụ awe phọ ọghi ọghaaph ịphen phọ ọḅile ọḅeni ọdaam mọ.