2 Ạbudaam 2 - Ạḍinya Iigbia

Ọsighe Ilaija okeelom kꞌạke

¹ Kụ rẹteeny mem mọ Ọmoogh-we phọ kạsighe bọ ookuugh atu ạsighenom Ilaija akeelom kꞌạke, kụ Ilaija rꞌIlaisa orelhe ọḍua ẹpe Gịlgal

² kụ Ilaija ạḅeni Ilaisa mọ, “Seseeny, tọl sịen. Ọmoogh-we phọ murom ịmi mọ mị ụki ẹpe Bẹtel.” Kụ Ilaisa ạḅeni nyọdi mọ, “Ịdipho Ọmoogh-we phọ odi bọ ni kụ uwaloor ạna odi bọ ni, mị nyịna rạ́wile.” Kụ bịdi oten ọghi osi Bẹtel.

³ Kụ aḍita ariil phọ ẹpe Bẹtel ọghi ọteeny Ilaisa kụ opuru nyọdi mọ, “Nạ alegheri ni mọ Ọmoogh-we phọ kạar ri nyịna ọde-otu phọ ạna rodon?” Kụ ọdi ạḅem mọ, “Ii, mị alegheri ni. Ịmaar ẹphama siloor anyina.”

⁴ Kụ Ilaija ạḅeni Ilaisa mọ, “Seseeny, tọl sịen. Ọmoogh-we phọ ụḅeni ịmi mọ mị ụki Jeriko.” Kụ ọdi ạḅem mọ, “Ịdipho Ọmoogh-we phọ odi bọ ni, kụ uwaloor phọ ạna odi bọ ni, mị nyịna rạ́wile.”

⁵ Kụ aḍita ariil phọ ẹpe Jeriko ọghi ọteeny Ilaisa kụ opuru nyọdi mọ, “Nạ alegheri ni mọ Ọmoogh-we phọ kạar ri nyịna ọde-otu phọ ạna rodon?” Kụ ọdi ạḅem mọ, “Ii, mị alegheri ni. Ịmaar ẹphama siloor anyina.”

⁶ Kụ Ilaija ạḅeni Ilaisa mọ, “Seseeny, tọl sịen. Ọmoogh-we phọ ụḅeni ịmi mọ mị ụki Ọphiiny ạJodan.” Kụ ọdi ạḅem mọ, “Ịdipho Ọmoogh-we phọ odi bọ ni, kụ uwaloor phọ ạna odi bọ ni, mị nyịna rạ́wile.” Kụ ịyal phọ ạbidi oten ọghi.

⁷ Kụ ooghdi ariil phọ ọdaph bịdi ọghi aani, kụ ọmeera egher ropogh ghan bịdi, kụ ịyal phọ ạbidi ọmeera iigbom ạJodan.

⁸ Kụ Ilaija ạsighe dọni phọ ọdi akpooghi ạsighe ạgurom mụum mọ, kụ ạmuum mọ adia ạghi ekeeny rꞌelhiom, kụ ịyal phọ ạbidi orelhe ọḅeeny ḍịgharaghar ade.

⁹ Kụ bịdi rọḅeeny roten kụ Ilaija apuru Ilaisa mọ, “Ụḅeni ịmi ịyaar lọ mị kaḍighinaan nyịna kụ ogbi ọsighe ạmi esi ạna.” Kụ Ilaisa ạḅeni nyọdi mọ, “Seseeny, mị rạaḅereghi ni nyịna. Ḍighi ni ịdi ịyal ọdo uwaloor phọ ọpo odi bọ loor phọ ạna kaḍigh loor ạmi.”

¹⁰ Kụ oḍi ạḅem mọ, “Ịyaar phọ nạ ạlhom bọ ịdi ẹkpar, kụ eru mạar dị nạ kụmiin ni ịmi mem mọ kụsighe bọ ịmi esi ạna, pọ kẹrolonaan ni nyịna ịdipho nạ apuru bọ, kụ mọ nạ ịmi ụ́miin, pọ kẹ́tol ịdipho.”

¹¹ Kụ bịdi otelhe rọki rọkaaph, ekperenom bịn oghuugh-ude ạnian rꞌạrusu ạnian ẹgbarion ịyal phọ ạbidi, kụ oghim ạsighe Ilaija asiemi kꞌạke.

¹² Kụ Ilaisa ạmiin kụ ạlho ạḅem mọ, “Ọde ạmi, ọde ạmi, nạ kụ uḍighi ghan ogbogh ọsuaram aweye phọ Ịzirel.” Bịn ọdi nyọdi ọ́miin mun, kụ ọdi ạsighe dọni phọ ọdi ạphaar ịyal ipoḍi.

¹³ Kụ ọdi ạsighe onyoraam mọ Ilaija ạḍua bọ loor phọ ọdi ameel, kụ aḅula ạghi asi ạmeera iigbom ạJodan.

¹⁴ Kụ ọdi ạsighe onyoraam mọ Ilaija ạḍua bọ loor phọ ọdi ameel ạsighe ạgurom mụum mọ kụ ạḅem mọ, “Odi ẹghen Ọmoogh-we Ẹnaan phọ Ilaija?” Kụ ạgur mụum mọ bịn ạmuum mọ adia bịn Ilaisa ạḅeeny aten.

¹⁵ Kụ ooghdi ariil phọ bụphe aJeriko ọmiin nyọdi kụ bịdi ọḅem mọ, “Uwaloor phọ Ilaija maḍigh loor Ilaisa.” Kụ bịdi ọghi ozuan nyọdi kụ ozumeri yogh risigh ạbidi esomanan Ilaisa.

¹⁶ Kụ bịdi ọḅeni nyọdi mọ, “Nyịidipho ạruukpara dị ọman ooghdi awe odi aani ni sịen rꞌabutelhedom mọ ạna. Seseeny bịdi ọghi ọwa ọde-otu phọ ạna ịdipho oḍighom ịyaar uwaloor Ọmoogh-we phọ kạsighe ni nyọdi ạki ạḅam ạnyu ẹeḅaraph mụghumo esi eḍiiny.” Kụ ọdi ạḅeni bịdi mọ, “Kétom.”

¹⁷ Kụ bịdi ọkpaariom Ilaisa tụtu umugholoor rasiph nyọdi kụ ọdi ạḅeni mọ itom. Kụ bịdi orom ooghdi awe, kụ bịdi ọghi ọwa nyọdi ịraar aḍughul-otu kụ ụ́miin nyọdi.

¹⁸ Kụ bịdi origheel ọteeny Ilaisa ẹpe Jeriko kụ ọdi ạḅeni bịdi mọ, “Mịna inyina ị́ḅeni mọ kẹ́ki?”

Ịiḍaany Ilaisa

¹⁹ Kụ awe ịsiphe ẹmha phọ ọḅeni Ilaisa mọ, “Ịdipho nạ rạmiin bọ ni, ạdol rꞌeḍighinom ịyaar ịsien ẹmha phọ ayoor ẹnighe ni. Kụ ọlo ạmuum ade phọ ọ́nighe, ade phọ ọkpagha.”

²⁰ Kụ ọdi ạḅeni bịdi mọ, “Ịsighe omoom ạmogo iruom ịmi ẹsighe ẹphurukpu aboph ẹlhogh ologhi.” Kụ bịdi ọsighe oruom nyọdi.

²¹ Kụ ọdi aten ạghi ẹpe iiḍiph phọ ạmuum mọ ạḍua ghan bọ kụ ramite. Kụ ọdi ạsighe boph phọ aaku, kụ ạḅem mọ, “Ọmoogh-we phọ ạḅem ịduon mọ mị maakonom mụum mọ. Ẹsighe kꞌạnyiidipho ẹghiom risigh, awe kómugh mun, ade phọ kíḍighi mun ọkpagha.”

²² Emiigh kꞌaḍio phọ ọpo kꞌarodon ạmuum mọ mạnighe, loor ikpo ọnhu phọ ịpe Ilaisa ạḅem bọ.

²³ Kụ Ilaisa ạḍua Jeriko rakeel Bẹtel, atelhe rạki ẹpe eten phọ, bịn ọbam uki ugheel ạnmuny ọḍua sịphe ẹmha phọ omite ọgilaam ghan nyọdi, ọḅeni ghan mọ, “Ḍụa pạ, oye ekpol kpol ẹmhu. Ḍụa pạ, oye ekpol kpol ẹmhu.”

²⁴ Kụ ọdi akiton apogh ọman kụ ạmiin bịdi kụ ạsighe ḍien Ọmoogh-we phọ aruuliom bịdi. Kụ ịyal ịya areephe ạno ẹḍua ẹpe ologhi eḍum emite kụ ịphanyi inyadi rꞌịyal ugheel ạnmuny phọ.

²⁵ Kụ Ilaisa ạḍua ẹpe phọ ạghi asi ẹpe Eegum ạKarmel. Kụ ọdi ạḍua ẹpe phọ arigheel Sameria.