2 Ạbudaam 19 - Ạḍinya Iigbia

ẠHezekaya apuru Azaya oroma ịlo koḍighi

¹ Mem mem mọ ạHezekaya ọdaam mọ ạnaghan bọ ịphen phọ, ọdi ạphanyi ni rukpe ọdi, ạsighe rukpe-ọto ạkpologhian kụ ạghi aḍigh sịphe Otu Ọmoogh-we phọ.

² Ọdi arom ni Ẹliakim ọnyo oḍighi phọ rạpam ghan bọ otu ọdaam mọ, Sebna ọgeeghia phọ, rꞌikumoor ariil ạrikia phọ mọ ọghi ọteeny Azaya oyil phọ ọony phọ Amoz. Bịdi umunughian aani rukpe-ọto.

³ Ḍịen kụ adom dị ọdi arom bịdi ọḅeni Azaya: “Arodon aḍio ịminimiin; rụlhiom iyoor kụ yoor odi dọl aroofola. Yoor ọkigh ạnir dị oghunughun rakun, kụ aloor medugh.

⁴ Ogbogh ọdaam Asiria phọ marom okumoor ọnyo oḍighi ọdi mọ ạgilaam Ẹnaan phọ edi ghan bọ. Eḍighi ni ịdi Ọmoogh-we Ẹnaan phọ ạna kạnaghan rịgilaam mọ ịphen kụ ạliom bụphe uutuuny bọ Ọmoogh-we phọ. Loor ịphen phọ, ḅẹeḅereghi ạngo bụphe osugha bọ sịphe aḍita awe phọ ayoor.”

⁵ Mem dị Azaya ạnaghan bọ dom mọ ạHezekaya ọdaam mọ,

⁶ ọdi aḅulemi ọphagharanaan mọ, “Ọmoogh-we ạḅem mọ aruugu nyịna kúsiph ịlo ọghaaph phọ nạ ạnaghan bọ, ịpe abutelhedom ọdaam mọ Asiria moofolomiom bọ nyịno.

⁷ Mọ ọno kaḍighi ni ịdi ogbogh ọdaam mọ kạnaghan ịphenekpe dị ọdi kaḅula akeel ẹpe ade ọdi, kụ mọ ọno kaḍighi ịdi kokiigh nyọdi ẹpe phọ.”

Ạrumhu awe ẹgham mọ Asiria ọḅile otom ḍịnon adom ịpaarogh

⁸ Ọnyo oḍighi Asiria phọ ạnaghan ni mọ ogbogh ọdaam mọ mạḍua ẹpe Lakis ạki Libna rabe ẹgham; kụ ọdi ạghi aani ẹpe phọ opuru ọdi ịyaar.

⁹ Iru ẹteeny weye Asiria mọ aTirhaka ọdaam mọ ạSudan uwo ẹmhu awe ẹgham mọ Ijipt ratu ozuom ạbidi. Mem dị ogbogh ọdaam mọ ạnaghan ịphen phọ, ọdi ạḅile arom butelhedom ọghi ọteeny ạHezekaya ọdaam mọ aJuda,

¹⁰ kụ ọḅeni mọ, “Kámeera ẹmugh phọ ẹpe nạ aḍuom bọ ologhi eekeleghi nyịna ẹḅem ghan mọ kọ́ḅogh Jeruselem ọlogh ḍịghaagh ọdaam mọ Asiria.

¹¹ Tọ nạ mạnaghan ni ịpe ogbogh ọdaam mọ Asiria maphiemi bọ oomo areelhe phọ aagulemi, kụ nạ ragbi mọ nạ kakpetenaan ni?

¹² Ạburude ạburude ayoor uphiemi ni rạmha aGozan rꞌạHaran rꞌaRezef kụ ọze weye ạBet Iden bụphe orugh bọ Tẹlasar, kụ rꞌeniin ẹmugh ạbidi ítue ị́pel bịdi.

¹³ Odi ẹghen ọdaam mọ ạHamat rꞌọdaam mọ Apad rꞌọdaam mọ aSefaavaim rꞌọdaam mọ aHena rꞌọdaam mọ Iva?”

¹⁴ Kụ ạHezekaya ạar ḍịnya phọ ḍịghaagh abutelhedom mọ kụ ạal. Kụ ạHezekaya ạghi aḍigh sịphe Otu Ọmoogh-we phọ aseere ḍịnya phọ sịphe ogbodo Ọmoogh-we phọ.

¹⁵ Kụ ạaḅereghi mọ, “Nạ kụ Ọmoogh-we Ẹnaan phọ Ịzirel, ọpo ọrolomi bọ okupheriom ogbo ạruukpaany aghuḍuul phọ. Nạ bịn kụ Ọmoogh-we phọ dị ạda oomo areelhe ịsien aḅirini phọ. Nạ kụ ụlhem bọ kẹ phọ rꞌade phọ.

¹⁶ Seseeny ni. Ḅạrion riḍien phọ ạna ạmiin. Ler rụru phọ ạna ạnaghan oomo ịpe ạSenakerib rạḅem bọ ọgilaam Ẹnaan phọ edi ghan bọ kꞌagee-pọ.

¹⁷ Oomo ayoor olegheri ni, Ọmoogh-we, mọ abugbogh ạbudaam mọ Asiria mophiemi ịbadi areelhe, oḍighi ịdi arere ạbidi ịyaar ị́tol mun.

¹⁸ Mọsighe rụmugh phọ ạbidi ọkpooniom nịan — dị íḍighi rụmugh rꞌẹnum, ịkaaneen ạraraar ireeny rꞌasighiigh bịn dị oye kụ aḍighinom rạghaagh.

¹⁹ Kụ iḍighi nyịidipho, Ọmoogh-we Ẹnaan phọ ayoor, seseeny ụtagharan iyoor rạghaagh awe Asiria, ọbo oomo areelhe ịsien aḅirini phọ olegheri mọ nạ, Ọmoogh-we, bịn kụ Ẹnaan.”

Azaya atom dom ạkiom ọdaam mọ

²⁰ Kụ Azaya arom ạghiom Hẹzekaya ọdaam mọ kụ ạḅeni mọ, “Ọmoogh-we phọ ạḅem ịduon mọ ịpe nạ ạtu bọ Sẹnakerib kụ ạaḅereghi bọ, mị mạnaghan ni.

²¹ Ọmoogh-we phọ ạḅem mọ, ‘Ẹmha phọ aJeruselem rẹmilogh ni nyịna, ẹḅile ẹḅitonaan nyịna.

²² Ạnhian kụ ọdi nạ ạatughian bọ mọ nạ rạgilaam ghan kạphue? Ẹnaan Oye Aghuḍuul phọ Ịzirel kụ ọdi nạ azuom. Nạ ịmi eghuan rạ́ngo ghan.

²³ Nạ urom ni butelhedom mọ ạna mọ oobaga risigh ạmi mọ nạ ụsighe ḍita arughuugh-ude phọ ạna ạsiinyom asi ẹpe ạnyu oomo ạraaḅaraph phọ ạLebanon. Nạ aabaga mọ sịphe phọ nạ ubenogh ịkar iiphopha ireeny ọsaga phọ rꞌarugbagu alereghu ude. Nạ aabaga mọ nạ usi ọkar ogbo ẹekpua phọ.

²⁴ Nạ aabaga mọ nạ uguph sighuḍia kụ ạphughol mụum iiruen arere kụ ạrada awe ẹgham mọ ạna ịizeghi Ọphiiny aNail dị emooph ẹgharaghar.

²⁵ “‘Nạ kọ̋naghan mọ mị ugbiighi oomo ịphen kꞌamem dị mebia? Kụ nyịidipho mị maḍighi amitiom. Mị ụngo nyịna ịikpo oḍighi ịdi ạramha phọ ịpe ọkuami bọ ọlogh emeleghu ẹgbenem.

²⁶ Bụphe orugh bọ ẹpe phọ ịnyaam ụ́moogh. Bịdi ụmoogh eepuph kụ ọyegheyeghe. Bịdi ọkigh ịdipho ịizupha ozo mꞌạtugbiir ạroogho mꞌomirimiir dị asi ạnyu otu kụ oghim emitenom erumuḍio phọ kụ aphiemi.

²⁷ “‘Kụ mị alegheri ni oomo ạraraar ịlo ạna, ịlo nạ aḍighi rꞌekpisi lọ nạ ạghi. Mị mạnaghan ni ịlo oboom ophin ologhi dị nạ ụmooghom ịmi.

²⁸ Mụḅeni ni ịmi ịlo ophin ologhi ạna. Iḅo-igbogh phọ ạna meru ni eḍiku reḅeri ạmi. Ịphen kụ iḍighi kụ mị kạsighe ḍiḅaph ạmi ạlogh izon ạna, kụ agborori opoḍi ạmama ọnhu ạna kụ arelhiom nyịna aḅulemi eten phọ nyẹpe nạ arelhe bọ kụ aru.’”

²⁹ Pọ kụ amem dị Azaya ạḅeni Hẹzekaya ọdaam mọ mọ, “Ịphen phọ eḍighi eḍeenaan esi ạna. Lhạ phọ arolhool rꞌạḍinon nạ kale ghan ọdo ạraraar phọ ịphen dị esiighi rꞌaloor; lhạ ḍịphe ketum bọ sịphe nạ katue ni aḅeph kụ abugha, kụ ạzuph iizin avain kụ ale rughuuny iimuma.

³⁰ Ịyal-ikpo ạbuphe okpetenaan bọ sịphe ọto kꞌaJuda, aruwol ạbidi kẹkpaph ni ude emiigh ọmaraghian ọkiom ghisigh.

³¹ Awe kọtol li Jeruselem rꞌẹpe Eegum ạZayon dị kokpetenaan loor esi dị Ọmoogh-we phọ ạnya ni oḍighi ịphen phọ omitiom.

³² “Ịphen kụ ịdi Ọmoogh-we phọ mạḅem ịlo ogbogh ọdaam mọ Asiria: ‘Ọdi káḍigh ẹphen ẹmha phọ kụ kạ́taph rꞌeniin ẹkpina apoghomiom. Rꞌoniin ọnyo ẹgham dị ạpham ọsuaram kátuman ẹmha phọ kụ kódoghoḍi roghoony ọmiinom okoom ẹmha phọ.

³³ Ẹpe eten phọ ẹpe ọdi ạḍua bọ kụ ratu, ẹpe phọ kẹn kụ ẹdi ọdi akiton kụ aḅula. Ọdi rátu oḍigh ẹmha phọ ẹphen. Mị Ọmoogh-we phọ kụ ụḅem ịduon.

³⁴ Mị kagbororian ni sịen ẹmha phọ ạpel ạsighe, loor ẹmhu arughuenian phọ ạmi ḅịle rꞌesi ịpe mị aguanaan bọ Devid otelhedom mọ ạmi.’”

³⁵ Ḍughul aḍio phọ ạḍiphe phọ kụ ọokpaany kꞌỌmoogh-we phọ amite ạghi ẹpe arugbogo Asiria phọ ạze oniin okuron rꞌọphaanyadi rꞌoogh ọonir awe. Esoph ạḍiroor, bịn ọmiin dị bịdi momuughu oḍighi iḍim.

³⁶ Kụ ạSenakerib ogbogh ọdaam mọ Asiria aḅula kụ agheel kꞌọdi ẹpe Nineve.

³⁷ Eniin aḍio ọdi odi rạaḅereghi ghan sịphe otu ẹmugh ọdi dị oghol mọ aNisrok, bịn ịyal ạnmuny ọdi dị oghol mọ Ạdramelek rꞌaSarezer ọsighe rolhool ẹgham obenoghom nyọdi oghiigh, bịn osumughu ogheel ẹpe ade phọ Ạrarat. Kụ Esar Hadon ọnon ọony ọdi ạsighe dọl phọ ọdi ạda.