2 Ạbudaam 15 - Ạḍinya Iigbia

Uzaya ọdaam mọ aJuda

¹ Ẹman bọ ịyaldi rꞌoḍual ạsia aJeroboam II ọdaam mọ Ịzirel ạda bọ kụ amem dị Uzaya ọony phọ Amazaya ọdaam mọ aJuda amiigh bọ ọda aJuda.

² Ọdi ạman bọ ḍioph rꞌodiiny ạsia kụ ọdi agbi bọ ọda phọ. Ạsia dị ọdi ạda bọ ẹman bọ ooghdi rꞌịyal ạsia ẹpe Jeruselem. Ḍien onhiin phọ ọdi ughol mọ aJekolaya.

³ Kụ ọdi aḍighi ghan ịdi eseleman risigh Ọmoogh-we phọ, ạdaph oomo ịpe Amazaya ọde phọ ọdi aḍighi ghan bọ, kụ aḍighi ghan.

⁴ Kụ ọlo bịdi úphiemi riisi ooseeny aruru phọ, kụ awe phọ ụghi ghan ni oḍighi yogh rạraar aghuḍum ọḅile kẹn ọsuughi ghan ịnsens sịphe aroogbolom mọ.

⁵ Ọmoogh-we phọ ạgur ọdaam mọ kụ ẹzegh ọku ufe eḍighi. Uzaya ạrolom ịdipho tụtu ẹteeny ḍio aḍuugh phọ ọdi, ạḍua arugh ghan ḍịo ọdi gem. AJotam ọony phọ ọdi aḍighi uwo ẹmhu sịphe ẹkpigh-otu phọ ạbidi; kụ aagboonaan ghan ịiruen we ịsiphe ade phọ.

⁶ Oomo ịnon ịlo Uzaya rꞌịpe ọdi aḍighi yogh bọ, ọge ni sịphe ạḍinya phọ ịpe emiteghu bọ mem ạbudaam mọ aJuda.

⁷ Uzaya amugh kụ ọsighe nyọdi oḍi otumeniom bụrude phọ ọdi ẹpe Jeruselem ẹmha phọ aDevid. Kụ aJotam ọony phọ ọdi ạsighe dọl phọ ọdi ạda.

ẠZekaraya ọdaam mọ Ịzirel

⁸ Ẹman bọ ịraardi rꞌọphaanya ạsia Uzaya ạda bọ Juda kụ amem dị ạZekaraya ọony phọ aJeroboam II amiigh ọda Ịzirel. Kụ ọdi ạda bọ odiiny ụnwanyu ẹpe Sameria.

⁹ Kụ ọdi aḍighi yogh ịkaraph ghisigh Ọmoogh-we phọ, ọdo ịpe ạburude phọ ọdi oḍighi yogh bọ. Ọdi ọ́wile oomo ịkaraph phọ ịpe aJeroboam ọony phọ aNebat aḍighi yogh bọ, ọpo aḍighi bọ ịdi Ịzirel ọtuan oḍighi yogh ịkaraph.

¹⁰ Kụ aSalum ọony phọ aJabes aakpomoghi we amitenom Zẹkaraya ẹkaraph ezue azuom kụ aghiigh nyọdi ẹpe Ibleam kụ ạsighe dọl phọ ọdi ạda.

¹¹ Oomo ịnon ịlo ạZekaraya rꞌịpe ọdi aḍighi yogh bọ, ọge ni sịphe ạḍinya phọ ịpe emiteghu bọ mem ạbudaam mọ Ịzirel.

¹² Ịphen phọ emite bọ imuneniom ni ịpe Ọmoogh-we phọ ạḅeni bọ Jehu mọ, “Ạnmuny phọ ạna kọtolom ạgada ọdaam ẹmha phọ Ịzirel esiemi inya oghiil.”

ASalum ọdaam mọ Ịzirel

¹³ Ẹman bọ ịraardi rꞌesugha ạsia Uzaya ạda bọ Juda kụ amem dị aSalum ọony phọ aJabes amiigh ọda Ịzirel. Ọdi ạda bọ oniin ụnwanyu ẹpe Sameria.

¹⁴ AMenahem ọony phọ ạGadi ạḍua ẹpe Tirza ạghi asi Sameria, aghiigh Salum ọony phọ aJabes ẹpe Sameria, ạsighe dọl phọ ọdi ạda.

¹⁵ Oomo ịnon ịlo aSalum rꞌiiḍighi ịpe esugha bọ dị aḍighi yogh bọ rꞌịpe ọdi aakpomoghi ghan bọ we amitenom ọdaam mọ ẹkaraph ezue azuom ọdaam mọ, ọsighe ni ịphen ọge aani sịphe ạḍinya ịpe emiteghu bọ mem ạbudaam mọ Ịzirel.

¹⁶ Rọḍua Tirza roru rosi Tapua, bịn aMenahem ạze oomo ạbuphe ọrol bọ sịphe ẹmha rꞌeelhe phọ ekitonom bọ, ịdi eḍighi bọ bịdi úkughuronaan nyọdi eten. Ạtuan kẹn ịduon phọ ạponyon rụkuruḅaka oomo ạnmariir dị roomor.

AMenahem ọdaam mọ Ịzirel

¹⁷ Ẹman bọ ịraardi rꞌesugha ạsia Uzaya ạda bọ Juda kụ amem dị aMenahem ọony phọ ạGadi amiigh ọda Ịzirel ẹpe Sameria. Ọdi ạda bọ ḍioph ạsia ẹpe Sameria.

¹⁸ Kụ ọdi aḍighi yogh ịkaraph ghisigh Ọmoogh-we phọ tụtu ẹteeny ḍio aḍuugh ọdi. Ọdi ọ́wile oomo ịkaraph phọ ịpe aJeroboam ọony phọ aNebat aḍighi yogh bọ tụtu ẹteeny ḍio aḍuugh ọdi, ọpo aḍighi bọ ịdi Ịzirel ọtuan oḍighi yogh ịkaraph.

¹⁹ Kụ ạTiglat Pileser ogbogh ọdaam mọ Asiria ạghi ọsighe ade phọ Ịzirel, kụ aMenahem ạngo nyọdi ịraardi rꞌinya ọonir igbogh ịtoom ẹemor asilva mọ aḍighi ịdi ọda ẹmha phọ ọno kạtol ḍịghaagh ọno.

²⁰ AMenahem ạar ikpoki phọ ịpe phọ ḍịghaagh igbogh awe phọ Ịzirel bụphe ọmoogh bọ ikpoki ịlo ọngo ọdaam mọ Asiria oye oye ooghdi ipoḍi asilva. Kụ ọdaam mọ Asiria ạḍua sịphe ade phọ, ọ́rol mun sịphe phọ.

²¹ Oomo ịnon ịlo aMenahem rꞌịpe ọdi aḍighi yogh bọ, ọge ni sịphe ạḍinya phọ ịpe emiteghu bọ mem ạbudaam mọ Ịzirel.

²² AMenahem amugh kụ ạtuonom bụrude phọ ọdi kụ ọsighe nyọdi oḍi. Kụ aPekahaya ọony phọ ọdi ạsighe dọl phọ ọdi ạda.

APekahaya ọdaam mọ Ịzirel

²³ Ẹman bọ ooghdi ạsia Uzaya ạda Juda kụ amem dị aPekahaya ọony phọ aMenahem amiigh ọda Ịzirel. Kụ ọdi ạda bọ ịyal ạsia ẹpe Sameria.

²⁴ Kụ ọdi aḍighi yogh ịkaraph ghisigh Ọmoogh-we phọ. Ọdi ọ́wile oomo ịkaraph phọ ịpe aJeroboam ọony phọ aNebat aḍighi yogh bọ, ọpo aḍighi bọ ịdi Ịzirel ọtuan oḍighi yogh ịkaraph.

²⁵ APeka ọony phọ ạRemalaya aakpomoghi ooghdi awe ạbuo ạGiliad omitenom ẹkaraph ezue, ọghi ologhi otu ọdaam mọ aSameria oghiigh Pekahaya. Kụ roghiigh nyọdi kụ aPeka ạsighe dọl phọ ọdi ạda.

²⁶ Oomo ịnon ịlo aPekahaya rꞌịpe ọdi aḍighi yogh bọ, ọge ni sịphe ạḍinya phọ ịpe emiteghu bọ mem ạbudaam mọ Ịzirel.

APeka ọdaam mọ Ịzirel

²⁷ Ẹman bọ ooghdi rꞌịyal ạsia Uzaya ạda bọ Juda kụ amem dị aPeka ọony phọ ạRemalaya amiigh ọda Ịzirel. Kụ ọdi ạda bọ ịyaldi ạsia ẹpe Sameria.

²⁸ Kụ ọdi aḍighi yogh ịkaraph ghisigh Ọmoogh-we phọ. Ọdi ọ́wile oomo ịkaraph phọ ịpe aJeroboam ọony phọ aNebat aḍighi yogh bọ, ọpo aḍighi bọ ịdi Ịzirel ọtuan oḍighi yogh ịkaraph.

²⁹ Ariiḍio phọ ịpe aPeka ạda bọ Ịzirel kụ ẹdi ạTiglat Pileser ogbogh ọdaam mọ Asiria ạghi bọ ạsighe Ijon, Ebel Bẹt Maaka, Janoa, Kedes rꞌaHazor rꞌareelhe ạGiliad, Galili rꞌạNaftalai, kụ asiphi we agheelom ẹpe Asiria.

³⁰ Ẹman bọ ịyaldi ạsia aJotam ọony phọ Uzaya ạda bọ Juda kụ amem dị aHosia ọony phọ Ela aakpomoghi we amitenom ẹkaraph ezue ozuom Peka ọony phọ ạRemalaya. Kụ roghiigh Peka kụ aHosia ạsighe dọl phọ ọdi ạda.

³¹ Oomo ịnon ịlo aPeka rꞌịpe ọdi aḍighi yogh bọ, ọge ni sịphe ạḍinya phọ ịpe emiteghu bọ mem ạbudaam mọ Ịzirel.

AJotam ọdaam mọ aJuda

³² Ẹman bọ ịyal ạsia aPeka ọony phọ ạRemalaya ạda bọ Ịzirel kụ amem dị aJotam ọony phọ Uzaya amiigh ọda aJuda.

³³ Ọdi ạman bọ ịyaldi rꞌoogh ạsia kụ ọdi agbi bọ ọda phọ, kụ ọdi ạda bọ ḍioph rꞌodiiny ạsia ẹpe Jeruselem. Onhiin phọ ọdi ughol mọ ạJerusa ọnyani ạZedok.

³⁴ Kụ ọdi aḍighi ghan ịdi eseleman risigh Ọmoogh-we phọ, ạdaph oomo ịpe Uzaya ọde phọ ọdi aḍighi ghan bọ, kụ aḍighi ghan.

³⁵ Kụ ọlo bịdi úphiemi riisi ooseeny aruru phọ, kụ awe phọ ọghi ghan ni ọphinyon rịkia ọḅile ọsuughi ịnsens sịphe aroogbolom mọ. AJotam kụ oye phọ ạlogh bọ Ọnhu-aḍibuo ạga ephunom Otu Ịiḅereghi phọ.

³⁶ Iiḍighi phọ ịpe esugha bọ aJotam aḍighi yogh bọ, ọsighe ni ịphen phọ ọge aani sịphe ạḍinya phọ ịpe emiteghu bọ mem ạbudaam mọ aJuda.

³⁷ Ariiḍio phọ ịpe aJotam kụ ẹdi Ọmoogh-we phọ amiigh bọ orom Rezin ọdaam mọ ạSiria rꞌaPeka ọdaam mọ Ịzirel ọghi ozuom aJuda.

³⁸ AJotam amugh kụ ọsighe nyọdi oḍi otumeniom bụrude phọ ọdi ẹpe Jeruselem ẹmha phọ aDevid. Kụ Ehaz ọony phọ ọdi ạsighe dọl phọ ọdi ạda.