2 Ạbudaam 13 - Ạḍinya Iigbia

ẠJehoahaz ọdaam mọ Ịzirel

¹ Ẹman bọ ịyaldi rꞌịraar ạsia aJoas ọony phọ Ahazaya ạda bọ Juda kụ ạJehoahaz amiigh ọda Ịzirel ẹpe Sameria. Ọdi ạda bọ ḍioph rꞌoḍual ạsia.

² Ọdi aḍighi yogh ghan ịdi ị́nighe risigh Ọmoogh-we phọ, ọ́wile ẹkaraph eḍighinom ạraraar phọ aJeroboam ọony phọ aNebat nyọpo aḍighi bọ ịdi Ịzirel oḍighi yogh ịkaraph. Ọdi ọ́wile eḍighinom ạraraar phọ ịphen.

³ Kụ Ọmoogh-we phọ ạghagham ologhi Ịzirel, kụ ạḅogh bịdi ạlogh ḍịghaagh ạHazael ọdaam mọ ạSiria rꞌạḍighaagh ạBen Hadad ọony phọ ọdi, kụ bịdi ọkpar opu Ịzirel ịbadi amem.

⁴ Kụ ạJehoahaz asooromi loor ọdi kụ ạmagh Ọmoogh-we phọ, kụ Ọmoogh-we phọ ạnaghanan nyọdi, ịdi eḍighi bọ ọdi ạmiin ni ịminimiin phọ Ịzirel, ịpe ọdaam mọ ạSiria rạkpiloghom bọ bịdi.

⁵ Kụ Ọmoogh-we phọ ạngo Ịzirel ọpelia, kụ bịdi okpetenaan ḍịghaagh ạbuo ạSiria phọ, kụ awe phọ Ịzirel oḅula orughogh ruutu phọ ạbidi rꞌẹepho ịdipho ẹḅel amem mọ.

⁶ Kụ ọlo bịdi ụ́bile oḍighi yogh ịkaraph ịdo phọ ịpe aJeroboam aḍiemiom bọ weye phọ Ịzirel oḍighi yogh. Igbudu um-ạke Asera phọ ịrol li Sameria.

⁷ ẠJehoahaz ọ́moogh mun weye ẹgham dị osugha emuton ooghdi awe dị kokiilom ạsu, ḍioph arughuugh-ude, rꞌiḍioph ọonir awe dị rotelhe ghan owol, ịdi eḍighi bọ ọdaam mọ ạSiria maphiemi bụeri phọ aagulemi bịdi ịdipho ọoru.

⁸ Oomo ịnon ịlo ạJehoahaz rꞌiiḍighi ịikpo phọ ọdi, ọge ni sịphe ạḍinya ịpe emiteghu bọ mem ạbudaam mọ Ịzirel.

⁹ ẠJehoahaz amugh ạtuonom bụrude phọ ọdi kụ bịdi ọsighe nyọdi oḍi ẹpe Sameria. Kụ ạJehoas ọony phọ ọdi ạsighe dọl phọ ọdi ạda.

ẠJehoas ọdaam mọ Ịzirel

¹⁰ Ẹman bọ ịraardi rꞌoḍual ạsia aJoas ạda bọ Juda, kụ ạJehoas ọony phọ ạJehoahaz amiigh ọda Ịzirel ẹpe Sameria. Kụ ọdi ạda bọ ḍioph rꞌodiiny ạsia.

¹¹ Ọdi phọ kẹn aḍighi yogh ghan aani ni ịkaraph risigh Ọmoogh-we phọ. Ọdi ọ́wile rꞌẹnum oomo eḍighinom ịkaraph phọ aJeroboam ọony phọ aNebat, nyọpo aḍighi bọ ịdi Ịzirel oḍighi yogh ịkaraph, oḍigh ologhi ịpe phọ kụ orelhiom ghan.

¹² Oomo ịnon iiḍighi phọ ạJehoas, rꞌịikpo phọ ọdi ịpe ọdi eenom bọ ẹgham Amazaya ọdaam mọ aJuda, ọge ni sịphe ạḍinya ịpe emiteghu bọ mem ạbudaam mọ Ịzirel.

¹³ ẠJehoas amugh kụ oḍi nyọdi ẹpe Sameria sịphe roḍi ghan bọ bụdaam mọ kụ ọony phọ ọdi Jeroboam II ạsighe dọl phọ ọdi ạda.

Aḍuugh Ilaisa

¹⁴ Mem mọ Ilaisa oyil phọ Ẹnaan ameel bọ ẹzegh phọ nyẹpe ọdi kamugh bọ, ạJehoas ọdaam mọ Ịzirel ạghi ophogh ọdi kụ ramoghi risigh phọ ọdi kụ ạḅem mọ, “Ọde ạmi, ọde ạmi, nạ kụ uḍighi ghan ogbogh ọsuaram aweye phọ Ịzirel.”

¹⁵ Kụ Ilaisa ạḅeni nyọdi mọ, “Sịghe kụmugh rꞌịkpina.” Kụ ọdi ạsighe kụmugh phọ rꞌịkpina phọ.

¹⁶ Kụ Ilaisa ạḅeni ọdaam mọ mọ aḍur kụmugh phọ, kụ Ilaisa ạḅam rạghaagh ọdi ạnyu ạraghaagh ọdaam mọ Ịzirel.

¹⁷ Kụ ọdi ạdaph ịpe oyil phọ Ẹnaan ạḅeni bọ nyọdi kụ aghughuron eghuugh-ookuugh phọ dị esoman Sịria. Kụ Ilaisa ạḅeni nyọdi mọ, “Tạph.” Kụ ọdaam mọ rọraph kụ Ilaisa ạḅem mọ, “Nạ kụ ẹkpina kꞌỌmoogh-we phọ ẹpe ọdi kạziom bọ weye ạSiria phọ. Nyina ketuphiom bịdi ẹgham ẹpe Afek tụtu nyina ẹze bịdi epiemi.”

¹⁸ Kụ Ilaisa ạḅeni ọdaam mọ mọ ạsighe ịpheri phọ ịkpina phọ ạraph ude. Kụ ọdaam mọ ạguroghom ude ịraar amem kụ ạwile.

¹⁹ Kụ ẹghagh ologhi Ilaisa kụ ọdi ạḅeni ọdaam mọ, “Nạ mụtaph bọ oogh mꞌodiiny amem ọbo pụruku nạ mạkpar apu weye ạSiria; kụ ọlo nyịidipho nạ kạkpar apu bịdi ịraar amem bịn.”

²⁰ Kụ Ilaisa amugh kụ ọsighe nyọdi oḍi. Kụ ạbukaraph awe phọ ạMoab oruphiom ghan ẹgham de phọ Ịzirel lhạ etum lhạ.

²¹ Eniin aḍio dị bịdi rọki oḍi oye kụ bịdi ọmiin ḍita ạbukaraph awe dị rotu, kụ bịdi otebeeny oḍim mọ osumeeny sịphe oḍi phọ Ilaisa bịn osumughu. Ịdipho aḍizu oye phọ emeelom bọ ịḅarara phọ Ilaisa, bịn oye phọ ạsuma bịn aḅetenu ạmeera.

Ẹgham dị Ịzirel rꞌạSiria eenan

²² ẠHazael ọdaam mọ ạSiria ạkpiloghom Ịzirel oomo asiḍughul-otu phọ ạJehoahaz.

²³ Kụ Ọmoogh-we phọ ạmoogh ghụsan esi ạbidi, ạnma bịdi ighirigiir, kụ ọdi ạloghonaan bịdi ḍịghaagh loor esi ịyo phọ ịpe Ebraham rꞌẠizik rꞌạJekob rꞌọdi oghiran bọ mọ ọdi bịdi kápiemi, kụ ọdi bịdi ómutonaan kꞌarodon.

²⁴ ẠHazael ọdaam mọ ạSiria romugh kụ ạBen Hadad ọony phọ ọdi ạsighe dọl phọ ọdi ạda.

²⁵ Kụ ạJehoas Ọdaam mọ Ịzirel ạkpar apu Bẹn Hadad ịraar amem kụ ạanyi rạmha phọ ịpe ạBen Hadad mạanyi bọ ạJehoahaz, ọde phọ ạJehoas.