2 Ạbudaam 12 - Ạḍinya Iigbia

AJoas ọdaam mọ aJuda

¹ Mẹman oḍual ạsia aJoas ạda bọ Ịzirel kụ aJoas amiigh ọda aJuda. Ọdi ạda bọ Jeruselem inyadi ạsia. Ḍien onhiin phọ ọdi ughol mọ aZibia ọlo aBeersheba.

² AJoas aḍighi ghan ịdi ẹnighe risigh Ọmoogh-we phọ oomo asiḍughul-otu phọ ọdi ịpe ạJehoyada oyil ạrikia phọ aromoghiom ghan bọ nyọdi.

³ Ịdi ọdi úḍighi, óphiemi riisi ooseeny aruru phọ; awe ụḅile ghan ni ọphinyon rịkia, ọḅile ọsuughi ịnsens sịphe aroogbolom mọ.

⁴ AJoas ạḅeni bụpinyon rịkia phọ mọ, “Ịsighe ghan oomo ikpoki ạraraar iigbia phọ ịpe ọsighe bọ oru sịphe Otu Ịiḅereghi phọ, rꞌikpoki ịpe odiemi bọ ịlo oye rꞌoye, rꞌikpoki ịlo oye bịn kụ ạatughian bọ sịphe ologhi phọ ọdi, eru ẹngo sịphe Otu Ịiḅereghi phọ.

⁵ Ạbupinyon rịkia phọ kụ kọsighe ghan ịpe phọ ịlo oye lọ dị alegheri ạbidi oselemiom esi lọ meḅu sịphe Otu Ịiḅereghi phọ, tọrobo esi lọ bịdi ọmiin mọ mẹnighe oselemi.”

⁶ Ẹman bọ ịyaldi rꞌịraar ạsia Joas ạda bọ, ariil ạrikia phọ úselemi rꞌẹnum esi lọ eḅu ẹnighe oselemi sịphe Otu Ịiḅereghi phọ.

⁷ Kụ aJoas ọdaam mọ ạmagh Jẹhoyada oyil ạrikia phọ rꞌạbueri phọ ariil ạrikia phọ kụ apuru bịdi mọ, “Uḍighi ika kụ nyina réselemi ghan bọ riisi lọ mẹnighe oselemi sịphe Otu Ịiḅereghi phọ? Kụ iḍighi nyịidipho kẹ́sighiogh ghan mun ikpoki ạbuphe nyina elegheri bọ. Ịsighe ikpoki phọ eḅulemi ẹngo ọsighe oselemiom Otu Ịiḅereghi phọ.”

⁸ Ạbupinyon rịkia phọ omeeraam mọ bụno kọ́boor ghan mun we ikpoki; ḅịle kẹn, bụno kóselemi ghan mun Otu Ịiḅereghi phọ.

⁹ ẠJehoyada oyil ạrikia phọ ạsighe igbe akputon epogh ẹpe ạnyu phọ, ạsighe ạkereri atumeriom enmeny ạrikia phọ ḍịghaagh elhiom mem lọ rọki oḍigh ịsiphe Otu Ịiḅereghi phọ. Kụ ariil ạrikia phọ bụphe rokori ghan bọ ọnhu-aḍibuo phọ ọsighe ghan ọlogh sịphe phọ, oomo ikpoki lọ eru sịphe Otu Ịiḅereghi phọ.

¹⁰ Tọrobo amem lọ bịdi ọmiin mọ ịminighan ikpoki kụ edi sịphe ologhi igbe phọ, bịn ọgeeghiom ạrinya ọdaam mọ rꞌuwo ẹmhu oyil ạrikia phọ ọki ọsighe ikpoki phọ ịpe bịdi ọmiin bọ sịphe Otu Ịiḅereghi phọ, ọbal ọsighe odoghoḍi ọlogh sịkpuru ọkologh.

¹¹ Bịdi ọsighe ghan ikpoki phọ osogh bọ ọngo bụphe roḍighi bọ iiḍighi phọ rꞌạbuphe ropogh ghan bọ Otu Ịiḅereghi phọ, ịdipho ọḅeni bọ. Kụ bịdi ọsighe ọngo bụo ạmaka phọ rꞌạbuloghom aruutu phọ roselemi ghan bọ Otu Ịiḅereghi phọ,

¹² bụphe roselemi ghan bọ sighiigh phọ rꞌạbuphe rọbaayagh ghan bọ sighiigh phọ ịpe rọsighe ghan bọ koselemiom oomo ariisi phọ ịpe meḅu bọ sịphe Otu Ịiḅereghi phọ.

¹³ Ụ́sighe ghan ikpoki phọ ịpe ọsighe bọ oru ọlogh Otu Ịiḅereghi phọ ịlo oghoom ạsigbagba silva, rꞌịsuom ịtozi, rꞌạsimogo ọgiata, rꞌaruuḍue, rꞌạraraar arukumuan lọ ọlemom gol rꞌasilva.

¹⁴ Bịdi ụsighe ghan ikpoki phọ ọngo bụphe roselemi ghan bọ Otu Ịiḅereghi phọ.

¹⁵ Bịdi ụ́ḅeni ghan we phọ ạbuphe bịdi ọngo ghan bọ ikpoki phọ mọ ọkpe ghan bụo iiḍighi phọ mọ oru ogbiighi ẹphamam mọ bịdi ọpham bọ ikpoki phọ, ịdi eḍighi bọ bịdi oḍuom ni ologhi we phọ.

¹⁶ Ụ́sighe ghan ikpoki apum rꞌikpoki ạsipioghom lọ oḍighinom ịyaar aghuḍum ụ́logh sịphe Otu Ịiḅereghi phọ. Ịpe phọ ịlo ariil ạrikia phọ.

¹⁷ Mem mọ ạmuen phọ ạHazael ọdaam mọ ạSiria ạghi azuom ẹgham Gạt ạsighe. ẠHazael ạḅile asomori ghisigh ọdi Jeruselem ịlo ọghi ozuom ẹgham.

¹⁸ AJoas ọdaam mọ aJuda ạghi ạsighiogh oomo ạraraar phọ ịpe ạJehosafat rꞌạJehoram rꞌAhazaya ạburude phọ ọdi ọosa bọ oseere iigbia, rꞌoomo phọ ịpe ọdi rꞌaloor ọdi ạasa bọ aseere iigbia, rꞌagol phọ ạrol bọ sịphe rooko ghan bọ ikpoki phọ sịphe Otu Ịiḅereghi phọ, ạsighe oomo phọ ịdi ạghiomonaan Hạzael ọdaam mọ ạSiria, kụ ạHazael ạḍua ẹpe Jeruselem.

¹⁹ Oomo ịnon ịlo aJoas rꞌiiḍighi phọ ịpe ọdi aḍighi yogh bọ, ọge ni sịphe ạḍinya phọ ịpe emiteghu bọ mem ạbudaam mọ aJuda.

^20-21 Abutelhedom mọ aJoas ọḅoph ọnhu omitenom nyọdi ẹkaraph ezue. Ịyal ạbidi, aJozakar ọony phọ aSimiat rꞌạJehozabad ọony phọ aSomer, ọgurogh nyọdi oghiigh sịphe Bẹt Milo eten phọ ẹpe rẹki bọ Sila. Kụ bịdi ọsighe Joas oḍi ẹpe oḍi bọ bụrude phọ ọdi ẹpe Jeruselem ẹmha phọ aDevid, kụ Amazaya ọony phọ ọdi ạsighe dọl phọ ọdi ạda.