2 Ạbudaam 10 - Ạḍinya Iigbia

Opiemi oghiil rꞌẹemara phọ Ehab

¹ Ehab ạmoogh bọ oḍualdi ạnmuny ẹpe Sameria. AJehu ạge rịnya ạsighe ạghi Sameria ạghiomonaan bụo ạrumhu phọ ạbuphe ropogh bọ ẹmha phọ rꞌikumoor awe phọ ạJezreel, ạghiomonaan bụphe orughom bọ nmụny phọ Ehab kụ ạḅeni mọ,

² “Nyina kụ irughom bọ nmụny ọde-otu phọ anyina. Arughuugh-ude phọ rꞌạrusu phọ edi ḍịghaagh anyina rꞌẹmha phọ oghoony bọ rꞌạraraar ẹgham mọ. Egina amem mọ ạrinya phọ ịphen ketu bọ ịteeny inyina,

³ ipogh sịphe ogbo aḍita ạnmuny ọde-otu phọ anyina oye lọ ạnighe ạkasian ạkpe ẹsighe ẹrolomi ạgada ọdaam ẹmha phọ ọde phọ ọdi, ịdi ọdi eenaan ọto kꞌọde-otu phọ anyina ẹgham.”

⁴ Kụ bụo ạrumhu phọ aSameria oghiilaan; aruugu asiph ni bịdi iboom. Kụ bịdi ọḅem mọ, “Ịyal ạbudaam bịn útue umeera risigh ọdi, kụ yira phọ ghụn kụ kotue ọmeera?”

⁵ Uw-ẹmhu ịsiphe otu phọ, rꞌuwo ẹmhu ạbuphe ropogh bọ ẹmha phọ rꞌikumoor awe phọ rꞌạbuphe orughom bọ nmụny phọ orom ọghiom Jehu ọḅeni mọ, “Yoor abutelhedom mọ ạna. Oomo ịpe ẹḅeeraan bọ nyịna kụ ịdi yoor koḍighi. Yoor kọ́sighe oye mọ aḍighi ọdaam. Sịghe nyọpo kạḅeeraan bọ nyịna.”

⁶ Kụ aJehu ạḅile ạge ḍịnon ạḍinya ạghiomonaan bịdi kụ ạḅeni mọ, “Eru mạar dị mị kụ ịmoogh ni inyina; eru mạar dị nyina kịnaghanan ni ịmi, pọ ịsighiogh rụmhu ạnmuny phọ bụphe kꞌọde-otu phọ anyina, kụ eru ịtuonom ịmi ẹpe Jẹzreel ọdo phọ amem mọ ạmuen iḍue.” Nyịidipho oḍualdi ạnmuny Ehab ọdaam mọ odi ḍịghaagh igbogh awe ịsiphe ẹmha aSameria, bụphe orughom bọ bịdi.

⁷ Kụ ạḍinya phọ rẹghi rẹteeny bịdi kụ bịdi osiphi nmụny ọdaam mọ, oḍualdi phọ ạbidi, oogbo rụmhu phọ ọsighe odoghoḍi ologhi egunum ọsighe ọghiomonaan nyọdi ẹpe Jẹzreel.

⁸ Kụ ọokpaany ạghi ạḅeni Jehu mọ, “Bịdi mọsighe rụmhu ạnmuny ọdaam mọ ọsighe otu.” Kụ ọdi ạḅeni mọ, “Ịsighe ekpol ịyal arugu sịphe eḍighom ẹmha phọ tụtu ẹḅaal ḍịroor.”

⁹ Rẹḅaal kụ ọdi aḅetenu amite kụ ạmeera kụ ạḅeni oomo awe phọ mọ, “Ạri nyina awe aruukuan. Pogh, mị umitenom Jọram ọde-otu phọ ạmi ẹkaraph ezue kụ aghiigh bọ nyọdi. Kụ ạnhian kụ ạze bọ oomo ạbuen phọ?

¹⁰ Ilegheri nyịidipho mọ ịnon ịdi kọkaaph dị kemite sịen aḅirini phọ ílho, emuton ịpe Ọmoogh-we phọ ạghaaph bọ ịlo Ehab. Ọmoogh-we phọ maḍighi ịpe ọdi ạḅeni bọ Ilaija otelhedom mọ ọdi mọ ạghaaph.”

¹¹ AJehu ạze oomo oghiil phọ Ehab ạbuphe osugha bọ ẹpe Jẹzreel: igbogh awe phọ ọdi rꞌasiya phọ ọdi rꞌariil ạrikia phọ ọdi. Rꞌẹnum ịyaar ósughenaan nyọdi.

Ọze siya Ahazaya

¹² AJehu aḅetenu ạḍua ẹpe phọ rakeel Sameria, kụ ọdi ạghi aḍigh ẹpe eten phọ otu dị ropooghi ghan iyool-ịga.

¹³ Kụ aJehu azuan bumor Ahazaya ọdaam mọ aJuda amugh bọ kụ apuru bịdi mọ, “Nyina ạbuo ạnhian?” Kụ bịdi ọphagharanaan mọ, “Yoor abumor Ahazaya. Yoor ụghi ophogh ạnmuny ọdaam mọ rꞌạnmuny ạJezebel ạnir phọ ọdi.”

¹⁴ Kụ aJehu ạḅeni we phọ ọdi mọ, “Isiphi bịdi imoom.” Kụ bịdi osiphi bịdi imoom kụ ọze bịdi sịphe ooni phọ atuman bọ sịphe otu phọ ropooghi ghan bọ iyool-ịga phọ, inyadi rꞌịyal awe. Rꞌoniin ọnyo ạbidi lọ dị asugheeny ólho.

Ọze oomo ạbuo ẹemara Ehab dị osugha

¹⁵ AJehu aten rạki kụ dị ạmiin Jọnadab ọony phọ aRekab dị ratu ozuan ọdi; kụ ạseph nyọdi kụ apuru mọ, “Ologhi ạna aselemian ni esi ạmi ịdipho ọphon ạmi aselemian bọ ni esi ạna?” Kụ ạJonadab ạphagharanaan mọ, “Ịdipho ni.” Kụ ọdi mọ, “Eru ni ịdipho, pọ ụngo ịmi ḍịghaagh.” Kụ ọdi ạngo nyọdi ḍịghaagh. Kụ aJehu ạsighe nyọdi ạsaany oghuugh-ude ọdi,

¹⁶ kụ ạḅeni nyọdi mọ, “Tue rụdaph ịmi, ạghi ạmiin ghẹlhe dị mị ralianaan Ọmoogh-we phọ.” Kụ ạsighe nyọdi ạsaany oghuugh-ude phọ ọdi kụ ạghi.

¹⁷ Kụ bịdi ọghi osi Sameria kụ aJehu ạze bụo ẹemara Ehab bụphe osugha bọ ẹpe Sameria tụtu ạze bịdi ḅeer ạmadan aphiemi, ọdaph ịpe Ọmoogh-we phọ ạghaaph bọ ạḅeni Ilaija.

Ọze bụphe ooseeny ghan bọ Baal

¹⁸ AJehu aakpomoghi oomo awe phọ egina esi kụ ạḅeni bịdi mọ, “Ehab aaseeny ghan Baal ẹphurukpu, kụ aJehu kụ raaseeny ghan iboom.

¹⁹ Kụ nyịidipho ịmaghanaan ịmi oomo ariil phọ aBaal, oomo abutelhedom mọ ọdi, rꞌariil ạrikia phọ ọdi, rꞌoniin kúsugha, loor esi dị mị ạmoogh eboom ịyaar aghuḍum dị mị kaḍighi ạngo Baal. Ọlo ọwa kụ ụ́miin, pọ ọdi kạ́tol.” (AJehu aḍighi ghan ịphen phọ ịlo ọdi kaḍighi kụ kạze oomo ạbuphe rọoḅereghi ghan bọ Baal.)

²⁰ AJehu ạḅeni mọ, “Igbeel eghol ḍio ookpomoghian iigbia phọ aBaal” kụ bịdi ogbeel.

²¹ AJehu arom ạghiom oomo awe phọ Ịzirel rꞌoomo ạbuphe rọoḅereghi ghan bọ Baal kụ eḍighi ịdi rꞌoniin oye ósugha dị útu. Bịdi ọghi oḍiku sịphe otu phọ aBaal omuza, ẹḍua eekuna nyẹen ẹghi esi nyẹeri phọ eekuna phọ.

²² Kụ aJehu ạḅeni oye phọ ọpo aru bọ uwo ẹmhu ạbuphe ropogh ghan bọ ẹpe otu phọ roseere ghan bọ rukpe phọ mọ ạsighe rukpe ịlo oomo ạbuphe rọoḅereghi ghan bọ Baal ạsighe aru. Kụ ạsighe rukpe phọ ịlo oomo ạbuphe rọoḅereghi ghan bọ Baal, kụ ạsighe rukpe phọ aruomonaan bịdi.

²³ Kụ aJehu rꞌạJonadab ọony phọ aRekab ọghi oḍigh otu phọ aBaal, kụ ạḅeni bụphe rọoḅereghi ghan bọ Baal mọ, “Ịnmanaghian ephogh sịen ogbo phọ anyina mọ ạbuphe rọoḅereghi ghan bọ Baal bịn kụ odi.”

²⁴ Kụ ọdi rꞌạJonadab ọghi oḍigh ologhi otu ọphinyon ạrikia phọ rꞌoḍighi ịyaar aghuḍum oguom ạnian. Ọdi ạma ni ọphaanyadi awe ạmeremi erugh, kụ ạḅeni mọ, “Oye lọ ameera mọ oye sịphe aḍita ạbuphe mị ạḅogh bọ ạlogh ḍịghaagh anyina masuma, pọ ọdi maghiigha loor ọdi.”

²⁵ AJehu rọmadan ọphinyon ạrikia oguom ạnian phọ, kụ ạḅeni bụo eghiil phọ rꞌạbuo ạrumhu awe ẹgham mọ, “Iḍigh ologhi ẹze. Kémeera rꞌoniin ọnyo ạbidi ikpetenaan inyina.” Kụ bịdi ọsighe elhool ẹgham ọziom oomo phọ ạbidi, kụ ạbuo eghiil phọ rꞌạbuo ạrumhu awe ẹgham mọ ọsighe bịdi omitenom erugh, kụ bịdi ọghi ẹpe ẹmha phọ, sịphe otu phọ aBaal odi bọ.

²⁶ Kụ bịdi orool oomo ịkaaghineen ạrumugh phọ edi bọ sịphe otu phọ aBaal omiteghom erugh oguom nịan.

²⁷ Bịdi ogbonyon ọkaaneen aBaal phọ olher, onyuughi otu phọ aBaal olher, ọsighe esi phọ oḍighi ọsaaghi kꞌarodon.

²⁸ Ịdipho phọ kụ ẹdi aJehu aphiemi bọ Baal ẹpe Ịzirel.

²⁹ AJehu ọ́ḅitonaan ọ́wile ọdaph ịkaraph phọ ịpe aJeroboam ọony phọ aNebat aḍighi yogh bọ, tụtu eḍighi bọ ịdi Ịzirel oḍighi yogh ịkaraph, ọoḅereghi ghan ọngo ịbam ilephiri ạsinam mọ ọkaam bọ gol phọ edi bọ ẹpe Bẹtel rꞌạDan.

³⁰ Ọmoogh-we phọ ạḅeni Jehu mọ, “Nạ mạdaph oomo ịpe edi bọ sịphe ologhi phọ ạmi, aḍighi ọto kꞌEhab ịpe ịḅeeraan bọ ịmi. Loor esi ịphen phọ ạnmuny ạna bụphe komuneniom bọ inya oghiil phọ kụ kọtolom ạgada ọda Ịzirel.”

³¹ AJehu ọ́maghami ịyaar ịlo ọdaph iilogh Ọmoogh-we Ẹnaan phọ Ịzirel rꞌoomo ologhi ọdi. Ọdi ọ́gbatanaan ọ́wile ịkaraph phọ ịpe aJeroboam aḍighi yogh bọ, tụtu eḍighi bọ ịdi Ịzirel oḍighi yogh ịkaraph.

Aḍuugh phọ aJehu

³² Amem mọ ạmuphe phọ kụ amem mọ Ọmoogh-we phọ amiigh bọ ophiemi eniin ẹkpigh Ịzirel. ẠHazael ọdaam mọ ạSiria ạkpar apu oomo igbogh ạramha phọ Ịzirel,

³³ emiigh kꞌạJodan ẹpe erumuḍio phọ remite ghan bọ esiemi oomo ạGiliad: arere ạGad, rꞌaRuben rꞌạManase; emiigh kꞌAroer phọ odi bọ ọgbal Ọphiiny Anon esiemi Gịliad rꞌạBasan.

³⁴ Oomo ịnon ịlo aJehu rꞌiiḍighi phọ ịpe ọdi aḍighi yogh bọ, rꞌịikpo phọ ọdi, ọge ni sịphe ạḍinya phọ ịpe emiteghu bọ mem ạbudaam mọ Ịzirel.

³⁵ AJehu amugh ạtuonom bụrude phọ ọdi. Bịdi ọsighe nyọdi oḍi ẹpe Sameria. Kụ ạJehoahaz ọony phọ ọdi ạsighe dọl phọ ọdi ạda.

³⁶ AJehu ạda bọ Ịzirel ẹpe Sameria ẹman bọ ịyaldi rꞌọphaanya ạsia.