2 Ạbudaam 1 - Ạḍinya Iigbia

Ilaija rꞌAhazaya ọdaam mọ

¹ Ehab romugh bọ bịn ạMoabait phọ ọghi ozuom Ịzirel ẹgham.

² Ahazaya ọdaam eelhe phọ Ịzirel ạḍua sịphe ẹedaneen otu ạnyu phọ ọdi ẹpe Sameria ameel bịn kụ ẹzegh eḍighi nyọdi, kụ ọdi arom rụukpaany ọdi ạḅeni bịdi mọ ọghi opuru ḍipuru kꞌaBaal Zebub ẹmugh phọ Ẹkron mụghumo ọno kaḍum ni ẹzegh phọ ẹpe phọ.

³ Kụ ọokpaany kꞌỌmoogh-we phọ ạḅeni Ilaija oyil ọlo aTisbe phọ mọ, “Ḅetenu ạghi azuan rụukpaany ọdaam eelhe phọ aSameria apuru bịdi mọ, ‘Loor esi dị Ẹmugh ílho bọ Ịzirel kụ iḍighi bọ dị nyina rẹki bọ opuru ḍipuru kꞌaBaal Zebub ẹmugh phọ Ẹkron?’

⁴ Ịḅeni ọdaam eelhe phọ mọ Ọmoogh-we phọ ạḅem ịduon mọ, ‘Loor esi ịphen phọ nạ kạ́ḍua mun sịphe ạnyu ẹmina phọ nạ ạmina bọ asoor ude, mọ nạ kamugh ni.’” Kụ Ilaija ạghi.

⁵ Kụ ạruukpaany phọ oḅula ọghi ọteeny ọdaam mọ, kụ ọdi apuru bịdi mọ, “Eeghe kụ iḍighi kụ nyina eḅula bọ?”

⁶ Kụ bịdi ọḅeni ọdaam mọ mọ, “Oniin oye dị uzuan iyoor kụ ụḅeni iyoor mọ iḅula ẹghi ẹteeny ọdaam mọ irom bọ inyina ẹḅeni nyọdi ikpo ọnhu Ọmoogh-we phọ mọ, ‘Loor esi dị Ẹnaan ílho bọ Ịzirel kụ ẹdi nạ ạtu bọ arom rụukpaany phọ ạna mọ ọghi opuru ḍipuru kꞌaBaal Zebub ẹmugh phọ Ẹkron? Kụ loor ịduon phọ nạ kạ́ḍua mun sịphe ạnyu ẹmina phọ nạ ạmina bọ asoor ude, mọ nạ kamugh ni.’”

⁷ Kụ ọdaam mọ apuru bịdi mọ, “Oye phọ ọphon phọ izuan bọ inyina ạtol ika, ọphon ịḅeni bọ inyina ịphen phọ?”

⁸ Kụ bịdi ọḅeni nyọdi mọ, “Oye phọ ạkpologhian dọni rꞌokuughaam ozu ẹnam.” Kụ ọdi ạḅem mọ, “Ọphon Ilaija ọlo aTisbe phọ.”

⁹ Kụ ọdaam mọ arom uwo ẹmhu rꞌooghdi awe ẹgham mọ ọdi mọ ọghi osiph Ilaija. Ilaija ạrol ạnyu eegbolom, kụ uwo ẹmhu phọ ạḅeni nyọdi mọ, “Oye kꞌẸnaan, ọdaam mọ ạḅem mọ soor.”

¹⁰ Kụ Ilaija ạphagharanaan uwo ẹmhu ooghdi awe ẹgham mọ ọdi mọ, “Eru mạar dị mị aḍighi ni oye kꞌẸnaan, pọ ạnian ẹḍua ẹpe kꞌạke eru elhe nyịna rꞌooghdi awe phọ ạna.” Kụ ạnian ẹḍua ẹpe kꞌạke esoor kụ elhe nyọdi rꞌooghdi phọ.

¹¹ Kụ ọdaam mọ ạḅile arom ọnon uwo ẹmhu ooghdi awe ẹgham mọ ọdi, kụ ọdi rꞌooghdi phọ ọghi, kụ apuru nyọdi mọ, “Tọ nạ kụ oye kꞌẸnaan phọ. Ọdaam mọ ạḅem ịduon mọ nụun asoor aru.”

¹² Kụ Ilaija ạphagharanaan bịdi kụ ạḅeni mọ, “Eru mạar dị mị aru ni oye kꞌẸnaan, pọ ạnian ẹḍua ẹpe kꞌạke eru ezuom nyịna rꞌooghdi phọ ạna ẹmoogh.” Kụ ạnian ẹḍua ẹpe kꞌạke esoor, ẹmoogh nyọdi rꞌooghdi phọ.

¹³ Kụ ọdaam mọ ạḅile arom ọnon uwo ẹmhu ooghdi awe ẹgham mọ ọdi amuneni ịraar amem; kụ ọdi rosi kụ akpuḍian ghisigh Ilaija kụ ạḅeni mọ, “Nạ oye kꞌẸnaan, seseeny, mị rạaḅereghi ni nyịna mọ aghuḍum mọ ạmi rꞌaghuḍum ooghdi abutelhedom mọ ạna ẹman ni ịyaar esi ạna.

¹⁴ Ạnian ịḍua ni ẹpe kꞌạke esoor ẹmoogh ẹze ịyal ạbuḅel ạrumhu ooghdi awe ẹgham mọ rꞌooghdi phọ ạbidi. Kụ iḍighi aghuḍum mọ ạmi ạman ni ịyaar esi ạna.”

¹⁵ Kụ ọokpaany phọ kꞌẸnaan ạḅeni Ilaija mọ, “Dạph nyọdi ạghi. Kákiilaan nyọdi.” Kụ ọdi aḅetenu ạdaph nyọdi ạghi ạteeny ọdaam mọ.

¹⁶ Kụ ọdi ạḅeni nyọdi mọ, “Ọmoogh-we phọ ạḅem ịduon mọ, ‘Loor esi dị Ẹnaan ílho bọ Ịzirel kụ ẹdi nạ ạtu bọ arom rụukpaany phọ ạna mọ ọghi opuru ḍipuru kꞌaBaal Zebub ẹmugh phọ Ẹkron. Ịduon kụ iḍighi kụ nạ kạ́ḍua mun sịphe ẹmina phọ nạ ạmina bọ asoor ude, nạ kamugh ni.’”

¹⁷ Kụ Ahazaya amugh, ịdipho Ọmoogh-we phọ ạḅeni bọ Ilaija. Ahazaya ọ́moogh mọony, umor phọ ọdi ạsighe dọl phọ ọdi ạda. ẠJehoram ọony ạJehosafat, ọdaam mọ aJuda, mạda rẹkiom ịyal ạsia kụ ạJoram amiigh aani ọda.

¹⁸ Oomo ịnon iiḍighi Ahazaya ọdaam mọ, ọge ni sịphe ạḍinya iiḍighi ạbudaam mọ Ịzirel.