1 Timoti 6 - Ạḍinya Iigbia

¹ Ẹkpe ni dị oomo ạbulo oḍighi rẹbene kolegheri mọ ạburude-otu phọ ạbuno ọkpe ni ọlogh eghuan, ọbo oye kakol ghan bọ ịkaraph ḍien phọ Ẹnaan rꞌịtughemi phọ ayira.

² Ạrebene lọ ạburude-otu phọ ạbidi momeeraam kụ́tuan mọ ạbuno rꞌạburude otu phọ ạbuno moḍighi bumor bịn ọḅitonaan bịdi. Bịdi ọkuami ghụn okumu ghan ọngo, ịdi eḍighi bọ bụphe rọsighe bọ sụo oḍighi phọ ạbidi, iiḅi asiya dị bịdi ọphomoghian! Kạaph ghan ịphen phọ ạtughemiom.

Ịtughemi ọkpe rꞌegey ẹelha

³ Tọrobo oye lọ rạtughemi ghan ịlo ẹgbatanaan igey ikpo ọnhu phọ ạJizos Kraist Ọmoogh-we phọ ayira, rꞌịtughemi phọ ẹḅophan bọ omeeraam mọ,

⁴ maphughonu rꞌabagaam rꞌelologhi. Ọdi ạmoogh ekpooko ọgbaragbara rꞌọokonoghian ghan ikpo ọnhu lọ ẹkpe ọghaaphom, kụ ịphen phọ rẹkom ghan ologhi ẹḍim rꞌịruonu, rꞌitonyonaan, rꞌeepua iḅiligha keseere.

⁵ Ḅịle kẹn awe dị iloghi ạbidi meeph, igey phọ kẹn bịdi ílhoonaan mun, rọ́gba ghan mem ọogbaghanaan rꞌọdi. Bụen phọ rọotughian ghan mọ oḍighi ghan oḍighi phọ Ẹnaan, pọ omuul aḍighi ạsuo.

⁶ Oye rạmoogh ghan ni iboom sụo esi oḍighi Ẹnaan phọ, eḍighi ịyaar dị ịlo ọdi ạmoogh rẹgbaanyan ghan ni nyọdi. (Oseleman rꞌọgbaanyan eḍighi ni ogbogh ạsuo.)

⁷ Yira ụpham eeghe kụ orumom bọ sịen aḅirini phọ? Ịyaar ụ́pam. Yira kọpam eeghe kụ okeelom kꞌạda-otu? Ịyaar kọ́pam.

⁸ Loor ịphen phọ, eḍien rꞌarukpe lọ yira ọmoogh ịgbaanyan ghan ni iyira.

⁹ Bụphe rọwa ghan bọ oḍighi ạraalha phọ romeel ghan koḍighanaan ọdegh ophogh, ḅịle kẹn komeel ḍiphil ịbadi ạruuphua elologhi rꞌịlo aḍuugh-aḍuugh, ịpe reegulemi ghan bọ oye kẹngoom muphe.

¹⁰ Ekpooko ikpoki kụ azin ọdo kịrokiro ịkaraph. Buniin mọtuan ni osiphigha ikpoki bịn ope eten ọbile ịpe omeeraam mọ ạḅem bọ, kụ ọto maḍigh ragimi iloghi phọ ạbidi ịdipho iitoor.

Oroma dị mị raroma nyịna

¹¹ Kụ nạ phọ aḍighi bọ oye Ẹnaan, kel ghan oomo ạraraar phọ ịphen, wạ ghan ghụn ruukuan, rꞌolegheri Ẹnaan, rꞌomeeraam, rꞌẹphomoghian, rꞌọkparam, rꞌomiighe aloor.

¹² Kpạrami ḍịghaagh aghiil aani eghiil phọ bụphe momeeraam bọ rokiil bọ, pịdi ạmoogh ghuḍum kꞌagee-pọ ạngo loor phọ ạna. Ẹnaan ịtuan ghuḍum mọ ạkuen phọ kụ ẹmagh bọ nyịna, mem mọ nạ amighirom bọ ni ạmeera ghisigh ịbadi awe ạghaaph omeeraam mọ ạna amitiom.

¹³ Mị ạto rạḅeni nyịna ghisigh Ẹnaan phọ rẹngo ghan bọ oomo ạraraar ghuḍum rꞌaghisigh ạJizos Kraist phọ amighirom bọ ni ạmeera ghisigh ạPontios Pailet mọ

¹⁴ kooko ni rꞌịyaar kị́biph ologh phọ, ạmaar aseleman, tụtu ẹteeny ḍio phọ ạJizos Kraist Ọmoogh-we phọ ayira kamite bọ egaan phọ.

¹⁵ Kemunughan ni ọkaraghi amem mọ, kụ Ẹnaan Ạḍiseph phọ, Oogboom ịiruen phọ, Ọdaam aḅirini rꞌỌmoogh-we dị emuton nyọdi ọnon úlho ghan.

¹⁶ Ọdi bịn kụ ọdi rámugh ghan, atugh sịphe ạḍiḅaal phọ oye ẹda kạ́daari bọ. Oye ekpeḍien nyọdi kọ̋miinom ghan, kụ oye ekpeḍien nyọdi kạ́miinom. Eegu phọ rꞌịikpo kꞌagee-pọ phọ ẹrolonaan nyọdi! Ẹrol li ịdipho!

¹⁷ Ḅẹni ni ạkpaariom bụphe ọmoogh bọ ẹelha ịsien aḅirini phọ mọ bịdi kúbaga, ḅịle mọ bịdi kụ́sighe oḍuom ologhi ạbidi useere loor ẹelha phọ reten bọ oler phọ, oseere ghụn ni esi Ẹnaan phọ rịngo ghan bọ iyira oomo ạraraar lọ yira kọkelhom.

¹⁸ Ḅẹni ni mọ bịdi oḍighi ghan igey, iiḅi iiḍighi kụ eḍighi ẹelha phọ ạbidi, onmo ghan inmo, ọḅile ọrol ghan wịriwiri.

¹⁹ Ịduon phọ kụ ịdi bịdi koseerian ẹkuakua ẹelha okoriom mem dị edi ghisigh, kụ bịdi ogbi nụun ọmoogh ọkaraghi akugey aghuḍum mọ.

²⁰ Timoti, mạar aseere ịpe ọḅogh bọ ọlogh ḍịghaagh phọ ạna ọpham mọ, ụ́naghanan ghan eepua ọghaaph rꞌọogbaghanaan elologhi phọ buniin awe rokol ghan bọ mọ “olegheri ịyaar” phọ.

²¹ Ịyaar phọ eḍighi bọ, buniin rọḅem ghan mọ bụno molegheri ịyaar, kụ mọtuan ịduon phọ ọḍua esi omeeraam mọ, ope eten. Ooḅi ọghor phọ kꞌẸnaan ạrolonaan oomo phọ anyina!