1 Timoti 5 - Ạḍinya Iigbia

Ịdi nyina keḍighi ghan bụphe momeeraam aani bọ

¹ Kálomaan ghan okumoor oye, ịkaaphan ghan ịdipho ọde rꞌọony. Sịghe ugheel ạnmuny ịdipho abumor ạna,

² ạsighe ikumoor ạnmariir phọ ịdipho aburunhiin ạna, ạmoogh ooko aloor ạsighenom risina ạnmanyaan phọ ịdipho abumarani ạna.

³ Lọgh ghan eegu nmạriir lọ ọkar ri oḍighi rukpukele.

⁴ Kụ ọlo ekpukele ạnir lọ ạmaraghi nmụny ḅịle mꞌạnmuny oko, bụen phọ ọphur ọsighe dọl ạbuo ạsiosi phọ ọmaar ophoghom ọto kꞌạbidi! Ịduon phọ kụ ịdi bịdi mọtuugh ịpe ạburude phọ rꞌaburunhiin phọ ạbidi, ḅịle rꞌạburude rꞌaburunhiin oko phọ ạbidi ookonom bọ bịdi oḍighi roḅulemian. Ẹphen kụ eḍighinom ịyaar dị ẹḅeeraan Ẹnaan.

⁵ Ọkaraghi ạnir dị aḍighi ekpukele dị ụ́moogh oye ọloghonaan ọdi ḍịghaagh, mạsighe oḍuom ologhi ọdi ạkpasaghiom Ẹnaan, ạḅile rạaḅereghi ghan oomo amem kạlom nyọdi ọloghonaan ạḍighaagh ḍughul rꞌootaany.

⁶ Kụ ekpukele ạnir lọ ạdol ipesi kụ ẹḅeeraan, pọ mamugh ạḅarara ghạlamo ịdipho ọdi odi bọ ni rapooghu.

⁷ Tọoghi ịphen phọ ạḅeni bịdi, ọbo oye kạnughe ghan bọ bịdi ẹka.

⁸ Kụ oye lọ rạ́loghonaan ghan ḍịghaagh eghunotu ọdi mụghumo ọkaraghi ọto ọdi ni, pọ mạpharanaan ịpe omeeraam mọ ạḅem bọ, ạḅile abeeph apu oye dị kőmeeraam ghan.

⁹ Tọrobo ạnir lọ kọ́man odiinydi ạsia kụ olhom ọdi amugh, ụ́sighe ghan ụloghom ẹku arukpukele ạnmariir phọ bụo ạsiosi phọ kụ ropogh bọ. Lọghom nyọpo ạrolom bọ ogina phọ olhom mọ ọdi bịn,

¹⁰ ḅịle amitiom bọ ḍien eeḅi eḍighinom ịyaar: ạnir lọ ạmaar ạpham nmụny ọdi, aghuraam ghan ruuruen, aatol ghan rạda aruwol awe phọ Ẹnaan, ạloghonaan ghan ḍịghaagh bụlo ọmoogh ịiḅaghami, ạḅile ghan ạkuom loor ọdi oḍighi yogh igey iiḍighi kịrokiro phọ.

¹¹ Kụ kạ́loghom risina arukpukele ạnmariir phọ, ịdi eḍighi bọ mem lọ ọtuan rụuphua phọ ạbidi kụ ẹḅile eḍigh iloghi ạbidi ạal ịnon ilom, bịdi kotuura ni ọḍua esi aKraist,

¹² bịn erugh obi ọḅel oguan phọ ạbidi epum bịdi.

¹³ Bịdi kọḅile kẹn ọmaar oghiraan ghan ọḍua otu ọgba otu, kụ ịdi ẹkar ghụn ẹloghori, bịdi ọmaarom ni ịkalaghian rꞌoḅiligha ghan ạdol ạbunon awe, rꞌọghaaphogh ghan oghol ạraraar lọ ị́kpianaan.

¹⁴ Ịḅeeraan ghụn ịmi mọ arisina arukpukele ạnmariir phọ ạalagh ịnon ilom, ọmaraghian, ọpham ruutu phọ ạbidi, ọbo kọngo ghan bọ eepoogh mọ ạbumulogh-ḍien phọ ayira ụnughe iyira ẹka.

¹⁵ Ịyaar phọ eḍighi bọ buniin arukpukele ạnmariir moruura rọdaph Setan.

¹⁶ Kụ tọrobo ạnir lọ mameeraam aani kụ ạmoogh rukpukele ạnmariir sịphe eghunotu ạbidi, ạloghonaan ghan ḍịghaagh, kụ́leti dool phọ ạḍien rụmhu ạbuo ạsiosi phọ, pịdi bụo ạsiosi phọ ọloghonaan ḍịghaagh rukpukele ạnmariir phọ ạbuphe ọkaraghi bọ omeel ẹgbenem mọ!

¹⁷ Ikumoor awe ạsiosi phọ, lọ ọmaar ropogh bụo ạsiosi phọ ọkpianaan ni olhe ghan ịyal ạga ikpoki, ẹkar nụun ẹkpaariom bụphe ọkpar bọ ḍịghaagh ọghaaph ghan, rꞌọtughemi ghan ikpo ọnhu phọ.

¹⁸ Ịyaar phọ eḍighi bọ ạḍinya iigbia phọ rẹḅem ghan mọ, “Ọnhu ạnam dị rạponyon ịbiakpa ụ́kasaghi ghan,” ḅịle kẹn mọ, “Oye arukumuan rákeel ghan oopho.”

¹⁹ Ịkaraph ạsiagba lọ ọgbaanaan okumoor oye ạsiosi phọ, kạ́nuun ghan ameeraam, tụtu nạ mạnaghanan ḍụghum ọnhu ịyal mụghumo ịraar awe.

²⁰ Oomo ạbulo oḍighi ịkaraph ḅạam ghan esi ogbo, pịdi ạbueri phọ ọmoogh oghiilaan.

²¹ Mị ạsighe ḍien Ẹnaan rꞌạJizos Kraist rꞌạruukpaany phọ Ẹnaan ẹsaḅar bọ kụ raghiremi nyịna ịyo mọ nạghanan ikpo ọnhu oroma phọ ịphen phọ, kụ tọrobo ịlo nạ raḍighi, kạ́seeghi ghan we.

²² Kạ́miin ghan oye bịn aagborion ạḅam rạghaagh ẹmhu, mọ aḍighi aani ghan oḍighi Ọmoogh-we phọ, ọbo kọsighe ghan bọ ịkaraph ạbunon awe ọḅam ẹmhu ạna. Mạar ri aako ghan loor phọ ạna.

²³ Kạ́pughol ghan mụum bịn, pụghol ghan ni mọony amiim lọ kạloghonaan ḍịghaagh ọkuruḅaka phọ ạna loor ẹgba mem ịirurughian phọ ạna.

²⁴ Ịkaraph abuniin awe eganana ni ọmiin, ḅịle retorori ghan ni bịdi kẹlogh esi ịiruen. Kụ ịkaraph abuniin rẹ́nuun ghan keganana.

²⁵ Ịduon phọ kẹn kụ ịdi iiḅi iiḍighi reganana ghan ni kọmiin, kụ ịpe ị́kar bọ ni iganana bịn rẹ́booghian ghan.