1 Timoti 4 - Ạḍinya Iigbia

Ạbutughemia ọkpe

¹ Uwaloor Iigbia phọ ạkaaph ghan ni ramitiom mọ mem dị retu buniin awe kokel li ịpe omeeraam mọ ạḅem bọ. Bịdi kọnaghanan ruwaloor ọkpe, ọḅile ọdaph ịtughemi aruru.

² Ạbugbaam ọkpe kụ rọtughemi ghan bọ ịtughemi areekeleghian phọ ịphen. Bịdi úlegheri mun ịlo eru ịne mụdi ụpophoriom iloghi phọ ạbidi ọghologhol okuron.

³ Ọdo phọ awe phọ ạbuen phọ rọtughemi ghan mọ apinien ọ́nighe, ḅịle kẹn mọ iniin ariiḍien eḍighi ni ḅạphanya. Kụ Ẹnaan ịlhem riiḍien phọ ịphen esereghi mọ bụphe momeeraam bọ olegheri igey phọ, ọngo ghan nyịno ḍịseph, oleeghi ghan.

⁴ Tọrobo ịyaar phọ Ẹnaan ẹlhem bọ ẹnighe ni. Rꞌeniin kúkel ghan, ọngo ghan ghụn Ẹnaan ḍịseph bịn ọsighe ghan olhe,

⁵ ịdi eḍighi bọ Ẹnaan rẹtuan ghan ịiḅereghi rꞌọghaaph phọ ọdi kụ kẹseph tọrobo ịyaar.

Ogey oye oḍighi ạJizos Kraist

⁶ Nạ ạngo ghan ni iiḅi asiya phọ ikpo ọnhu oroma phọ ịphen, nạ kaḍighi ni ogey oye oḍighi ạJizos Kraist, ịdipho ikpo ọnhu omeeraam mọ rꞌigey ịtughemi phọ nạ mạdaph bọ kụ meḍighi bọ eḍien dị nạ rạngo ghan uwaloor phọ ạna.

⁷ Kpọrion rạghaagh ạna sidum ẹmiin ele ọkaraph aḅirini phọ ọphon. Kụom uwaloor ạna ạtuugha ghan ịpe ẹkpianaan bọ dọl aruukuan phọ.

⁸ Areephegh ọzaamian aloor ẹmoogh ni ịyaar oḍighinom mọony ekulha amem kụ oḍighi ọzaamiom uwaloor phọ kụ ạmoogh sụo esi oomo areten, ịdi eḍighi bọ ọphon phọ kụ raḍighinaan oḍighi ghuḍum mọ ạkuen ạnyiidipho rꞌạkuphe ratu bọ.

⁹ Ọphon phọ ogey ọghaaph ni, dị ạnighe ni omeeraam bịn ọmadan.

¹⁰ Yira okol ịphen phọ kụ rọkpar bọ ḍịghaagh koḍula loor, ịdi eḍighi bọ yira moḍuom ologhi Ẹnaan phọ edi ghan bọ, Ọpelia oomo awe kụ ọlo ẹkar ghụn ẹkpaariom bụphe momeeraam bọ.

¹¹ Tọoghi ni ạḅile ạtughemi ghan rạraar phọ ịphen.

¹² Kámeera oye ạtuan mọ nạ onyugheel bịn aphogh nyịna asooromi. Ḍighi ghụn ni oye ọmaaniom esi ạbuphe momeeraam bọ, sịphe ọghaaph phọ ạna, rꞌẹzo phọ ạna, rꞌẹphomoghian phọ rꞌomeeraam mọ, rꞌooko ghan aloor phọ ạna.

¹³ Kụom ni loor phọ ạna amite ghan sịphe ogbo phọ ạal Ạḍinya Iigbia phọ, ạghaaph ghan ạtughemiom we tụtu mị aru asi.

¹⁴ Kákel ghan ruunmo aruwaloor phọ ọngo bọ nyịna mem mọ ikumoor awe ạsiosi phọ ọtuan bọ ịmiin phọ ọmiinaan bọ nyịna kụ ọḅam bọ rạghaagh phọ ạbidi ẹmhu phọ ạna.

¹⁵ Seere ịphen phọ ologhi ạna, ạkuom loor phọ ạna, pịdi oomo awe ọmiin ẹghimom aghisigh phọ ạna.

¹⁶ Mạar agona loor phọ ạna rꞌịpe nạ rạtughemi bọ. Ḍighi ghan ni ịphen phọ. Nạ aḍighi ghan ni ịphen phọ, pọ nạ kạpel li loor phọ ạna rꞌạbuphe rọnaghanan ghan bọ nyịna.