1 Timoti 3 - Ạḍinya Iigbia

Ọdo awe dị ọkpe oḍighi abupoghom ạbuo ạsiosi phọ

¹ Ọphon phọ ogey ọḅem ni mọ, “Oye lọ ạzua oḍighi opoghom ạsiosi phọ, pọ ạzua ni ephigh oḍighi.”

² Opoghom mọ aḍighi oye dị eḍighinom ịyaar phọ ọdi eseleman! Ọdi aphin oniin ạnir bịn, ạmoogh eeḅi ẹzo, ạmaar ẹrolom, aako ghan loor ọdi, aghuraam ruuruen, ạmaar ịlo ọtughemi ghan!

³ Kúḍighi oye ekpom rꞌọoko amiim, aḍighi oye ẹepho, ạmoogh igbiririph, kụ́moogh ekpooko ikpoki!

⁴ Ọdi aḍighi oye dị ạmaar rạpam ọto ọdi, ḅịle kẹn ạnmuny ọdi rọnaghanan ghan nyọdi, kọlogh nyọdi eghuan.

⁵ Oye lọ ụ́maar ịlo ọpham ọto ọdi, kaḍighi bọ ika kụ ạpam bụo ạsiosi phọ Ẹnaan?

⁶ Ọdi kúḍighi oye dị kọ̋kpar sịphe omeeraam mọ, ọbo ọdi kaaphughemi ghan bọ loor phọ ọdi, ạḅomom ịiruen amuphe phọ osophonaan bọ Eru.

⁷ Ọdi aḍighi oye dị ạmoogh eghuan ghisigh ạbuphe úḍighi aani bọ bụo ạsiosi, ọbo kosiphe ghan bọ nyọdi umugholoor, ọdi ameel ḍiphil phọ Eru.

Ạbuo iiḍighi ạsiosi phọ

⁸ Ạbuphe ọson bọ oseere mọ ọloghonaan ghan ḍịghaagh bụo ạsiosi phọ ọmaar kẹn ni ẹrolom, kụ́moogh ịyal asinem! Miim kụ́pughol ghan iboom, kúḍighi we ekpooko ikpoki,

⁹ ọmoogh ophooph ologhi kụ ọtuugh igey phọ mogananami bọ bịn omeeraam!

¹⁰ Ịpur ghan ẹeḅeghion aani bịdi ephogh, kụ bụlo ọkua kụ egbi ghan ọma oseere ạdol phọ ạḍien.

¹¹ Ạnmariir phọ bịdi ophinogh bọ kẹn ọmaar ẹrolom, kụ́kalaghian ghan ịkalaghian, ọmoogh iiḅi ạroozo, oḍighi bụo oḍuom ghan ologhi oomo amem!

¹² Ọpo ọsaḅar bọ oseere mọ ạloghonaan ghan ḍịghaagh bụo ạsiosi phọ aphin oniin ạnir bịn, ạmaar ạpham nmụny ọdi rꞌọto ọdi!

¹³ Bụlo ọkuami oḍighi phọ oḍighi koḍigh ni eboom eghuan, ọḅile ọmoogh ạkpo ologhi ọghaaphom ghan ịlo omeeraam mọ ạbidi esi ạJizos Kraist.

Ạḍibugh ịpe mogananami bọ uḍeenaan iyira

¹⁴ Ịduon mị ạge bọ ḍịnya phọ ạḍien raruom nyịna, mị aḍuom ni ologhi ọnuun oru ọmiin ạna.

¹⁵ Kụ mị aabinya, ạḍinya phọ ạḍien keḍeenaan ni nyịna ẹzo dị yira ạbuo eghunotu phọ Ẹnaan kọzo ghan. Yira phọ kụ ạbuo ạsiosi Ẹnaan phọ edi ghan bọ ni. Yira kụ ụmaar bọ ni rọpam kooko igey phọ.

¹⁶ Oye ólho dị kạparanaan ḍịbugh omeeraam mọ mogananami bọ uḍeenaan iyira: Ọdi amite ni eye aganana, kụ Uwaloor Iigbia phọ aḍeenaan mọ ọdi oye aruukuan ni, ḅịle ạruukpaany phọ Ẹnaan ụmiin ni nyọdi. Awe kẹn ụghaaph ni ooḅi ọghaaph ịlo ọdi ọḅeni ruuruen phọ. Umeeraam ni nyọdi sịen aḅirini phọ, kụ Ọmoogh-we ạsighe ni nyọdi agheelom kꞌạke.