1 Timoti 2 - Ạḍinya Iigbia

Ịdi ẹkpe ooseeny ghan Ẹnaan

¹ Esi omiighom, mị ratoma ni mọ oghol ghan oomo awe ghisigh Ẹnaan esi ịlom aghuḍuul, rꞌịiḅereghi, rꞌịlo yira ọwa, rꞌạḍiseph.

² Ogholom aani ghan ni bụlo ọdaaghi reelhe rꞌạbulo rọtooghi rạraar kọngo bụnon, pịdi yira ọrol dọl ẹboroph rꞌẹepho, ọkuom loor ayira Ẹnaan, ọzo ghan rọozo lọ eseleman.

³ Ọdo phọ ịiḅereghi phọ ịphen kụ ịnighe, ẹḅile ẹḅeeraan Ẹnaan Ọpelia phọ ayira,

⁴ rẹwa ghan bọ mọ oomo awe ọmoogh pẹleeny rꞌolegheri ịyaar phọ ọpo igey phọ.

⁵ Edi bọ eniin Ẹnaan; edi bọ kẹn oniin oye dị ạmeera enye ogbo Ẹnaan rꞌawe. Oye phọ ọpo phọ ạJizos Kraist

⁶ ạsighe bọ ghuḍum mọ ọdi ạtagharanam oomo awe. Emunughan bọ mem mọ, ịpe phọ kụ iḍeenaan mọ Ẹnaan rẹwa ghan mọ oomo awe ọmoogh pẹleeny.

⁷ Ụtuan ịduon kụ urom bọ ịmi oḍighi otelhedom rꞌọtughemia aruuruen phọ, mọ mị ugbeelom dom omeeraam rꞌigey phọ ụḅeni we. Mị ọkpe rạ́gba; mị rạkaaph ni igey.

⁸ Mị rạwa mọ tọrobo aḍio ạsiosi alephiri dị oseleman ọlhel ghan ịphalaḅaal ạraghaagh kụ ọoḅereghi Ẹnaan. Kụ́ḅaram ghan ophin ologhi rꞌịgbakian.

⁹ Ịduon kẹn kụ ịdi mị ạḅile rạwa mọ ạnmariir phọ ọtuugh ghan iinmenan aghuḍuul kụ oonmenan ghan, kúunmenan ghan ịlo umugholoor; kúḅoom ghan oboom oselemian ạsilaal rꞌọzologhian ịzolaam asigol, rꞌọloghoḍian ạrala, ḅịle rꞌiinmenan lọ ẹman ikpoki iboom.

¹⁰ Iiḅi ạroozo phọ ịpe ẹkpianaan bọ nmạriir lọ rọlogh eegu Ẹnaan kụ eḍighi ghan iinmenan dị bịdi koonmenan ghan!

¹¹ Ạnmariir phọ ọtuugha oḅoorian ghan bịriph bịriph osooromi loor ịtuugha phọ!

¹² Mị ụ́ngo ịikpo mọ ạnmariir ọtughemi ghan, ọḅile ọtooghi ghan rạraar ọngo lephiri ạnmuny. Bịdi oḅoroghian ghan,

¹³ ịdi eḍighi bọ ụphur ọlhem Ạdam kụ ogbi ọlhem aIiv,

¹⁴ kụ Ạdam úukeleghi. Ạnir phọ kụ ọdi ookeleghi bọ kụ aḍighi bọ osoroghuom iilogh phọ Ẹnaan.

¹⁵ Kụ ọlo, ạnir-ephoph phọ ạrol ghan ni dọl omeeraam rꞌẹphomoghian rꞌaruukuan, ạḅile aako ghan loor ọdi, ạghiom ghisigh, ọdi kạmar ghan ni mọony rꞌẹwoor.