1 Sạmuel 9 - Ạḍinya Iigbia

ẠSol aazuanan Sạmuel

¹ Oniin ogbogh oye ạrol li dị oghol mọ aKis, ọlo ẹemara ạBenjamin. Ọdi ọony Ạbiel, ọnyanyani aZeror, ọlo eghunotu ạBekorat, ẹkpigh eghun Afia.

² Ọdi ạmoogh ni mọony dị oghol mọ ạSol, ịma onyugheel ọony dị ạnighe ḍimite. ẠSol kụ aphoph apu oomo awe phọ Ịzirel, emiigh kꞌạrupha ọdi ẹghi esiemi ạnyu, ạḅile ạnighe ḍimite.

³ Iniin ịnam adool aKis iphe ni, kụ ọdi ạḅeni Sọl mọ, “Sịghe oniin otelhedom, ẹghi ẹwa ịnam adool phọ.”

⁴ Kụ bịdi ọwa osi ẹpe aroogbolom mọ Ifraim rꞌeelhe aSalisa kụ bịdi ịnam adool phọ ụ́miin; kụ bịdi ọwa osi ẹpe eelhe aSalim kụ ịnam adool phọ ẹpe ị́tol; kụ bịdi ọghi omite ẹpe eelhe ạBenjamin, kụ ụ́miin kẹn ni.

⁵ Mem dị bịdi ọwa bọ osi eelhe phọ aZuf, kụ ạSol ạḅeni otelhedom mọ ọdi mọ, “Ogheel ologhi otu. Ịduon kụ ílho, ọde phọ ạmi kạbile ọotughian oḅio ịnam adool phọ akaphian ghan oomiigh loor ẹmhu ayira.”

⁶ Kụ otelhedom mọ ạḅeni nyọdi mọ, “Kori kụ. Sịen ẹmha phọ ẹphen phọ, oniin oye iigbia odi ni; awe ọlogh ni nyọdi eegu iboom loor esi dị tọrotoro ịyaar lọ dị ạḅem remite ghan ni. Ọghi ọteeny nyọdi; iini ọdi katue ni ụḅeni iyira ekpisi lọ kọmiin bọ ịnam adool phọ.”

⁷ Kụ ạSol apuru mọ, “Eḍighi ịyaar dị yira ọghi ọteeny nyọdi, yira kọngo bọ nyọdi eeghia? Eḍien phọ ayira memuneen, kụ yira ụ́moogh ịyaar ọngo ọdi?”

⁸ Kụ otelhedom mọ ạphagharanaan mọ, “Mị ạpam ni sịen ọony ẹnum opoḍi asilva. Mị kạngo nyọdi ikpoki phọ kụ ọdi kụḅeni ni iyira ekpisi lọ kọmiin ịnam mọ.”

^9-11 ẠSol ạphagharanaan mọ, “Ịitughian phọ ạna ẹnighe ni! Ụgua ọghi!” Kụ bịdi oten ọghi ẹpe ẹmha phọ oye iigbia phọ arugh bọ. Ịdipho bịdi rọsiiny bọ eegbolom mọ koten bọ kụ osi ẹmha phọ, bịn bịdi ozuan buniin ạnmanyaan dị rọki ọkpa ạmuum. Kụ bịdi opuru nmạnyaan phọ mọ, “Oyil-uḍien phọ odi ni ẹmha ḍụghum?” (Mem mọ ọpo phọ, oyil kꞌẸnaan phọ ughol ghan mọ oyil-aḍien, kụ eḍighi ịyaar dị oye rạwa opuru ịyaar Ẹnaan, oye phọ kạḅem mọ, “Ọghi kꞌoyil-aḍien phọ.”)

^12-13 Kụ ạnmanyaan phọ ọphagharanaan mọ, “Ii, oye phọ odi ni; pụruku aten ni sịen, odi ni risigh anyina. Eḍighi ịyaar dị nyina eegborion, nyina kẹteeny ni nyọdi. Nyina remite ẹmha phọ bịn nyina kẹmiin ni nyọdi. Ọdi arigheel rodon loor esi dị awe rọki ọphighiron ẹkia ạnyu enmeny ẹpe ạnyu eegbolom mọ rodon. Awe phọ ọomaghagh bọ kóle eḍien phọ tụtu ọdi ạghi asi, loor esi dị ọdi kụ kạpur ạseph ẹkia phọ. Nyina ẹghi nyịidipho phọ, nyina kẹmiin ni nyọdi kụ ọdi agbi nụun ọghi olhe eḍien ẹpe eegbolom mọ.”

¹⁴ Ẹpe kụ esi dị ạSol rꞌotelhedom mọ ọdi oten ọghi osi ẹpe ẹmha phọ, kụ sịphe eḍighom ẹmha phọ, bịdi ọmiin Sạmuel dị ratu ẹphen bịdi odi bọ oten ọghi ẹpe ịiḅereghi phọ.

¹⁵ Ḍio phọ ạḍiphe eten bọ, Ọmoogh-we phọ mạḅeni ni Sạmuel mọ,

¹⁶ “Iḍue phọ ọpo kẹḅaal bọ ọdo phọ amem mọ ạmuen, mị katom ni oniin oye ọlo ẹemara ẹemara ạBenjamin mọ aru ạteeny nyịna. Sịghe mụnum-ịko ạsagharan ẹmhu ọdi, dị ọdi kạda weye phọ ạmi Ịzirel, kụ mị kạtagharan ni bịdi ḍịghaagh awe aFilistia phọ. Mị mạmiin ni ịminimiin awe phọ ạmi kụ mị mạnaghan ni emoghi ọloghonaan ạḍighaagh phọ ạbidi.”

¹⁷ Mem dị ạSamuel ạmiin bọ Sọl, Ọmoogh-we phọ ạḅeni ni Sạmuel mọ, “Ọphon kụ oye phọ mị ạḅeni bọ nyịna. Ọdi kụ oye dị kạda we phọ ạmi.”

¹⁸ Kụ ạSol ạghi ạteeny Sạmuel dị matuman ọnhu-aḍibuo phọ kụ apuru mọ, “Uḍeenaan ịmi, oyil-uḍien phọ atugh ẹghen?”

¹⁹ ẠSamuel ạphagharanaan mọ, “Mị kụ oyil-uḍien phọ ni. Iḍiemi ọghi ẹpe ịiḅereghi phọ. Ịyal phọ anyina rꞌạmi kọḅoph ole eḍien rodon. Ḍịroor iḍue kụ mị ạpanyanaan oomo asipuru phọ anyina kụ nyina egbi ogheel.

²⁰ Esi ọghaaph ịlo ịnam adool phọ ephe bọ esi ịraar aḍughul-otu dị meten, kẹ́moogh mun ọto; mọmiin ni ịnam mọ. Kụ ọlo ạnhian kụ ọdi oomo awe phọ Ịzirel rọwa bọ kꞌịphen kꞌịphen phọ? Nạ kụ oye phọ, nạ rꞌeghunotu ọde phọ ạna.”

²¹ Kụ ạSol ạphagharanaan mọ, “Mị ọlo eghun ạBenjamin, ọkaraghi ẹḅam eghun sịen Ịzirel. Kụ ẹkpigh phọ ạmi ọkaraghi ẹbam sịen ọto phọ. Uḍighi ika kụ nạ rụghaaphanaan bọ ịmi ịphen phọ?”

²² Kụ ạSamuel aḍiemiom Sọl rꞌotelhedom mọ ọdi bịdi ọghi oḍigh oboom osoph, kụ ạrolomi bịdi igbogh ạsigada sịphe ogbo ịraardi awe phọ ạbuphe ọomaghagh bọ olhe eḍien phọ.

²³ Kụ ạSamuel ạḅeni oye phọ rạsa ghan bọ eḍien phọ mọ, “Sịghe etigh ẹnam mọ mị ạngo bọ nyịna oseere phọ oru.”

²⁴ Ẹpe kụ esi dị ọsaam ịisa phọ ạsighe etigh ẹnam ọsaḅar bọ sịphe owol ẹnam aru kụ ạḅamanaan Sọl. Kụ ạSamuel ạḅem mọ, “Mịin, ẹphen kụ etigh ẹnam mọ oseenaan bọ nyịna. Bạ ni. Mị useenaan nyịna mọ bạ nyịidipho phọ sịen awe phọ mị ạamaghagh bọ odi bọ.” Ịduon phọ kụ ẹdi ạSamuel rꞌạSol ọḅoph bọ olhe eḍien ḍio phọ ạḍiphe.

²⁵ Mem dị bịdi ọḍua bọ esi ịiḅereghi phọ osoor kụ ọghi ẹpe ẹmha phọ, bịdi oḍeenaan Sọl ẹmina ẹpe ạnyu otu phọ,

²⁶ kụ ọdi ạmina sịphe phọ. Mem dị ạḍiroor mẹḅaal ạSamuel ạmagh Sọl ẹpe ạnyu otu phọ kụ ạḅeni mọ, “Ḅetenu. Mị karorori nyịna agheel.” Kụ ạSol aḅetenu, kụ ịyal ạbidi orelhian ọghi ẹpe eten phọ.

ẠSamuel ạsagharan mụnum-ịko Sọl mọ ọdi aḍighi ọdaam

²⁷ Mem dị bịdi osi bọ emitenom ẹmha phọ, ạSamuel ạḅeni Sọl mọ, “Ḅẹni otelhedom mọ ạna aḍiemi ghan.” Kụ otelhedom mọ aḍia ghan, kụ ạSamuel ạḅem mọ, “Tọl sịen ẹphurukpu amem, mị kạḅeni nyịna ịdi Ẹnaan ẹḅem.”