1 Sạmuel 8 - Ạḍinya Iigbia

Awe phọ ọwa ọdaam

¹ Mem dị ạSamuel mạkpo, ọdi ạsighe ni nmụny phọ ọdi aseere mọ oogbo ghan ịiruen sịphe Ịzirel.

² Ḍien okumoor ọony phọ ọdi ughol mọ aJoel, ḍien ọbam mọ ughol mọ Abaija; bịdi uugbo ghan ịiruen ẹpe Beersheba.

³ Kụ ọlo ạnmuny phọ ạSamuel ụ́daph igey areten ọde phọ ạbidi: ạḍiḅeeraan ạbidi ịrol ghan esi ikpoki bịn, kụ iḍighi kụ bịdi olhe ghan oti-ọman bịn ụ́kaaph ghan sighiton phọ agey.

⁴ Ẹpe kụ esi dị oomo ikpolom awe phọ Ịzirel ookpomoghan kụ ọghi ọteeny Sạmuel ẹpe Rama.

⁵ Kụ ọḅeni nyọdi mọ, “Mịin nạ rạkpo kụ ạnmuny phọ ạna ụ́daph eḍighinom ạraraar phọ ạna, kụ iḍighi kụ seere ọdaam dị kụda iyoor pịdi yoor ọmoogh ọdaam ịdipho ịpheri phọ ạramha phọ ọmooghogh bọ.”

⁶ Ịlom ọmoogh aani ọdaam mọ bịdi ọlhom bọ ikia ni Sạmuel, kụ ọdi ạaḅereghi apuru Ọmoogh-we phọ.

⁷ Kụ Ọmoogh-we phọ ạḅeni nyọdi mọ, “Nạghanan oomo ịpe awe phọ ọḅeni bọ nyịna. Bịdi nyịna úkel. Mị kụ oye phọ bịdi moghel bọ oḍighi ọdaam ạbidi.

⁸ Kꞌagee phọ mị ạsighe bọ bịdi ẹpe Ijipt amitiom, bịdi mụḅitonaan ịmi rọoḅereghi ghan ruru; kụ nyịidipho phọ bịdi roḍighi nyịna ịpe bịdi ruḍighi ghan bọ ịmi.

⁹ Kụ iḍighi kụ nạghanan bịdi, kụ ọlo pụr bịdi rụru ạḅile ạmaaghi ịpe ạbudaam mọ koḍighi bọ bịdi.”

¹⁰ ẠSamuel ạghaaph ni ạḅeni we phọ opuru ghan bọ nyọdi ọdaam mọ oomo phọ ịpe Ọmoogh-we phọ ạḅeni bọ nyọdi,

¹¹ “Ịphen kụ ịdi ọdaam mọ anyina kiḍighi inyina. Ọdi kạsighe ni nmụny phọ anyina atene we ẹgham: buniin kokiilom ghan rughuugh ẹgham ọdi dị rekiil ude, buniin koḍiku ghan rụsu kụ ọki ẹgham kụ abuniin okiil ghan oḍiemiom rughuugh-ude phọ.

¹² Ọdi kạsighe buniin aḍighi ruwo ẹmhu dị kopogh ghan ḍita awe dị ọman oniin ọonir awe, abuniin opogh we dị ọman ooghdi awe. Ạnmuny phọ anyina kụ koḅephanaan ghan nyọdi iizo; obughanaan nyọdi ibugha mem lọ ẹteeny, ọḅile ọlemanaan nyọdi reenema ẹgham rꞌarughuugh-ude phọ ọdi.

¹³ Ạnmanyaan phọ anyina kụ kọsaaghinaan ghan nyọdi rolho ịma eḍu dị ọdi kagbula ghan, ọḅile ọsa ghan riiḍien ọdi.

¹⁴ Ọdi kạsighiogh ni igey iizo phọ anyina rꞌiizo ịghol rꞌọliv phọ anyina ạngooghi ruwo ẹmhu phọ ọdi ạmaaghi bọ.

¹⁵ Ịbiakpa phọ rꞌiimuma avain phọ anyina kodi ghan ḍioph abin kụ ọdi ạsighe bin, ạngo weye iiḍighi phọ ọdi rꞌaruwo ẹmhu phọ ọdi ạmaaghi bọ.

¹⁶ Ọdi kạsighiogh ni bugey ạnmuny-otu rꞌạnmanyaan-otu phọ anyina rꞌigey ạsinam rꞌịnam adool phọ anyina kụ ekumu ghan nyọdi.

¹⁷ Iyool-ịga rꞌạrutu-ịga phọ anyina kodi ghan ḍioph abin kụ ọdi ạsighe ghan muniin abin, kụ nyina rꞌaloor keḍighi rẹbene ọdi.

¹⁸ Mem dị ịphen phọ kemiteghu bọ, nyina kẹḅiphighu ni iboom loor ẹmhu ọdaam mọ anyina, ọpo nyina kụ ẹsaḅar bọ ni. Kụ ọlo Ọmoogh-we phọ kạ́naghan emoghi phọ anyina.”

¹⁹ Awe phọ ụ́naghanan Sạmuel. Bịdi ụḅem ghụn mọ, “Eeye. Yoor rọwa ọmoogh aani ọdaam,

²⁰ pịdi yoor ọghigh aani ịpheri phọ areelhe phọ, ọdaam mọ ayoor kụda iyoor ạḅile uḍiemiom ghan iyoor ạki abe rạagham ayoor.”

²¹ ẠSamuel ạnaghan ni oomo ịpe bịdi ọghaaph bọ kụ ạghi ạghaaph ạḅeni Ọmoogh-we phọ.

²² Ọmoogh-we phọ ạphagharanaan mọ, “Ḍighi ịpe bịdi rọwa bọ, ạngo bịdi ọdaam.” Kụ ạSamuel ạḅeni oomo awe phọ Ịzirel mọ ogheleghu kꞌạbidi.