1 Sạmuel 6 - Ạḍinya Iigbia

Ọsighe Igbe Ịyo phọ oḅulemi

¹ Mem dị Igbe Ịyo Ọmoogh-we phọ mẹrol bọ ẹpe eelhe aFilistia oḍual ụnwanyu,

² awe phọ ụmagh ni bụpinyon rịkia phọ rꞌariil ịiḍaany phọ kụ opuru mọ, “Yira koḍighi ika Igbe Ịyo Ọmoogh-we phọ? Eḍighi ịyaar dị yira ọsighe oḅulemi ẹpe ọdi ạḍua bọ kụ aru, kọḅaram eeghe kụ ọsighe bọ ọki?”

³ Bịdi ọphagharanaan mọ, “Eḍighi ịyaar dị nyina reḅulemi Igbe Ịyo Ẹnaan phọ Ịzirel, nyina kẹloghom ni inmo ẹngo nyọdi ọsighe ọkpiom ịkaraph phọ anyina. Ịduon phọ kụ ẹdi nyina kẹmoogh eekonom, kụ nyina ẹmiin ịpe eḍighi bọ kụ ọdi rịlhiom bọ inyina.”

⁴ Kụ awe phọ opuru mọ, “Eeghe ọdo inmo kụ ẹdi kọkiom nyọdi?” Bịdi ọphagharanaan mọ, “Oogh aruuḅulha dị ọlhemom gol rꞌoogh iwo dị ọlhemom gol, oniin ạmeera esi oniin ọdaam aFilistia. Eniin ẹzegh phọ kụ iḍighi bọ ni oomo phọ anyina rꞌoogh phọ ạbudaam mọ.

⁵ Ịlemogh ruuḅulha phọ rꞌiwo phọ ịphen repiemi bọ de phọ anyina, ẹḅile ẹngo rughuenian Ẹnaan awe Ịzirel phọ. Iini ọdi kạbile ni ọliom weye phọ rꞌaruru phọ rꞌade phọ anyina ọghiom arisigh.

⁶ Uḍighi ika kụ nyina kẹḅaar bọ rụmhu ịdipho ọdaam mọ Ijipt rꞌawe phọ Ijipt? Kébula ịpe Ẹnaan ẹgilaam bọ bịdi kụ bịdi ogbi bọ omeera mọ Ịzirel ọḍua Ijipt ogheel.

⁷ Kụ iḍighi kụ ịki ẹka omoom oghuugh inya idighila, ẹsighe ịyal ạsinam dị kőḍighinom ghan oḍighi, ẹsighe bịdi ẹkpoom oghuugh phọ, ephorogh nmụny phọ ạbidi eḅulemi ẹpe otu ịnam mọ.

⁸ Ẹsighe Igbe Ịyo Ọmoogh-we phọ ẹsaany sịphe oghuugh phọ, kụ ẹsighe ịnon igbe eseere etumeriom nyọdi — igbe dị ọlogh ịkaaneen aruuḅulha phọ ịpe nyina ẹsighe bọ rẹkiomonaan nyọdi mọ eḍighi inmo ọsighe ọkpiom ịkaraph phọ anyina. Ịgur sịnam mọ bịn bịdi kenyeene ni, bịn eḅula, oye kụ́daph.

⁹ Ịtol kụ ephogh ịpe bịdi ketelhe bọ: eḍighi ịyaar dị bịdi kenyeene ni ẹpe ẹmha phọ ạBet Semes, pọ eḍeenaan mọ Ẹnaan Ịzirel phọ ni kụ ịsighe bọ ni ịiḅaghami phọ ịphen iruom iyira; kụ ọlo eḍighi ịyaar dị ạsinam mọ ị́ki ẹpe, pọ pụruku yira kolegheri mọ ọdi kụ ọ́ngo bọ ẹzegh phọ; iizuanaan ni bịn.”

¹⁰ Bịdi ọtuugh oḍighi ịpe ọḅeni bọ bịdi: bịdi ọsighe ịyal ạsinam ọkpoom oghuugh phọ, ọsighe nmụny ạsinam mọ ọkasiom esi.

¹¹ Bịdi ọsighe Igbe Ịyo phọ ọsaany sịphe oghuugh phọ, ọḅaram igbe phọ ịpe ọlogh bọ ruuḅulha phọ rꞌiwo phọ ịpe ọlhemom bọ gol phọ.

¹² Ạsinam mọ enyeene ẹpe eten ạBet Semes, esi ị́gbatanu; bịdi ẹḅeela ghan ịduon phọ bịdi rẹki bọ. Oogh phọ ạbudaam mọ aFilistia ụdaph ni sịnam mọ osi ọku ạbidi rꞌạBet Semes.

¹³ Awe phọ ạBet Semes rọku ghan ịbiakpa ạbidi ẹpe oodiph phọ, kụ bịdi okperenom opogh bịn pọrono Igbe Ịyo phọ. Iloghi ạbidi ịḅaal li iboom esi ịphen bịdi ọmiin bọ.

¹⁴ Oghuugh phọ aru asi ozo oye dị oghol mọ aJosua dị arugh ẹpe Bẹt Semes bịn ạmeera atuma ḍigbogh aḍighiigh. Awe phọ ọsighe oghuugh-ude phọ opol oḍighi ịpe; kụ ọsighe sịnam mọ ọze kụ ọsighe oguom nịan ọphighironom ẹkia ọngo Ọmoogh-we phọ.

¹⁵ Ọto kꞌaLivai ophoophe Igbe Ịyo kꞌỌmoogh-we phọ rꞌigbe phọ ịpe ọlogh bọ rạraar phọ ịpe ọlhemom bọ gol phọ, kụ ọsighe ọḅam ạnyu aḍiboom aḍighiigh phọ. Pọ kụ esi dị awe phọ ạBet Semes ọphinyon rịkia ọngo Ọmoogh-we phọ.

¹⁶ Oogh phọ ạbudaam mọ aFilistia ụmeera ni ọmiin oomo phọ ịphen bịdi oḍighi bọ kụ ogbi ogheel ẹpe Ẹkron ḍio phọ ạḍiphe.

¹⁷ Awe phọ aFilistia ụsighe ni oogh aruḅuula phọ ọlhemom bọ gol phọ ọngo Ọmoogh-we phọ eḍighi inmo ọkpiom ịkaraph phọ ạbidi: eniin, ẹmha ẹmha, emiigh Ạsdod, kụ esi Gaza rꞌAskelon rꞌạGat, rꞌẸkron.

¹⁸ Bịdi ụngoom kẹn ni iwo phọ ịpe ọlhemom bọ gol phọ, ẹmha ẹmha, igbogh ạramha dị oghoony rꞌịbam ịdi úkoony, ḍiwo ḍiwo ịmeera esi oogh phọ ạbudaam aFilistia phọ. Aḍigbogh aḍighiigh phọ ạḍiphe ozo phọ aJosua ẹpe ẹmha phọ ạBet Semes sịphe ọḅam bọ Igbe Ịyo kꞌỌmoogh-we phọ, edi ghan ni kꞌarodon emeera enye ịphen emite bọ.

¹⁹ Ọmoogh-we phọ ạze ni oḍualdi awe ẹmha phọ ạBet Semes loor esi dị bịdi ụghi oḅiila ologhi Igbe Ịyo phọ. Kụ awe phọ omeelom ọto ịdi eḍighi bọ Ọmoogh-we phọ mạze weye dị oleeny ịduon sịphe igbo phọ ạbidi.

Igbe Ịyo phọ ẹpe Kịriat Jiarim

²⁰ Ẹpe kụ esi dị aweye phọ ạBet Semes ọḅem mọ, “Ạnhian kụ katue ạmeera egbodo Ọmoogh-we phọ, Ẹnaan iigbia phọ ẹphen phọ? Yira kọsighe nyọdi ọki ẹghen pịdi ọdi ạḍua ḍịghaagh ayira?”

²¹ Kụ bịdi orom dom ọghiom weye ạKiriat Jiarim kụ ọḅeni mọ, “Bụo aFilistia phọ moḅulemi Igbe Ịyo kꞌỌmoogh-we phọ. Itu ẹsighe.”