1 Sạmuel 5 - Ạḍinya Iigbia

Igbe Ịyo phọ edi ẹpe eelhe aFilistia

¹ Mem mọ bụo aFilistia phọ oziton bọ Igbe Ịyo phọ ḍịghaagh Ịzirel ọsighe ẹpe Ebeniza, bịdi ụpham ni ọghi osiom ẹmha ạbidi dị oghol mọ Ạsdod,

² kụ bịdi ọsighe ọghi oseere zin eru ạbidi dị oghol mọ aDagon, kụ ọsighe ọmeremi otumeniom ẹkaaneen eru phọ.

³ Eḅon ạḍiroor ạḍieri phọ aḍio phọ awe phọ Ạsdod ụmiin ni mọ ẹkaaneen eru phọ Dagon mameel ạsighe risigh phọ ọdi azu ude sịphe risigh Igbe Ịyo phọ kꞌẸnaan. Kụ bịdi ọsighe ọmeremi eniin phọ esi phọ.

⁴ Eḅon ạḍiroor ạḍieri phọ aḍio phọ bịdi ọmiin mọ aDagon mạḅile kẹn ameel pạ risigh Igbe Ịyo phọ kꞌẸnaan. Egi phọ ẹphen ẹmhu phọ ọdi rꞌịyal phọ ạraghaagh phọ ọdi mẹghapharanu ẹḍua bịn emeleghu sịphe ọnhu-aḍibuo phọ. Ogboku phọ bịn asugha.

⁵ (Ịduon phọ kụ iḍighi kụ kꞌaḍio phọ arodon ariil ạrikia phọ aDagon rꞌoomo awe lọ rọoḅereghi ghan ẹpe Ạsdod ropel ghan ni sịphe phọ rọ́zeer ghan kụ koten.)

⁶ Ọmoogh-we phọ ạliom ni iboom we phọ Ạsdod. Ọdi ạliom ni bịdi rꞌoomo ạramha dị etuman bịdi. Ọdi ạngo bịdi ẹzegh ruuḅulha.

⁷ Mem dị bịdi ọmiin bọ ịpe remite bọ, kụ bịdi ọḅem mọ, “Ẹnaan phọ Ịzirel kụ rịlhiom iyira rꞌaDagon eru phọ ayira. Yira kómeera mun Igbe Ịyo phọ ịphen ẹrol nịiniin sịen.”

⁸ Kụ bịdi orom we kụ ọghi ọmagh oogh phọ ạbudaam mọ aFilistia kụ opuru bịdi mọ, “Yira koḍighi ika Igbe Ịyo kꞌẸnaan Ịzirel phọ ịphen phọ?” Kụ bịdi ọphagharanaan mọ, “Ịsighe ẹghi ẹpe Gạt.” Kụ bịdi ọsighe ọghi ẹpe Gạt ẹnon ẹmha aFilistia.

⁹ Kụ ọlo mem dị ọsighe bọ osiemi Gạt, Ọmoogh-we phọ ạlhiom kẹn ni ẹmha phọ, ạḅile ạngo ruugu ẹmha phọ. Ọdi aḍighi ni ịdi oomo awe ẹmha phọ ọmoogh ẹzegh ruuḅulha, nmụny rꞌabukumoor, oye úgbi.

¹⁰ Ẹpe kụ esi dị bịdi ọsighe Igbe Ịyo phọ ọghi ẹnon ẹmha ạbidi dị oghol mọ Ẹkron, kụ ọlo mem dị osiemi bọ sịphe ẹmha phọ, awe ẹmha phọ ụlooghi ni kụ ọḅem mọ, “Bịdi mọsighe Igbe Ịyo phọ Ẹnaan phọ Ịzirel otu ẹphen mọ ạze oomo ayira!”

¹¹ Kụ bịdi ọḅile orom ọghi ọmagh oomo ạbudaam mọ aFilistia kụ ọḅeni mọ, “Ịsighe Igbe Ịyo phọ awe phọ Ịzirel eḅulemi ẹpe kꞌạbidi, ọbo ọdi kụze ghan bọ iyira rꞌọto kꞌayira.” Aruugu ạrol li oomo ẹmha phọ loor esi dị Ẹnaan rẹliom bịdi iboom.

¹² Awe lọ úmuughu, ụmooghogh ẹzegh ruuḅulha kụ awe phọ omoghi ghan ọmagh ruru phọ ạbidi mọ ẹloghonaan bụno ḍịghaagh.