1 Sạmuel 31 - Ạḍinya Iigbia

Aḍuugh phọ ạSol rꞌalephiri ạnmuny phọ ọdi

¹ Awe aFilistia eeghi ni ẹgham rꞌawe Ịzirel ẹpe Eegum aGilboa. Ụze ni ịbadi awe Ịzirel ẹpe phọ; kụ bụphe osugha bọ ọḅaram Sọl rꞌạnmuny phọ ọdi oghiil osumughu.

² Kụ ọlo awe aFilistia phọ uphorogh ni bịdi ọteeny kụ ọze ịraar ạnmuny phọ ạSol Jọnatan rꞌẠbinadab ḅịle rꞌaMalkisua.

³ Ẹgham mọ ịkpaariom ni Sọl iboom dị ẹkpina ẹpomoghian phọ imeelom ni nyọdi eḍighi eboom ịyaar.

⁴ Kụ ọdi ạḅeni onyugheel ọony dị rạpam ghan rẹenema ẹgham mọ ọdi mọ, “Mitiom elhool ẹgham mọ ughiighom ịmi, pịdi awe aruru aFilistia phọ ạbuen kótu ghan bọ ughiigh ịmi ịlo ạrigilaam.” Kụ eepuph ímeera mọ ọony phọ aḍighi ịdipho phọ. Ọpo kụ esi dị ạSol ạmeremi elhool ẹgham mọ ọdi kụ ameelom.

⁵ Ọony phọ ạmiin ni mọ ạSol mamugh kụ ọdi kẹn ạmeremi aani elhool phọ ọdi ameelom bịn ạdaph Sọl amugh.

⁶ Ịphen kụ ịdi ạSol rꞌịraar phọ ạnmuny phọ ọdi ḅịle rꞌonyugheel ọony phọ omuughu bọ. Oomo awe phọ ạSol umuughu ni ḍio phọ ạḍiphe phọ.

⁷ Mem dị awe Ịzirel phọ ọrol bọ ḍịeri phọ ạḍighaagh eḍiiny phọ ạJezreel rꞌẹpe ạḍighaagh emitenom ọphiiny phọ ạJodan, ọnaghan bọ mọ awe Ịzirel mosumughu, ḅịle kẹn mọ moghiigh Sọl rꞌạnmuny phọ ọdi, bịdi ụwile ni rạmha phọ ạbidi bịn osumughu. Ẹpe kụ esi dị bụo aFilistia phọ oru sịphe ạramha phọ orughogh.

⁸ Ẹgham mọ reten rẹḅaal ẹnon aḍio kụ bụo aFilistia phọ ọghi ọkarion ibura awe phọ ạbuphe bịdi ọze bọ, kụ bịdi ọmiin ruzu ạSol rꞌịraar phọ ạnmuny phọ ọdi dị momuughu ẹpe Eegum mọ aGilboa,

⁹ Kụ bịdi osoph ẹmhu ạSol ọkporion rẹenema ẹgham mọ ọdi. Ọsighe rạraar phọ ịphen ọngo rụukpaany oghirom ooḅi ọghaaph phọ ọphon oleenye oomo eelhe phọ aFilistia ogananami sịphe aruutu ạrumugh phọ ạbidi rꞌesi awe phọ.

¹⁰ Kụ bịdi ọsighe rẹenema ẹgham mọ ọdi ọlogh otu ẹya-eru ạbidi dị oghol mọ Astarte; kụ bịdi ọsighe ḍizu phọ ạSol ọkan ọḅaraghiom iikpe ẹmha phọ ạBet Sạn.

¹¹ Mem dị awe phọ ạbuphe orugh bọ ẹpe Jabes Gịliad ọnaghan bọ ịphen awe aFilistia phọ moḍighi bọ Sọl,

¹² ikpolom awe ạkpo ologhi uḅetenu ni kụ orelhe ẹega ḍughul osi Bẹt Sạn. Bịdi ọkporion iḍugh phọ kụ ọsighiogh ruzu phọ ạSol rꞌạnmuny phọ ọdi sịphe iikpe phọ ạBetsan ọpham ogheelom Jabes kụ oguom nịan ẹpe phọ.

¹³ Kụ ọsighe ịḅarara phọ ạbidi oḍi zin oreeny asuphuugh sịphe ẹmha phọ, kụ bịdi ọkaagh ẹḍogh oḍual aḍughul-otu.