1 Sạmuel 30 - Ạḍinya Iigbia

Ẹgham rꞌaweye Ạmalek

¹ Ịyal aḍughul-otu reten, kụ aDevid rꞌawe phọ ọdi ọghi osi Zịklag. Ạmalekait phọ moruphiom ẹgham ḍịghaagh esoorom mọ aJuda, ọḅile ozuom ẹgham Zịklag. Bịdi mọsuughi ruutu ẹmha phọ,

² ọḅile osiphi oomo phọ ạnmariir phọ. Bịdi nmạriir ụ́ze mꞌọbam mꞌogbogh, mosiphi bịn ọḍuanam.

³ Mem dị aDevid rꞌawe phọ ọdi ọghi bọ osi, bịdi ụmiin mọ mọsu nịan ẹmha phọ, ḅịle kẹn mọsighe nmạriir phọ rꞌạnmuny phọ rꞌạnmanyaan phọ ạbuno ọḍuanam.

⁴ ADevid rꞌawe phọ ọdi omiigh emoghi kụ bịdi omoghi yogh tụtu asiloor ạbidi edugh.

⁵ Ghạlamo ịyal phọ ạnmariir phọ aDevid Ahinoam rꞌAbigel bịdi ụsighe kẹn ni ọḍuanam.

⁶ ADevid ạrol li esi iboom ịiḅaghami, loor esi dị iphin ni iloghi awe phọ ọdi iboom ịduon phọ ẹgham mọ mẹsighe bọ nmụny phọ ạbidi kụ bịdi ọnya oroḅol aDevid ikpo; kụ ọlo Ọmoogh-we Ẹnaan phọ ọdi ạngo nyọdi ạkpo ologhi.

⁷ Kụ aDevid ạḅeni oyil ạrikia phọ Ạbayata ọony phọ Ạhimelek mọ, “Sịghe ạsuoma iigbia uruom.” Kụ Ạbayata ạsighe ạghiomonaan nyọdi.

⁸ Kụ aDevid apuru Ọmoogh-we phọ mọ, “Mị ụki ni ophorogh awe phọ ạbuen oru bọ ẹgham mọ ẹphen ḍụghum? Kụ mịna katue ni asiphi bịdi ḍụghum?” Ọmoogh-we phọ ạphagharanaan nyọdi mọ, “Porogh ni bịdi. Nạ kasiphi ni bịdi, kụ ạtagharan bụphe bịdi mosiphi bọ.”

⁹ ADevid rꞌodiiny okuron awe phọ ọdi oḅetenu onyeene kụ mem dị bịdi ọghi bọ osi sịphe aḍikol phọ ạBesor, buniin ạbidi ọrol sịphe.

¹⁰ ADevid ạpham ni inya okuron awe ạghimom ghisigh. Ạbueri phọ ịyal okuron awe phọ útue mun ụ́ḅeeny ḍikol phọ loor esi dị asiloor ạbidi medugh kụ bịdi ọrol ọman.

¹¹ Awe phọ ạbuphe rꞌaDevid ọrol bọ ụghi ni bịn ọmiin oniin oye ọlo Ijipt ẹpe elegheḍum mọ, kụ bịdi ọsighe nyọdi oruom Devid. Bịdi ọsighe eḍien rꞌạmuum ọngo oye phọ;

¹² ịgharaghar ikpo ạfig rꞌịyal ịizugh ịgharaghar iimuma avain Ọdi role bọ bịn ạmoogh ịnyaam: mẹman ni ịraar aḍughul-otu ọdi eḍien úlhe ḅịle mụum ụ́phughol bọ.

¹³ Kụ aDevid apuru oye phọ mọ, “Ạnhian kụ ọde-otu phọ ạna? Kụ nạ ọlo ẹghen?” Kụ ọdi ạphagharanaan mọ, “Mị ọlo Ijipt, ẹbene oye ọlo Ạmalek. Ọde-otu phọ ạmi ụwile ịmi ẹpe ọman ịraar aḍughul-otu dị meten loor esi dị mị ụrol émoon.

¹⁴ Yoor uruphiom ẹgham eelhe phọ aKeretait ḍịghaagh esoorom mọ aJuda, rꞌeelhe ẹkpigh phọ ạKeleb, kụ yoor ọsu nịan ẹmha phọ ạZiklag.”

¹⁵ Kụ aDevid apuru oye phọ mọ, “Nạ katue ni ạki uḍeenaan ịmi ekpisi lọ awe ẹgham mọ ạbuen phọ odi bọ ḍụghum?” Kụ oye phọ ạphagharanaan mọ, “Mị katue ni eḍighi ịyaar dị nạ uguanaan ịmi esi aḍien Ẹnaan phọ mọ nạ ịmi kúghiigh. Ḅịle kẹn, mọ nạ ịmi kạ́ḅogh ạngo ọde-otu phọ ạmi.”

¹⁶ Kụ ọdi aḍiemiom Devid ạghi aḍeenaan bịdi. Awe ẹgham mọ ạbuen phọ ụrol li bịn ọwalala oomo phọ esi phọ role rọpughol; iloghi phọ ẹḅaal loor esi iboom ạraraar phọ bịdi owum bọ ọsighe ẹpe Filistia rꞌẹpe Juda.

¹⁷ Eḅon ạḍiroor ẹpheri phọ aḍio phọ kụ aDevid azuom bịdi ẹgham kụ bịdi eeghi tụtu ẹteeny dulhe. Inya okuron ugheel ạnmuny dị oḍiku sịkamel kụ osuma bịn kụ ukpetenaan ọbo oye ósugha.

¹⁸ Kụ aDevid ạtagharan oomo awe phọ rꞌoomo ạraraar phọ awe Ạmalek phọ ọsighiogh bọ, rꞌịyal phọ ạnmariir phọ ọdi;

¹⁹ rꞌeniin ịyaar ípe. ADevid ạteeny ni aḅulemi oomo ạnmuny rꞌạnmanyaan awe phọ ọdi, ḅịle kẹn rꞌoomo ạraraar phọ awe Ạmalek phọ owum bọ ọsighiogh.

²⁰ ADevid ạteenyom kẹn ni ạsighe oomo iyool-ịga rꞌạsinam mọ. Awe phọ ọoḅaki oomo ịnam mọ ịphen phọ oḍiemiom ghan risigh ạbidi, kụ ọḅem ghan mọ, “Ịphen phọ ịlo aDevid.”

²¹ Kụ aDevid ạghi ạteeny ịyal okuron awe phọ ọdi ạbuphe aloor phọ edugh bọ kụ útue aani ụ́ḅeeny okol ạmuum mọ ạBesor. Bịdi ụḍua ni ọteeny aDevid rꞌawe phọ ọdi, kụ aDevid ạghi ạteeny bịdi kụ ạmagh ḍigey ạḍimagh.

²² Kụ ọlo buniin ighiil ọdo awe dị ọdaph Devid ọghi aani, ụḅem ni mọ, “Bịdi iyira ụ́daph ụki. Kụ iḍighi kụ yira kọ́ngo bịdi rạraar phọ ịphen yira ọsighe bọ ọpham orighelom. Bịdi ọsighiogh nmạriir phọ rꞌạnmuny phọ ạbidi bịn ogheel.”

²³ Kụ ọlo aDevid ạphagharanaan ni mọ, “Bumor ạmi, kéḍighi ịdipho esi ạraraar phọ Ọmoogh-we phọ mụngo bọ iyira. Ọdi ạmaar ri uuko iyira, ạḅile ụngo iyira ọkpar opu esi awe phọ oru bọ ibum mọ.

²⁴ Oye ólho dị kameeraam ịphen nyina ẹḅem bọ. Oomo awe kụ kole ni; tọrotoro oye lọ ạrol ọman aphogh ghan riiḍien phọ ayira kapin ni iniin ịpe ọpo ạghi bọ ẹgham mọ kapin bọ.”

²⁵ Kụ ịphen phọ eḍighi ologh dị aDevid mạlhogh, kụ Ịzirel rọdaph ni kꞌarodon.

²⁶ Mem dị aDevid arigheel bọ Zịklag, ọdi ạghiomonaan ni rịghiri ọdi rꞌabuḍiemiom awe phọ aJuda iniin ạraraar phọ bịdi owum bọ ọsighiogh, kụ ọdi ạḅeniom mọ, “Ịporono inmo dị ịngo inyina esi ạraraar phọ yoor ozirion bọ ẹpomoghian Ọmoogh-we phọ.”

²⁷ Ọdi ạngo ni ạghiom weye ạBetel, rꞌawe ẹpe Rama ẹpe ạḍighaagh esoorom mọ aJuda, rꞌawe dị ọrol rạmha Jatir,

²⁸ rꞌAroer, rꞌaSifmot, rꞌEstemoa,

²⁹ ḅịle rꞌaRakal; ạngo kẹn ni eelhe phọ aJerameel, rꞌawe aKen,

³⁰ ḅịle rꞌawe ạramha phọ aHoma, Bọrasan, Ạtak,

³¹ ḅịle rꞌạHebron. Ọdi ạngo ni ạghiom oomo phọ arikpisi phọ ọdi rꞌawe phọ ọdi moten ghan bọ.