1 Sạmuel 3 - Ạḍinya Iigbia

Ọmoogh-we phọ aḍeenaan loor ọdi Sạmuel

¹ Riiḍio phọ ịpe phọ, mem mọ ọpo ạSamuel odi bọ rakumu ghan Ọmoogh-we phọ sịphe eeḍian Ilai, asidom dị ẹḍua ḍịghaagh Ọmoogh-we phọ kụ eru ị́bugh mun, ḅịle kẹn ịmiin dị ẹḍua ḍịghaagh ọdi kụ eru iku ni iboom.

² Ḍiniin aḍughul kụ Ilai, mem dị ariḍien phọ ọdi rẹ́kar mun kẹmiin eten, odi osoph ọdi rạnaani.

³ ẠSamuel ạmina ẹpe ẹphan phọ, sịphe oseere bọ Igbe Ịyo kꞌẸnaan phọ. Mem dị ke̋kpoghoronu, ọtozi phọ odi ni raamor.

⁴ Kụ Ọmoogh-we phọ ạmagh mọ, “Sạmuel, Sạmuel,” kụ ọdi ameera mọ, “Eae. Mị odi ni sịen.”

⁵ Kụ ọdi aghiil ạghi ạteeny Ilai kụ ạḅem mọ, “Tọ nạ ụmagh ni ịmi. Mị maru.” Kụ Ilai ạḅeni nyọdi mọ, “Mị nyịna ụ́magh; kịa ạmina.”

^6-7 Kụ Ọmoogh-we phọ ạḅile ạmagh Sạmuel. Ọony phọ ólhegheri mọ Ọmoogh-we phọ kụ rạmagh bọ nyịno, loor esi dị Ọmoogh-we phọ kọ̋ḅaanaan ghan nyọdi. Kụ iḍighi kụ ọdi aḅetenu ạghi ạteeny Ilai kụ ạḅem mọ, “Nạ ụmagh ni ịmi. Kụ pọrono ạmi.” Kụ Ilai ạphagharanaan kụ ạḅem, “Mọony ạmi, mị nyịna ụ́magh; kịa ạmina.”

⁸ Ọmoogh-we phọ ạḅile ạmagh Sạmuel rꞌegi phọ ẹphen sịen ịraar amem, kụ ọdi aḅetenu ạghi ạteeny Ilai kụ ạḅem mọ, “Nạ ụmagh ni ịmi. Kụ pọrono ạmi.” Ọpo kụ amem dị Ilai aloghoma mọ Ọmoogh-we phọ kụ rạmagh ghan bọ mọony phọ.

⁹ Ẹpe kụ esi dị Ilai ạḅeni mọony phọ mọ, “Ḅịle ạghi ạmina. Kụ eru mạar dị ọdi ạḅile ạmagh nyịna, ḅẹm mọ, ‘Kạaph, Ọmoogh-we. Otelhedom mọ ạna rạnaghan ni.’” Kụ ạSamuel ạḅile ạghi ạmina.

¹⁰ Kụ Ọmoogh-we phọ aru ạmeera esi phọ, kụ ạmagh ịdipho ọdi ạmagh ghan bọ: “Sạmuel, Sạmuel!” Kụ ạSamuel ạphagharanaan mọ, “Kạaph ni. Otelhedom mọ ạna rạnaghan ni.”

¹¹ Kụ Ọmoogh-we phọ ạḅeni nyọdi mọ, “Aḍio edi ni dị ịyaar dị mị kaḍighi bọ weye phọ Ịzirel kebeeph ni iboom dị aḅeri lọ ạnaghan kapula ni.

¹² Aḍio phọ ạḍiphe kụ ẹdi mị kaḍighi bọ amitiom oomo ịpe mị ạpaar bọ ọto kꞌIlai, ịyaar késugha.

¹³ Mị mạḅeni ni nyọdi mọ mị kạliom ni ọto kꞌọdi kꞌagee-pọ loor esi dị ạnmuny phọ ọdi mụgilaam ịmi ọpughan. Ọdi alegheri ni ịphen phọ bịdi roḍighi bọ kụ ọdi ọ́ḅaam bịdi.

¹⁴ Kụ iḍighi kụ mị maghunyian rạḅeni ghan ọto kꞌIlai mọ ẹkia ílho dị ketue ewoph ịikpia ịkaraph phọ ạbidi.”

¹⁵ ẠSamuel ạmina ni tụtu ạḍiroor ẹḅaal, kụ ọdi aḅetenu aghunyon rughuugh otu Ọmoogh-we phọ. Ọdi aghiilaan ni ọḅeni Ilai rạraar phọ ịpe Ọmoogh-we phọ ạghaaph bọ ḍughul phọ.

¹⁶ Kụ Ilai ạmagh nyọdi mọ, “Sạmuel, ọony ạmi!” ẠSamuel ameera mọ, “Ii, ọde-otu ạmi.”

¹⁷ Ilai apuru mọ, “Ọmoogh-we phọ ạḅeni nyịna eeghe? Ụḅeni ịmi, kạ́booghi ịyaar. Ẹnaan ẹlhiom nyịna agey eḍighi ịyaar dị nạ ụ́kaaph oomo ịpe ọdi ạḅem bọ.”

¹⁸ Ẹpe kụ esi dị ạSamuel ạghaaph ạḅeni nyọdi oomo phọ ịdi. Ọdi ósugheeny ịyaar. Kụ Ilai ạḅem mọ, “Ọdi kụ Ọmoogh-we phọ. Ịlo ẹḅeeraan nyọdi, ọdi aḍighi!”

¹⁹ Ịdipho ạSamuel rapoph bọ, Ọmoogh-we phọ ạrolan ni nyọdi; kụ aḍighi ghan ịdi tọrotoro ịyaar lọ ạSamuel ạḅem ịtuugh ghan ni emite.

²⁰ Kụ iḍighi kụ oomo awe phọ Ịzirel emiigh eḍighom kụ esi eekuna eelhe phọ ulegheri ni mọ ạSamuel ọkaraghi oyil kꞌỌmoogh-we phọ ni.

²¹ Kụ Ọmoogh-we phọ ọ́wile oḍeenaan ghan aloor ọdi ẹpe Sailo, ẹpe ọdi ạrol bọ ạḅaanaan Sạmuel. Kụ tọro amem lọ ạSamuel ạḅem ịyaar, awe phọ Ịzirel ụnaghanan ghan ni.