1 Sạmuel 27 - Ạḍinya Iigbia

ADevid odi igbo aweye aFilistia phọ

¹ ADevid ạḅeni ni loor phọ ọdi mọ, “Rꞌeniin aḍio sịen ạSol kughiigh ni ịmi. Ịyaar dị ẹnighe dị mị kaḍighi osuma ogheel ẹpe eelhe aFilistia. Kẹper ri Sọl ọwa ạmi ẹpe Ịzirel kụ mị ạtol aani ẹereegh.”

² Kụ aDevid rꞌodiiny okuron awe phọ ọdi ọghi ọteeny Akis ọony phọ aMaok ọdaam mọ ạGat.

³ ADevid rꞌawe phọ ọdi, rꞌạnmuny rꞌạnmariir ạbidi ogheel ẹpe Gạt. ADevid ạpham ni ịyal phọ ạnmariir phọ ọdi, Ahinoam ọlo Jẹzreel phọ rꞌAbigel ekpukele ạnir phọ aNebal ọlo ạKarmel.

⁴ Mem dị ạSol ạnaghan bọ mọ aDevid masuma akeel ẹpe Gạt, bịn ạwile ophorogh ọdi.

⁵ Kụ aDevid ạḅeni Akis mọ, “Eru mạar dị nạ aḍighi ni ọyaghiri ạmi, pọ ụngaani ịmi ẹbam ẹmha lọ mị katugh. Ẹekpia ílho, oye phọ, dị mị katughan rꞌạna ẹpe egbogh ẹmha phọ.”

⁶ Kụ iḍighi kụ Akis ạngo nyọdi ẹmha dị oghol mọ ạZiklag, kụ ẹpe kụ ịyaar phọ ạZiklag maḍighi bọ ẹmha dị ạbudaam aJuda kụ ọmoogh tụtu kꞌarodon.

⁷ ADevid arugh ẹpe Filistia ḍioph rꞌodiiny ụnwanyu.

⁸ Rụnwanyu phọ ịpe phọ aDevid rꞌawe phọ ọdi ụghi ghan ozuom ẹgham weye ẹmha phọ aGesur rꞌaGirzi rꞌẠmalek. Bụen phọ urugh ghan eelhe phọ ẹpe phọ kꞌamem dị mebia ni. Ọdi azuom ghan bịdi tụtu ạki asi ẹpe Sur, tụtu ạki asi Ijipt.

⁹ Ọdi ạze oomo alephiri rꞌạnmariir kụ ạsighiogh iyool-ịga, rꞌạsinam, rꞌịnam adool, rꞌạsikamel, ghạlamo kẹn arukpe. Kụ ọdi agbi oḅula ọteeny Akis,

¹⁰ kụ oye phọ apuru nyọdi mọ, “Nạ ụghi ẹghen kụ aruphiom ẹgham egi phọ ẹphen?” kụ aDevid ạḅeni ghan nyọdi mọ ọno ạghi ẹpe esoorom aJuda mụghumo ẹpe ade ẹkpigh phọ aJerameel mụghumo ẹpe ade phọ aKenait phọ orugh bọ.

¹¹ ADevid ósugheeny mꞌạnir mꞌalephiri lọ kạki ẹpe Gạt ạgba ọkaraghi ịpe ọdi maḍighi yogh ghan bọ. Ịphen phọ kụ ịdi aDevid aḍighi ghan oomo asuḍughul-otu phọ ịpe ọdi arugh bọ ẹphen eelhe phọ aFilistia.

¹² Kụ ọlo Akis ạsighenom ḍịghaagh elhiom ọdi Devid, kụ ọdi ạḅeni ghan loor ọdi mọ, “Awe phọ ọdi, awe Ịzirel phọ, ọlogh ni ḍien nyọdi iboom kụ ọdi kạtol li ukumu ghan ịmi oomo aghuḍum mọ ọdi.”