1 Sạmuel 23 - Ạḍinya Iigbia

ADevid ạpel ẹmha phọ aKaila

¹ ADevid ạnaghan ni mọ awe aFilistia phọ mọghi ozuom ẹgham ẹmha phọ aKeila romiighi imoom ịbiakpa phọ pụruku ọku bọ.

² Kụ ọdi apuru Ọmoogh-we phọ mọ, “Mị ụki ni uzuom ẹgham we aFilistia phọ ạbuen phọ ḍụghum?” Kụ Ọmoogh-we phọ ạphagharanaan mọ, “Kịa ni azuom bịdi pịdi nạ ạpel Keila.”

³ Kụ ọlo awe phọ aDevid ụḅeni ni nyọdi mọ, “Aruugu rusiph ghan ni iyoor iboom ẹphen Juda phọ yira odi bọ. Kụ ạghiom ologhi mem dị yira kọki ẹpe Keila kụ ozuom ẹgham weye aFilistia phọ.”

⁴ Kụ aDevid ạḅile apuru ḍipuru Ọmoogh-we phọ; kụ Ọmoogh-we phọ ạḅeni nyọdi mọ, “Kịa azuom ẹgham weye aFilistia phọ ẹpe Keila, loor esi dị mị kạngo ni nyịna ọkpar opu.”

⁵ Kụ iḍighi kụ aDevid rꞌawe phọ ọdi ọghi ẹpe Keila, kụ ozuom ẹgham bụo aFilistia phọ kụ ọze ịbadi awe, kụ bịdi ọpham ịnam dị awe phọ ọmoogh orighelom. Ịphen kụ ịdi aDevid ạphel bọ ẹmha phọ.

⁶ Mem mọ Ạbayata ọony phọ Ạhimelek asuma bọ ạghi aḍighan rꞌaDevid ẹpe Keila, ọdi ạphamam ni oopa phọ.

⁷ Ụghaaph ni ọḅeni Sọl mọ aDevid magheel ẹpe Keila; kụ ạSol ạḅem mọ, “Ẹnaan mẹḅogh nyọdi ịngo ịmi. ADevid mameel ḍiphil, mạghi aḍigh ẹmha dị ọḅiir iikpe okitonom kụ ọlogh rụnhu-aḍibuo ẹkpar.”

⁸ Kụ ạSol aakpomoghi weye ẹgham mọ ọdi ọghi ozuom ẹgham Keila rꞌokpobiom aDevid rꞌawe phọ ọdi.

⁹ Mem dị aDevid ạnaghan bọ mọ ạSol raakolobian ozuom ọdi ẹgham, ọdi ạḅeni ni Ạbayata oyil ạrikia phọ mọ, “Sịghe oopa phọ aru.”

¹⁰ Kụ aDevid ạaḅereghi mọ, “Ọmoogh-we, Ẹnaan phọ Ịzirel, mị ạnaghan mọ ạSol raakolobian oru ophiemi aKeila loor ẹmhu ạmi otelhedom mọ ạna.

¹¹ Awe ẹmha phọ aKeila kụḅogh ni ịmi ọngo Sọl ḍụghum? ẠSol kạkaraghi ni atu ḍụghum ịdipho mị mạnaghan bọ? Ọmoogh-we Ẹnaan phọ Ịzirel, mị rạaḅereghi ni mọ ụphagharanaan ịmi.” Kụ Ọmoogh-we phọ ạphagharanaan mọ, “ẠSol katu ni.”

¹² Kụ aDevid ạḅile apuru mọ, “Awe phọ aKeila kụḅogh ni ịmi rꞌawe phọ ạmi ọngo Sọl ḍụghum?” Kụ Ọmoogh-we phọ ạḅeni nyọdi mọ, “Bịdi kịḅogh ni inyina ẹngo.”

¹³ Ẹpe kụ esi dị aDevid rꞌawe phọ ọdi — rọkiom ni odiiny okuron awe — ọḍua Keila ekperenom bịn omiigh erelhe. Mem dị ạSol ạnaghan bọ mọ aDevid masuma ạḍua Keila, ọdi ạwile ni ịpe ọdi magbiighi bọ oḍighi phọ.

ADevid odi eelhe ạraaḅaraph

¹⁴ Kụ aDevid ạaghian ẹpe eelhe aroogbolom, ẹpe ẹdala phọ etuman bọ Zịf. Oomo amem ạSol rạwa ghan ịlo ọdi kaḍighi kụ ạmiin Devid, kụ Ẹnaan ị́ḅogh Devid ịngo nyọdi.

¹⁵ ADevid ạmiin ni mọ ạSol ạkaraghi ni ạnya oghiigh ọno. Eniin aḍio aDevid ạrol li ẹpe Hores ẹpe ẹdala phọ etuman bọ Zịf.

¹⁶ ẠJonatan ạghi ạteeny nyọdi ẹpe phọ, kụ ạngo nyọdi ikpo ọnhu ọkparamiom ologhi ọdi rꞌoromoghiom ọdi mọ Ẹnaan keeko ni nyọdi.

¹⁷ Kụ ạḅeni nyọdi mọ, “Kạ́moogh oghiilaan. Ọde phọ ạmi kátue aḍighi nyịna ịyaar. Ọdi ạkaraghi ni alegheri mọ nạ kụ kaḍighi ọdaam mọ Ịzirel; kụ mị atum nyịna.”

¹⁸ Kụ ịyal phọ ạbidi oghunya risigh Ọmoogh-we phọ kụ oguanan oḍighi ạrighiri. ADevid ạrol ẹpe Hores, kụ ạJonatan agheel kꞌạbidi.

¹⁹ Buniin awe bụo ạZif ụghi ni ọteeny Sọl ẹpe Gibia, kụ ọḅeni mọ, “ADevid ạbooghian eelhe ayoor ẹpe Hores ẹpe ẹeḅaraph aHakila, ḍịghaagh esoorom ẹdala phọ aJuda.

²⁰ Yoor olegheri ni oomo ịdi ọdaam mọ rạwa nyọdi osiph, kụ iḍighi kụ tue eelhe ayoor, yoor kọwa ni ọmiin mọ nạ ạteeny nyọdi asiph.”

²¹ Kụ ạSol ạphagharanaan mọ, “Ọmoogh-we phọ ịseph inyina ịduon nyina ẹmoogh bọ igbiririph ạmi!

²² Ịki ẹmaar ẹwa, ẹkaraghi ẹmiin esi phọ ọdi odi bọ, ḅịle kẹn rꞌoye phọ ạkaraghi bọ ạmiin nyọdi sịphe phọ. Mị ạnaghan mọ ọdi phọ aḍighi ni oye ikeḍi.

²³ Ịkaraghi ẹwaaghi riisi phọ ịpe ọdi rạbooghian ghan bọ kụ eghiil eru ịḅeni ịmi egina amem; kụ mị ịdaph inyina ạki. Kụ eḍighi ịyaar lọ ọdi odi ni eelhe phọ ẹpe phọ, pọ mị kạwa ni nyọdi asiph, ghạlamo eḍighi ẹdi mị kạwa akitonom oomo ade phọ aJuda.”

²⁴ Kụ bịdi ọwile Sọl kụ oḍiemi ghan ọghi osi Zịf. ADevid rꞌawe phọ ọdi ụrol ẹpe ẹdala phọ aMaon, eḍiiny dị awe rọ́ki ghan ḍịghaagh esoorom ẹdala phọ aJuda.

²⁵ ẠSol rꞌawe phọ ọdi oḅetenu ọghi ọwa aDevid, kụ ọlo aDevid ạnaghan ni kụ aten ạghi eniin ẹeḅaraph asighiigh ẹpe ẹdala phọ aMaon kụ ạrol. Mem dị ạSol ạnaghan bọ ịphen phọ, ọdi ạghi ni ọwa aDevid.

²⁶ ẠSol rꞌawe phọ ọdi ụrol li eniin ạḍighaagh ẹeḅaraph phọ, aDevid rꞌawe phọ ọdi ọrol ḍịeri phọ ạḍighaagh, ẹeḅaraph phọ bịn kụ isophoghom bịdi. Bịdi rokiil okpetenaan ạSol rꞌawe phọ ọdi loor esi dị awe phọ mọkpul rọwa osiphi ạbidi.

²⁷ Pọ kụ amem dị otelhedom aru ạteeny Sọl kụ ạḅeni mọ, “Ịnuun eḅula. Awe aFilistia moru ropiemi ẹmha phọ.”

²⁸ Kụ ạSol ạwile ophorogh aDevid kụ ạghi eenan awe aFilistia phọ. Ẹpe kụ ịyaar phọ oghol bọ esi phọ ịpa phọ mọ Eegum Osophoghom mọ.

²⁹ ADevid ạḍua ạghi ẹpe eelhe phọ En Gedi kụ ạaghian.